ວິກິດເສດຖະກິດບັງກະລາເທດອາດຕາມຮອຍສີລັງກາ ຫລື ບໍ່

ບັງກະລາເທດເປັນອີກໜຶ່ງໃນປະເທດເຂດອາຊີໃຕ້ທີ່ກຳລັງຜະເຊີນວິກິດເງິນທຶນສຳຮອງສາກົນຫລຸດລົງ ແລະ ຕົວເລກຂາດດູນການຄ້າເພີ່ມຂຶ້ນ ນັບແຕ່ເກີດການແພ່ລະບາດຂອງພະຍາດໂຄວິດ-19 ທີ່ເຮັດໃຫ້ເສດຖະກິດການຄ້າລະຫວ່າງປະເທດຢຸດສະງັກ ແລະ ຍັງຜະເຊີນບັນຫາລາຄານ້ຳມັນແພງຈາກສົງຄາມຣັດເຊຍບຸກອູແກຣນທີ່ຍືດເຍື້ອຍາວນານ.

ລັດຖະບານບັງກະລາເທດຕັດສິນໃຈປະກາດຂຶ້ນລາຄານ້ຳມັນເຊື້ອໄຟຄັ້ງໃຫຍ່ເຮັດໃຫ້ປະຊາຊົນພາກັນອອກມາປະທ້ວງສະແດງຄວາມບໍ່ພໍໃຈການບໍລິຫານເສດຖະກິດຂອງລັດຖະບານ ເຊັ່ນດຽວກັບການປະທ້ວງຕ້ານຂຶ້ນລາຄານ້ຳມັນທີ່ເກີດຂຶ້ນໃນປາກິດສະຖານ ແລະ ການປະທ້ວງໃຫຍ່ໃນສີລັງກາທີ່ນຳໄປສູ່ການໂຄ່ນລົ້ມລັດຖະບານຂອງທ່ານ ໂກຕາບາຢາ ຣາຊປັກສາ.

ອາທິດຜ່ານມາ, ຊາວບັງກະລາເທດອອກມາປະທ້ວງໃຫຍ່ເພື່ອສະແດງຄວາມບໍ່ພໍໃຈທີ່ລັດຖະບານປະກາດຂຶ້ນລາຄານ້ຳມັນເຊື້ອໄຟ ທັງແອັດຊັງ ແລະ ກາຊວນ 51,2% ເຮັດໃຫ້ປະຊາຊົນຕ່າງຕົກໃຈ ແລະ ຮັບບໍ່ໄດ້ຕໍ່ລາຄານ້ຳມັນທີ່ແພງຂຶ້ນ ໂດຍສະເພາະກຸ່ມຄົນທຸກຍາກ ແລະ ຄອບຄົວລາຍໄດ້ປານກາງທີ່ແບກຮັບຄ່າໃຊ້ຈ່າຍປະຈຳວັນເພີ່ມຂຶ້ນບໍ່ໄຫວ ເຮັດໃຫ້ຄົນອອກມາປະທ້ວງເພີ່ມຂຶ້ນເລື້ອຍໆ.

ກະຊວງພະລັງງານລະບຸວ່າ: ລາຄານ້ຳມັນແພງເປັນຜົນມາຈາກປັດໄຈພາຍນອກທີ່ຫລີກລ່ຽງບໍ່ໄດ້ ຄືຜົນກະທົບຈາກການສູ້ຮົບກັນລະຫວ່າງຣັດເຊຍກັບອູແກຣນ. ຂະນະທີ່ບໍລິສັດບັງກະລາເທດ ປິໂຕຣລຽມຕ້ອງຂາດທຶນ 85 ກວ່າລ້ານໂດລາສະຫະລັດ ຈາກການຂາຍນ້ຳມັນໃນໄລຍະ 6 ເດືອນຜ່ານມາຈົນຮອດເດືອນກໍລະກົດ.

ປັດໄຈພະຍາດລະບາດ ແລະ ສົງຄາມໃນອູແກຣນ ເຮັດໃຫ້ເງິນຕາກາບັງກະລາເທດ ອ່ອນຄ່າລົງຫລາຍ ໂດຍໃນໄລຍະ 3 ເດືອນຜ່ານມາ ຄ່າເງິນອ່ອນລົງໄປແລ້ວສູງເຖິງ 20% ເຮັດໃຫ້ລັດຖະບານຕ້ອງປະກາດຢຸດແຜນການລົງທຶນຂອງປະເທດອອກໄປກ່ອນ.

