Sexual Harassment ແມ່ນຫຍັງ?
Sexual Harassment ຫລື ການຄຸກຄາມທາງເພດ ມັກພົບເຫັນໄດ້ຫລາຍໃນສັງຄົມ ໂດຍສະເພາະອົງກອນຕ່າງໆ, ໂຮງຮຽນ ຫລື ສະຖານທີ່ ທີ່ມີຜູ້ມີອໍານາດມັກຈະໃຊ້ຊ່ອງວ່າງນີ້ເອົາປຽບຜູ້ທີ່ໃຕ້ບັງຄັບບັນຊາ. Sexual Harassment ປຽບເໝືອນອາດຊະຍາກໍາຮູບແບບໜຶ່ງ ທັງທາງກົງ ແລະ ທາງອ້ອມ ທີ່ສາມາດເກີດຂຶ້ນໄດ້ກັບຜູ້ຊາຍ ແລະ ຜູ້ຍິງ ຫລື ເພດທາງເລືອກ. ດັ່ງນັ້ນ, ເຮົາທຸກຄົນຄວນເຂົ້າໃຈຕໍ່ການຄຸກຄາມທາງເພດ ແລະ ຮຽນຮູ້ວິທີປ້ອງກັນຕົນເອງເພື່ອບໍ່ໃຫ້ຕົກເປັນເປົ້າໝາຍຂອງການຄຸກຄາມທາງເພດ.
ແບບໃດທີ່ເອີ້ນວ່າ Sexual harassment ?
Sexual harassment ແມ່ນການກະທໍາທີ່ມີເຈດຕະນາບໍ່ດີຕໍ່ເພດກົງກັນຂ້າມ ຫລື ເພດດຽວກັນເພື່ອຜົນປະໂຫຍດໃນການຮ່ວມເພດ ທີ່ບໍ່ໄດ້ຮັບການຍິນຍອມຈາກອີກຝ່າຍ ເຊິ່ງການກະທໍາດັ່ງກ່າວອາດຢູ່ໃນຮູບແບບຫລາຍປະເພດດັ່ງນີ້:
- ການສະແດງອອກທາງຄໍາເວົ້າ (Verbal Conduct) ເຊັ່ນ ເວົ້າຈາລ່ວງເກີນ, ເວົ້າກ່ຽວກັບເລື່ອງເພດ, ເວົ້າເລື່ອງເພດເປັນເລື່ອງຕະຫລົກ, ເວົ້າເຖິງຮ່າງກາຍ ເປັນຕົ້ນ.
- ກິລິຍາທ່າທາງ ຫລື ການຄຸກຄາມທາງສາຍຕາ (Visual Conduct) ເຊັ່ນ ການແນມສ່ວນຕ່າງໆຂອງຮ່າງກາຍ, ການໃຊ້ທ່າທາງ ເປັນຕົ້ນ.
- ການສໍາຜັດຮ່າງກາຍ (Physical conduct) ເຊັ່ນ ພະຍາຍາມໃກ້ຊິດໂດຍບໍ່ຈໍາເປັນ, ຈັບສ່ວນຕ່າງໆຂອງຮ່າງກາຍ, ກອດ ເຫລົ່ານີ້ເປັນຕົ້ນ.
- ການສົ່ງຂໍ້ຄວາມໃນທາງອະນາຈານ (Written Conduct) ເຊັ່ນ ຂຽນຂໍ້ຄວາມ ຫລື ສົ່ງຂໍ້ຄວາມໄປໃນທາງລາມົກ, ການສົ່ງຮູບພາບວາບຫວິວ, ສົ່ງຮູບພາບຮ່າງກາຍ ຫລື ອະໄວຍະວະເພດໃຫ້ຜູ້ອື່ນ.
- ການລັກຖ່າຍຮູບ ຫລື ຄິບ ຂອງຜູ້ຖືກກະທໍາໃນລັກສະນະລາມົກຕາມສະຖານທີ່ຕ່າງໆ.
ຈະເຮັດແນວໃດເມື່ອຖືກຄຸກຄາມທາງເພດ ?
– ຢ່າເພີກເສີຍ, ຮຽນຮູ້ທີ່ຈະປະຕິເສດໂດຍການສະແດງອອກວ່າເຮົາບໍ່ຍິນຍອມ ແລະ ອອກຫ່າງຈາກບຸກຄົນນັ້ນ.
– ສົ່ງສຽງຮ້ອງໃຫ້ຄົນອ້ອມຂ້າງ ຫລື ຄົນທີ່ຢູ່ໃກ້ຄຽງຊ່ວຍເຫລືອ.
– ບັນທຶກເຫດການເພື່ອເປັນຫລັກຖານ, ເມື່ອຕົກຢູ່ໃນສະຖານະການທີ່ຖືກຄຸກຄາມ ຄວນຕັ້ງສະຕິ ແລະ ຫາທາງບັນທຶກສຽງ ຫລື ວີດີໂອໄວ້, ຖ້າເປັນກໍລະນີທີ່ເປັນຂໍ້ຄວາມ ຄວນບັນທຶກພາບຂໍ້ຄວາມນັ້ນໄວ້, ຈົດບັນທຶກ, ເວລາ, ສະຖານທີ່ເກີດເຫດ, ບັນຍາກາດເຫດການ, ຊື່ຜູ້ກະທໍາ ແລະ ພະຍານທີ່ຢູ່ບໍລິເວນນັ້ນ.
– ລາຍງານບັນຫາ ຜູ້ຖືກກະທໍາຄວນຮີບແຈ້ງ ຫລື ເລົ່າສິ່ງທີ່ເກີດຂຶ້ນກັບຜູ້ທີ່ໄວ້ໃຈຮູ້ທັນທີ ແລະ ລາຍງານບັນຫາທີ່ເກີດຂຶ້ນໃຫ້ຜູ້ທີ່ມີອໍານາດເໜືອກວ່າ ຫລື ໜ່ວຍງານທີ່ກ່ຽວຂ້ອງ.
ບັນຫາ Sexual harassment ບໍ່ແມ່ນເລື່ອງສ່ວນຕົວ ແລະ ບໍ່ແມ່ນສິ່ງໄກຕົວ ຫາກຄົນໃນສັງຄົມບໍ່ປ່ຽນຄວາມຄິດ ຫລື ບໍ່ປູກຝັງໃຫ້ຄົນມີຈິດສໍານຶກ ແລະ ໃຫ້ກຽດທຸກຄົນຢ່າງເທົ່າທຽມກັນ ບັນຫາເຫລົ່ານີ້ອາດຈະເກີດຂຶ້ນກັບລູກຫລານຂອງເຮົາ ແລະ ຈະເພີ່ມທະວີຄວາມຮຸນແຮງຂຶ້ນໃນອະນາຄົດ. ສິ່ງທີ່ສໍາຄັນທີ່ທຸກຄົນຄວນເຂົ້າໃຈ ການຄຸກຄາມທາງເພດບໍ່ພຽງແຕ່ເກີດຂຶ້ນກັບຜູ້ຍິງ, ແຕ່ຍັງເກີດຂຶ້ນກັບຜູ້ຊາຍ ແລະ ກຸ່ມຄົນ LGBTQ ອີກດ້ວຍ. ແລະ ມັນສາມາດເກີດຂຶ້ນໄດ້ກັບທຸກເພດທຸກໄວ.
