ຝຣັ່ງແຈກເງິນ 4.000 ເອີໂຣ ໃຫ້ຜູ້ຂີ່ລົດໃຫຍ່ທີ່ປ່ຽນໃຈຫັນມາຂີ່ລົດຖີບໄຟຟ້າ ຈູງໃຈຄົນຫັນມາໃຊ້ພະລັງງານສະອາດເພີ່ມຂຶ້ນ
ລັດຖະບານຝຣັ່ງສະເໜີມອບເງິນສູງສຸດ 4.000 ເອີໂຣ ໃຫ້ບັນດາຜູ້ຂີ່ລົດໃຫຍ່ທີ່ປ່ຽນໃຈຫັນມາຂີ່ລົດຖີບໄຟຟ້າ ເພື່ອຈູງໃຈໃຫ້ປະຊາຊົນເລີກໃຊ້ເຊື້ອໄຟທີ່ເຮັດໃຫ້ເກີດມົນລະພິດ ແລະ ຫັນມາໃຊ້ທາງເລືອກໃນການຄົມມະນາຄົມທີ່ເປັນມິດຕໍ່ສິ່ງແວດລ້ອມເພີ່ມຂຶ້ນ.
ສຳລັບປະຊາຊົນທີ່ຢູ່ອາໄສໃນຄອບຄົວທີ່ມີລາຍໄດ້ຕໍ່າ ແລະ ຢູ່ອາໄສໃນເຂດເມືອງທີ່ມີການປ່ອຍມົນລະພິດຕໍ່າ ເຊິ່ງປ່ຽນໃຈຫັນມາຂີ່ລົດຖີບໄຟຟ້າ ແລະ ລົດຈັກແບບດັ້ງເດີມທີ່ບໍ່ມີມໍເຕີ ຈະໄດ້ຮັບເງິນອຸດໜູນຈາກລັດຖະບານຝຣັ່ງ 4.000 ເອີໂຣ, ສ່ວນປະຊາຊົນທີ່ມີລາຍໄດ້ສູງກໍມີສິດຮັບເງິນອຸດໜູນນຳເຊັ່ນກັນ ແຕ່ຈະມີອັດຕາຫລຸດລົງມາ.
ໃນປີຜ່ານມາ, ລັດຖະບານຝຣັ່ງເຄີຍເປີດໂຄງການນີ້ມາກ່ອນແລ້ວ ແຕ່ໃນປີນີ້ໄດ້ເພີ່ມຈຳນວນເງິນອຸດໜູນຂຶ້ນອີກ ເພື່ອສ້າງແຮງຈູງໃຈເພີ່ມຂຶ້ນກວ່າເກົ່າ ໂດຍຝຣັ່ງຫວັງວ່າຈະສາມາດຕາມທັນປະເທດຄູ່ແຂ່ງ ຄືເນເທີແລນ, ເຢຍລະມັນ ແລະ ເດນມາ ທີ່ມີຈຳນວນການນຳໃຊ້ລົດຈັກສູງໄດ້ ໂດຍສະເພາະໃນເນເທີແລນ ເຊິ່ງມີອັດຕາຂອງຜູ້ໃຊ້ລົດຈັກສູງເຖິງ 27%. ທັງນີ້ ລັດຖະບານຝຣັ່ງຕັ້ງເປົ້າວ່າ 9% ຂອງປະຊາຊົນໃນປະເທດຈະປ່ຽນມາໃຊ້ລົດຈັກພາຍໃນປີ 2024 ທຽບໃສ່ລະດັບປັດຈຸບັນຢູ່ທີ່ 3%.
ນອກຈາກນີ້, ລັດຖະບານຂອງປະທານາທິບໍດີ ເອັມມານູເອລ ມາຄຣົງ ຍັງໄດ້ໃຫ້ຄຳໝັ້ນຈະທຸ້ມເງິນລົງທຶນ 250 ລ້ານກວ່າເອີໂຣ ເພື່ອປັບສະພາບແວດລ້ອມຂອງນະຄອນຫລວງປາຣີໃຫ້ເອື້ອອຳນວຍຕໍ່ການຂີ່ລົດຖີບທົ່ວເມືອງ. ຂະນະທີ່ທ່ານ ແອນ ຮິດາລໂກ ເຈົ້າຄອງນະຄອນຫລວງປາຣີ ເຊິ່ງໄດ້ຮັບໄຊຊະນະໃນການເລືອກຕັ້ງໃນປີຜ່ານມາ ປະກາດວ່າຈະສ້າງທາງຂີ່ລົດຖີບເພີ່ມອີກ 130 ກິໂລແມັດໃນໄລຍະ 5 ປີຕໍ່ໜ້າ ຖືເປັນອີກໜຶ່ງການເຄື່ອນໄຫວທີ່ໜ້າຕິດຕາມຂອງບັນດາປະເທດໃຫຍ່ທີ່ຫັນມາໃຊ້ນະໂຍບາຍຂອງລັດຖະບານຊຸກຍູ້ໃຫ້ເກີດການປ່ຽນແປງດ້ານສິ່ງແວດລ້ອມຢ່າງເປັນຮູບປະທຳ.