ຂໍ້ມູນຫລ້າສຸດລະບຸວ່າ: ບັງກະລາເທດມີເງິນທຶນສຳຮອງສາກົນຫລຸດລົງຈາກປີຜ່ານມາ 4.500 ລ້ານໂດລາສະຫະລັດ ມາຢູ່ 38.480 ລ້ານໂດລາໃນເດືອນຜ່ານມາ ຄາດວ່າຈະສາມາດນຳເຂົ້າສິນຄ້າຈຳເປັນໄດ້ອີກພຽງ 5 ເດືອນເທົ່ານັ້ນ.

ຂະນະດຽວກັນຕົວເລກຂາດດູນການຄ້າເພີ່ມສູງເປັນປະຫວັດສາດ 33.300 ລ້ານໂດລາສະຫະລັດ ໃນຮອບປີບັນຊີສິ້ນສຸດໃນເດືອນມິຖຸນາຜ່ານມາ ແລະ ຕົວເລກອັດຕາເງິນເຟີ້ເພີ່ມສູງກວ່າ 6% ຕໍ່ເນື່ອງໃນໄລຍະ 9 ເດືອນຜ່ານມາ ແລະ ເພີ່ມມາຢູ່ 7,48% ໃນເດືອນກໍລະກົດ. ນອກຈາກນີ້ ປະຊາຊົນຊາວບັງກະລາເທດຍັງຕ້ອງປະຢັດການໃຊ້ໄຟຟ້າ ເນື່ອງຈາກຄ່າໃຊ້ຈ່າຍດ້ານພະລັງງານສູງຂຶ້ນ ໂດຍລັດຖະບານບັງກະລາເທດໄດ້ອອກມາດຕະການແກ້ໄຂບັນຫາຂາດເຂີນໄຟຟ້າດ້ວຍການປະກາດປັນສ່ວນໃຊ້ໄຟ ປະກາດໃຫ້ໂບດຢຸດການເປີດແອເວລາທີ່ຄົນເຂົ້າໄປເຮັດພິທີທາງສາສະໜາ.

ຜ່ານມາ ບັງກະລາເທດເປັນໜຶ່ງໃນປະເທດທີ່ມີການເຕີບໃຫຍ່ທາງເສດຖະກິດສູງສຸດໃນອາຊີໃຕ້ ແລະ ໃນເດືອນພະຈິກປີຜ່ານມາ ອົງການສະຫະປະຊາຊາດຕັດບັງກະລາເທດອອກຈາກບັນຊີລາຍຊື່ກຸ່ມປະເທດທີ່ມີການພັດທະນານ້ອຍທີ່ສຸດໃນໂລກ. ເຖິງຢ່າງໃດກໍຕາມ, ບັງກະລາເທດກໍໄດ້ຮັບຜົນກະທົບຢ່າງໜັກຈາກປັດໄຈບັນຫາຕ່າງໆຂອງໂລກ ທັງພະຍາດລະບາດ ແລະ ສົງຄາມອູແກຣນ ທີ່ເຮັດໃຫ້ອາຫານ ແລະ ເຊື້ອໄຟໃນຕະຫລາດໂລກມີລາຄາແພງຂຶ້ນ ເຮັດໃຫ້ລັດຖະບານຕ້ອງຊອກຫາການຊ່ວຍເຫລືອຈາກຕ່າງປະເທດ ລວມທັງການສົ່ງໜັງສືເຈລະຈາຂໍການຊ່ວຍເຫລືອສະຖາບັນການເງິນໃຫຍ່ຂອງໂລກ ຄືກອງທຶນການເງິນສາກົນ (International Monetary Fund) ໂດຍການຂໍກູ້ເງິນ 4.500 ລ້ານໂດລາ ເຊິ່ງບັງກະລາເທດເປັນປະເທດຫລ້າສຸດໃນອາຊີໃຕ້ ຕໍ່ຈາກສີລັງກາ ແລະ ປາກິດສະຖານ ທີ່ຂໍກູ້ເງິນຈາກ IMF ເພື່ອຈະເອົາມາແກ້ໄຂບັນຫາວິກິດໃນປະເທດ. ນອກຈາກນີ້ ລັດຖະບານສີລັງກາຍັງຍື່ນຂໍເງິນກູ້ແຫ່ງລະ 1.000 ລ້ານໂດລາ ຈາກທະນາຄານເພື່ອການພັດທະນາອາຊີ (Asian Development Bank) ແລະ ທະນາຄານໂລກ (World Bank) ມາຊ່ວຍບັນເທົາສະພາບເສດຖະກິດຂອງປະເທດໃນຂະນະທີ່ເງິນທຶນສຳຮອງຫລຸດລົງຫລາຍ.