ບໍ່ລົ້ມເລິກແຜນ! ແມນຢູ ກຽມຍື່ນເພີ່ມ 97 ລ້ານຢູໂຣ ເພື່ອຄວ້າ “ແອນໂທນີ“ ມາໃຫ້ໄດ້
ແມນເຊັສເຕີ ຢູໄນເຕັດ ບໍ່ລົ້ມເລິກແຜນການທີ່ຈະເຊັນສັນຍາກັບ “ແອນໂທນີ“ ປີກຈອມເຫລື້ອຍຂອງ ອາແຈັກ ມາຮ່ວມທີມ, ເຖິງແມ່ນວ່າໃນອາທິດທີ່ຜ່ານມາພວກເຂົາຖືກປະຕິເສດຈາກຂໍ້ສະເໜີທີ່ມີມູນຄ່າ 80 ລ້ານຢູໂຣ, ແຕ່ໃນຂະນະທີ່ນັກເຕະເອງ ກໍ່ໄດ້ໂພສຮູບພາບໃນຂະນະທີ່ກຳລັງຊົມເກມແດງເດືອດທີ່ ແມນຢູ ຊະນະ ລິເວີພູລ ໃນວັນຈັນຜ່ານມາ.
ຫລ້າສຸດ, ນັກຂ່າວສື່ດັງຊາວໂຮນລັງ ໄດ້ຢືນຢັນຂໍ້ມູນທີ່ໄດ້ຮັບວ່າ ແມນຢູ ຈະເຊັນສັນຍາກັບດາວຍິງທີມຊາດບຣາຊິນໄດ້ແນ່ນອນ ແລະ ສະໂມສອນຈະຍອມຈ່າຍເງິນຢ່າງຫລວງຫລາຍເຖິງ 97 ລ້ານເອີໂຣ ເພື່ອໃຫ້ ອາແຈັກ ຕອບຕົງລົງ. ນອກຈາກນັ້ນ, Fabricio Romano ເປີດເຜີຍວ່າ ແມນຢູ ໄດ້ຕົກລົງລາຍລະອຽດສ່ວນຕົວກັບ ແອນໂທນີ ໄດ້ຕັ້ງແຕ່ອາທິດທີ່ຜ່ານມາ. ເຫລືອພຽງແຕ່ການຍື່ນສະເຫນີຢ່າງເປັນທາງການໄປທີ່ ອາແຈັກ ອີກເທື່ອຫນຶ່ງ.
ດ້ານ ເອຣິກ ເທນຮາກ ຜູ້ຈັດການທີມ ໄດ້ສະແດງຄວາມພໍໃຈຫລາຍ ທີ່ສະໂມສອນຄວ້າໂຕ ຄາເຊມີໂຣ ຈາກ ຣຽວ ມາດຣິດ ເຂົ້າມາເສີມແດນກາງ. ເຊິ່ງເຂົາເຊື່ອວ່າຈະສ້າງຄວາມເຂັ້ມແຂງໃຫ້ກັບທີມໄດ້ຢ່າງແນ່ນອນໂດຍການປຽບທຽບ ຄາເຊມີໂຣ ຄືກັບປູນຊີມັງ. ເພື່ອສົມທົບຄວາມເຂັ້ມແຂງລະຫວ່າງກ້ອນຫີນ ພ້ອມຍອມຮັບວ່າດີໃຈຫລາຍ ກັບການເຊັນສັນຍາຄັ້ງນີ້.
