ແມນຢູ ຢືນຢັນ ປ່ອຍ ໄບຢີ ໄປຢູ່ກັບ ມາກເຊ ດ້ວຍສັນຍາຢືມຕົວ

ແມນເຊສເຕີ ຢູໄນເຕັດ ທີມດັງແຫ່ງພຣີເມຍລີກ ອັງກິດ ຕົກລົງປ່ອຍ ເອຣິກ ໄບຢີ ກອງຫລັງທີມຊາດໄອວໍຣີໂຄສ ໄປຫລິ້ນໃຫ້ ໂອລິມປິກ ມາກເຊ ທີມເກັ່ງຂອງຝຣັ່ງ ດ້ວຍສັນຍາຢືມຕົວແລ້ວ.

ໄບຢີ ຕົກເປັນຕົວເລືອກລຳດັບທ້າຍໆໃນຕຳແຫນ່ງກອງຫລັງຂອງແມນຢູ ດ້ວຍເຫດຜົນນີ້ ເທນ ຮາກ ຜູ້ຈັດການທີມ ຈ່ຶງຍອມເປີດທາງໃຫ້ລາວຍ້າຍໄປຢູ່ກັບ ມາກເຊ ດ້ວຍສັນຍາຢືມຕົວ ພ້ອມເງື່ອນໄຂຊື້ຂາດດ້ວຍລາຄາ 8,5 ລ້ານປອນ ເພື່ອໂອກາດທີ່ຈະໄດ້ລົງຫລິ້ນຫລາຍຂຶ້ນ.

ເວລານີ້ ມາກເຊ ຢູ່ລະຫວ່າງການເຈລະຈາເລື່ອງສັນຍາສ່ວນຕົວກັບ ໄບຢີ ເຊິ່ງຄາດວ່າ ໜ້າຈະຕົກລົງກັນໄດ້ພາຍໃນອາທິດນີ້ ເນື່ອງຈາກນັກເຕະອາຍຸ 28 ປີ ກໍຢາກຍ້າຍໜີຝັນຮ້າຍຈາກແມນຢູ ເຊັ່ນດຽວກັນ.