ອິນເດຍໄລ່ອອກ 3 ເຈົ້າໜ້າທີ່ ເຫດຍິງລູກສອນໄຟຕິດຫົວຮົບນິວເຄຼຍ ໃສ່ປາກິດສະຖານໂດຍບໍ່ຕັ້ງໃຈ
ກອງທັບອາກາດອິນເດຍເປີດເຜີຍໃນວັນທີ 23 ສິງຫາວ່າ: ລັດຖະບານໄດ້ມີຄຳສັ່ງໄລ່ອອກເຈົ້າໜ້າທີ່ 3 ຄົນ ຈາກເຫດການຍິງລູກສອນໄຟເຂົ້າໃສ່ປາກິດສະຖານໂດຍບໍ່ໄດ້ຕັ້ງໃຈ ເຊິ່ງເຫດເກີດນັບແຕ່ເດືອນມີນາຜ່ານມາ. ຂະນະທີ່ທັງ 2 ປະເທດ ເຊິ່ງເປັນຄູ່ປໍລະປັກທີ່ມີອາວຸດນິວເຄຼຍ ມີການແກ້ໄຂເລື່ອງນີ້ແບບງຽບໆ ເນື່ອງຈາກບໍ່ມີລາຍງານຜູ້ເສຍຊີວິດ ຫລື ບາດເຈັບ.
ເຫດດັ່ງກ່າວເກີດຂຶ້ນເມື່ອວັນທີ 9 ມີນາຜ່ານມາ ໂດຍລູກສອນໄຟທີ່ຖືກຍິງໄປປາກິດສະຖານຄືລູກສອນໄຟ “BrahMos” ເຊິ່ງເປັນລູກສອນໄຟຄວາມໄວເໜືອສຽງ ທີ່ສາມາດຕິດຕັ້ງຫົວຮົບນິວເຄຼຍໄດ້ ແລະ ເປັນລູກສອນໄຟທີ່ພັດທະນາຮ່ວມກັນລະຫວ່າງອິນເດຍ ແລະ ຣັດເຊຍ.
ໂດຍຫລັງເກີດເຫດ ລັດຖະບານປາກິດສະຖານສະແດງທ່າທີຕ້ອງການຄຳຕອບຈາກອິນເດຍ ເລື່ອງກົນໄກຄວາມປອດໄພທີ່ຕິດຕັ້ງໄວ້ເພື່ອປ້ອງກັນການຍິງລູກສອນໄຟໂດຍບໍ່ຕັ້ງໃຈ.
ຂະນະທີ່ກອງທັບອາກາດອິນເດຍຖະແຫລງຊີ້ແຈງຜົນການສືບສວນຂອງສານ ພົບວ່າມີການປະຕິບັດງານທີ່ບໍ່ເປັນໄປຕາມຂະບວນການມາດຕະຖານ ຈົນນຳໄປສູ່ການຍິງລູກສອນໄຟໂດຍບໍ່ຕັ້ງໃຈດັ່ງກ່າວ ແລະ ຢືນຢັນວ່າລັດຖະບານໄດ້ສັ່ງໄລ່ອອກເຈົ້າໜ້າທີ່ທັງ 3 ເຊິ່ງມີຜົນທັນທີນັບແຕ່ວັນທີ 23 ສິງຫາ.
ຈາກລາຍງານຂອງສະມາຄົມຄວບຄຸມອາວຸດໃນອາເມລິກາພົບວ່າ: ລູກສອນໄຟ BrahMos ມີໄລຍະໂຈມຕີໄລຍະໄກນັບແຕ່ 300-500 ກິໂລແມັດ ເຊິ່ງໄກພໍຈະໂຈມຕີຮອດນະຄອນຫລວງອິສລາມາບັດ ເມືອງຫລວງຂອງປາກິດສະຖານ ຖ້າຍິງຈາກຖານຍິງຈະຫລວດທາງຕອນເໜືອຂອງອິນເດຍ.
ອ້າງອີງ:
