ຈີນຜະເຊີນກັບໄພແຫ້ງແລ້ງຢ່າງໜັກ ກະທົບຕໍ່ການຜະລິດໄຟຟ້າ-ຂົນສົ່ງທາງເຮືອ
ອີງຕາມສຳນັກຂ່າວ The standard ລາຍງານໃນວັນທີ 22 ສິງຫາ ໃຫ້ຮູ້ວ່າ: ຈີນຜະເຊີນກັບໄພແຫ້ງແລ້ງທີ່ຮ້າຍແຮງທີ່ສຸດໃນປະຫວັດສາດສົ່ງຜົນໃຫ້ແມ່ນ້ຳຫລາຍສາຍໃນທົ່ວປະເທດ ລວມທັງບາງພື້ນທີ່ຂອງແມ່ນ້ຳແຍງຊີແຫ້ງແລ້ງຈົນເຫັນພື້ນດິນລຸ່ມ ປາກົດການດັ່ງກ່າວໄດ້ສົ່ງຜົນກະທົບຕໍ່ຫລາຍຂະແໜງການ ບໍ່ວ່າຈະເປັນການຜະລິດໄຟຟ້າພະລັງງານນ້ຳທີ່ຕ້ອງຢຸດສະງັກລົງ, ການຂົນສົ່ງເຮືອຕ້ອງໂຈະການບໍລິການຊົ່ວຄາວ ລວມທັງບໍລິສັດຈໍານວນຫລາຍແຫ່ງທີ່ຕ້ອງປິດລົງຍ້ອນການຂາດແຄນພະລັງງານໃນພາກພື້ນ.
ແມ່ນ້ຳແຍງຊີຂອງຈີນເປັນແມ່ນ້ຳໃຫຍ່ອັນດັບສາມຂອງໂລກ ແລະ ເປັນແມ່ນ້ຳທີ່ມີຄວາມສຳຄັນຕໍ່ເສດຖະກິດຂອງຈີນ ແນວໃດກໍຕາມ ລະດັບນ້ຳໄດ້ຫລຸດລົງຕ່ຳສຸດໃນລະດູຮ້ອນນີ້ ໂດຍລາຍງານກ່າວວ່າ: ການສະໜອງນ້ໍາຂອງແມ່ນ້ໍາແຍງຊີຫລຸດລົງຕໍ່າກວ່າຄ່າສະເລ່ຍໃນຊ່ວງ 5 ປີ ເຖິງ 50% ສົ່ງຜົນໃຫ້ເສັ້ນທາງການຂົນສົ່ງຂອງແມ່ນ້ໍາໄດ້ຖືກໂຈະຊົ່ວຄາວໃນບາງສ່ວນ.
ໃນວັນທີ 19 ສິງຫາທີ່ຜ່ານມາ ຈີນໄດ້ອອກມາປະກາດເຕືອນໄພແຫ້ງແລ້ງໃນທົ່ວປະເທດ ໃນຂະນະທີ່ພາກຕາເວັນຕົກສຽງໃຕ້ແມ່ນໄດ້ຮັບຜົນກະທົບໜັກສຸດ, ຄື້ນຄວາມຮ້ອນທີ່ຮຸນແຮງຄາດວ່າຈະແກ່ຍາວເຖິງເດືອນກັນຍາ ,ການຂາດແຄນນ້ຳໄດ້ຜົນກະທົບຕໍ່ການຜະລິດຂອງໂຮງງານໄຟຟ້າພະລັງງານນ້ຳ ໂດຍສະເພາະແຂວງເສສວນທີ່ອາໄສໄຟຟ້າພະລັງງານນ້ຳກວມກວ່າ 80% ຂອງພະລັງງານທັງໝົດ ປັດຈຸບັນ ປະລິມານນ້ຳໃນອ່າງເກັບນ້ຳຂອງແຂວງເສສວນເພື່ອຜະລິດໄຟຟ້າໄດ້ຫລຸດລົງເຄິ່ງໜຶ່ງ ເຊິ່ງມັນກົງກັນຂ້າມ ຄວາມຕ້ອງການໄຟຟ້າໄດ້ເພີ່ມຂຶ້ນຫລາຍກວ່າ 25% ໃນລະດູຮ້ອນນີ້.
ອາທິດທີ່ຜ່ານມາ ແຂວງເສສວນໄດ້ປິດໂຮງງານຕ່າງໆໃນ 19 ຕົວເມືອງເປັນເວລາ 6 ມື້ ຫລັງຈາກຄື້ນຄວາມຮ້ອນທີ່ຮ້າຍແຮງທີ່ສຸດໃນຮອບ 60 ປີໄດ້ເຮັດໃຫ້ການໃຊ້ພະລັງງານສູງຂຶ້ນ ກະທົບຕໍ່ໂຮງງານຂອງບໍລິສັດໃຫຍ່ຫລາຍແຫ່ງ, ລວມທັງ Toyota, Foxconn ແລະ Tesla. ເມື່ອບໍ່ດົນມານີ້, South China Morning Post ລາຍງານໃນມື້ວານນີ້ວ່າແຜນທີ່ໂຮງງານຈະສືບຕໍ່ເປີດໃນອາທິດນີ້ໄດ້ຖືກເລື່ອນອອກໄປ. ໄພແຫ້ງແລ້ງໄດ້ສົ່ງຜົນກະທົບຕໍ່ປະຊາຊົນຈີນຢ່າງໜ້ອຍ 2,46 ລ້ານຄົນ ແລະ ສ້າງຄວາມເສຍຫາຍຕໍ່ເນື້ອທີ່ກະສິກຳ 2,2 ລ້ານເຮັກຕາໃນແຂວງເສສວນ, ເຮີເປ, ຫູໜານ, ຈຽງຊີ, ອານຮຸຍ ແລະ ເມືອງຈົງຊິງ ປະຊາຊົນຈຳນວນ 780,000 ຄົນ ຕ້ອງການຄວາມຊ່ວຍເຫລືອໂດຍກົງຈາກລັດຖະບານ, ຄຽງຄູ່ກັນນັ້ນ ລັດຖະບານຈີນກໍພະຍາຍາມຈົນສຸດຄວາມສາມາດຂອງຕົນເພື່ອຈັດສັນແຫລ່ງນ້ຳ ແລະ ພະລັງງານຢູ່ແຕ່ລະເຂດເພື່ອໃຫ້ສາມາດນໍາໃຊ້ຢ່າງພຽງພໍ.
