ເຕືອນໄພ ! ຢ່າຫລົງເຊື່ອກຸ່ມຫລອກລວງຕັ້ງເພຈປອມເປັນສະຖາບັນການເງິນປ່ອຍເງິນກູ້ ດອກເບ້ຍຕ່ຳ ຕົວະເອົາເງິນຄ່າທຳນຽມ

ການສ້າງເພຈປອມເປັນສະຖາບັນການເງິນປ່ອຍສິນເຊື່ອໂດຍດອກເບ້ຍຕ່ຳສ້າງຄວາມຈູງໃຈໃຫ້ຜູ້ທີ່ເດືອດຮ້ອນມີຄວາມຈຳເປັນຕ້ອງໃຊ້ເງິນເພື່ອແກ້ໄຂຄວາມຫຍຸ້ງຍາກຂອງຊີວິດ ຊ້ຳພັດມາຕົກຫລຸມກົນໂກງຂອງຄົນບໍ່ດີ ຈາກທີ່ຈົນຢູ່ແລ້ວພັດມາຈົນເພີ່ມ ຍ້ອນຫລົງເຊື່ອກົນອຸບາຍທີ່ພວກເຂົາອຸປະໂຫລກຂຶ້ນມາ.

ວິທີການຂອງຄົນກຸ່ມນີ້ແມ່ນຕົວະໃຫ້ຜູ້ທີ່ສົນໃຈຈະກູ້ເງິນຕ້ອງປະກອບເອກະສານເພື່ອຂໍກູ້ເງິນແລ້ວສົ່ງໄປໃຫ້ສະຖານບັນທີ່ເຂົາສ້າງຂຶ້ນມາ (ບໍ່ມີຕົວຕົນຢູ່ຈິງ) ແລ້ວແນະນຳວິທີການຄື: ທ່ານສາມາດກູ້ໄດ້ສູງສຸດ 20 ລ້ານກີບ ດອກ 0.5% ຕໍ່ເດືອນ ສາມາດຜ່ອນຍາວເຖິງ 24 ເດືອນ ຫາກມີຄົນຕິດກັບດັກກໍຈະຂໍຂໍ້ມູນສ່ວນຕົວທີ່ສຳຄັນເຊັ່ນ ຊື່, ທີ່ຢູ່, ບັດປະຈຳຕົວ ແລະ ບັນຊີ ຫລັງຈາກນັ້ນກໍຖ້າກວດສອບພາຍໃນ 15 ນາທີ ເມື່ອກວດສຳເລັດກໍຈະໄດ້ເສຍເງິນຄ່າທຳນຽມອະນຸມັດການປ່ອຍກູ້ເລີ່ມຕົ້ນແຕ່ 3 ແສນ ຫາ 1 ລ້ານກີບ.

ການສໍ້ໂກງນີ້ແມ່ນໃຊ້ຮູບການຕົວະເອົາເງິນຄ່າອະນຸມັດໃນການປ່ອຍກູ້ ເມື່ອຜູ້ກູ້ຫລົງເຊື່ອແລ້ວໂອນເງິນຄ່າອະນຸມັດເອກະສານແລ້ວຫລັງຈາກນັ້ນກໍຈະມິດຈ້ອຍໄປເລີຍ.

ດັ່ງນັ້ນ, ເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີເຫລົ່ານັ້ນ ຜູ້ໃຊ້ສື່ສັງຄົມອອນລາຍຕ້ອງມີສະຕິລັະມັດລະວັງຕົວສູງ ໂດຍການບໍ່ຫລົງເຊື່ອສິ່ງທີ່ລໍ້ລວງໄດ້ງ່າຍເຊັ່ນ ການສະເໜີໃຫ້ເງິນຈຳນວນຫລາຍ, ດອກເບຍເງິນຝາກສູງ, ດອກເບ້ຍເງິນກູ້ຕໍ່າ, ການໂພສຂາຍສິນຄ້າລາຄາຖືກ ແລະ ອື່ນໆ ທີ່ເຫັນວ່າບໍ່ສອດຄ່ອງກັບຄວາມເປັນຈິງ.