ເຫຼົ່າຮົບຊ່າງແສງກອງທັບປະຊາຊົນລາວ ສາມາດຍາດໄດ້ທີ 3 ໃນການແຂ່ງຂັນກິລາ ARMY GAMES 2022 ທີ່ຣັດເຊຍ

ວັນທີ 21 ສິງຫາ 2022ນີ, ຄະນະກຳມະການຈັດການແຂ່ງຂັນ ກິລາການທະຫານສາກົນ ຂອງເຫຼົ່າຮົບຊ່າງແສງ ໄດ້ຈັດພິທີສະຫຼຸບປິດການແຂ່ງຂັນ ກິລາ (ARMY GAMES 2022) ຢູ່ທີ່ກອງພົນນ້ອຍຊ່າງແສງ 73420 ຂອງເມືອງໂວນກາກຼາດ, ແຫ່ງສະຫະພັນຣັດເຊຍ (ໃນຮູບແບບຊ່າງແສງ ) ໂດຍການເຂົ້າຮ່ວມເປັນປະທານ ທ່ານ ພັນເອກ ກຣູກະລົບ ອັນເດຣ ອາເລັກເຊວິດ ຮອງຫົວໜ້າກົມຊ່າງແສງ ສະຫະພັນຣັດເຊຍ. ສວນທີມນັກກິລາເຫຼົ່າຮົບຊ່າງແສງກອງທັບປະຊາຊົນລາວ ມີສະຫາຍ ພັນເອກ ບຸນທະວີ ໂພໄຊ ຮອງຫົວໜ້າກົມຊ່າງແສງ ຫົວໜ້າ ຄະນະຊີ້ນຳທິມນັກກິລາ ເຫຼົ່າຮົບຊ່າງແສງ ກອງທັບປະຊາຊົນລາວ. ມີບັນດາ ຄະນະຮັບຜິດຊອບຊີ້ນຳທີມນັກກິລາ, ອະນຸກຳມະການ ພ້ອມດ້ວຍ ນັກກິລາແຕ່ລະປະເທດເຂົ້າຮ່ວມ.

ສຳລັບເຂົ້າຮ່ວມແຂ່ງຂັນກິລາ ການທະຫານສາກົນ (ARMY GAME 2022 ) (ໃນຮູບແບບຊ່າງແສງ) ຂອງເຫຼົ່າຮົບຊ່າງແສງ ໃນຄັ້ງນີ້ປະກອບມີ 5 ປະເທດ ເຂົ້າຮ່ວມຄື: ຣັດເຊຍ, ລາວ, ອຸສເບກີສະຖານ, ເບລາຣຸດ ແລະ ອາຣເມເນຍ. ສຳລັບທີມນັກກິລາເຫຼົ່າຮົບຊ່າງແສງ ກອງທັບປະຊາຊົນລາວເຮົາແມ່ນຈົກສະຫຼາກໄດ້ ເບີ 2 ປະກອບມີ ລົດດຸດ, ລົດຂຸດຂຸມຄອງ, ລົດສ້າງສິ່ງກີດຂວາງແຕກ, ລົດສ້າງສິ່ງກີດຂວາງບໍ່ແຕກ,ລົດທຳລາຍສະໜາມມິນ, ລົດລອຍນ້ຳ ແລະ ລົດສ້າງສະໜາມມິນ ມີຈຳນວນພົນນັກກກິລາເຂົ້າຮ່ວມຈຳນວນ 21 ສະຫາຍ ເຊິ່ງໄດ້ເລີ່ມການຝຶກຊ້ອມມາແຕ່ວັນ 8 – 21 ສິງຫາ 2022 ແມ່ນໄດ້ຈັດການແຂ່ງຂັນ ພ້ອມທັງຫຼຸບຜົນການແຂ່ງຂັນ ເຊິ່ງຜົນການແຂ່ງຂັນ ທີ l ສະຫະພັນຣັດເຊຍ,ທີ່ ll ເບລາຣຸດ ແລະ ທີ lll ກອງທັບປະຊາຊົນລາວ.

ການເຂົ້າຮ່ວມແຂ່ງຂັນກິລາການທະຫານສາກົນ (ARMY GAME 2022) ແມ່ນມີຄວາມໝາຍ-ຄວາມສຳຄັນທີ່ສຸດ ທັງເປັນການ ສ້າງສາຍພົວພັນ ມິດຕະພາບ ຮັດແໜ້ນຄວາມສາມັກຄີກັບບັນດາປະເທດ ທີ່ເຂົ້າຮ່ວມໂດຍສະເພາະ ແມ່ນເພື່ອຍົກສູງສາຍພົວພັນ ມິດຕະພາບ ລະຫວ່າງ ກອງທັບ ປະຊາຊົນລາວ ກັບ ກອງທັບ ສ.ລັດເຊຍ ແລະ ປະເທດເພື່ອນມິດ ທັງເປັນການຖອດຖອນບົດຮຽນໃນວຽກງານວິຊາສະເພາະເຫຼົ່າຮົບຊ່າງແສງໃຫ້ນັບມື້ເຕີບໃຫ່ຍ, ເຂັ້ມແຂງທັນສະໄໝເທື່ອລະກ້າວ.

ຂ່າວ: ວິທະຍຸກະຈາຍສຽງແຫ່ງຊາດ