CDC ອາເມລິກາ ປະກາດປະຕິຮູບອົງກອນຄັ້ງໃຫຍ່ ຫລັງລົ້ມເຫລວຮັບມືໂຄວິດ
ທ່ານ ດຣ. ໂຣເຊລ ວາເລນສກີ ຜູ້ອຳນວຍການສູນຄວບຄຸມພະຍາດຕິດຕໍ່ອາເມລິກາ (Centers for Disease Control and Prevention: CDC) ປະກາດຕໍ່ເຈົ້າໜ້າທີ່ຂອງໜ່ວຍງານໃນວັນທີ 17 ສິງຫາ ກ່ຽວກັບແຜນປະຕິຮູບອົງກອນຄັ້ງໃຫຍ່ ໂດຍຊີ້ເຖິງສາເຫດຈາກຄວາມລົ້ມເຫລວໃນການຮັບມືໂຄວິດ ແລະ ຄວາມຈຳເປັນເພື່ອເຮັດໃຫ້ການເຮັດວຽກມີຄວາມຄ່ອງຕົວ ແລະ ວ່ອງໄວຂຶ້ນ.
ໂດຍທ່ານ ດຣ. ວາເລນສກີ ເອີ້ນແຜນປະຕິຮູບ CDC ຄັ້ງນີ້ວ່າ: ການ “Reset” ຫລື “ເລີ່ມຕົ້ນໃໝ່” ເຊິ່ງມີຂຶ້ນຫລັງຈາກອົງກອນຜະເຊີນກະແສວິພາກວິຈານຢ່າງໜັກກ່ຽວກັບຄວາມລົ້ມເຫລວໃນການຮັບມືການແພ່ລະບາດຂອງໂຄວິດ, ໝາກສຸກລີງ ແລະ ໄພຄຸກຄາມທາງສາທາລະນະສຸກອື່ນໆ ເຊິ່ງລາຍລະອຽດການປະຕິຮູບອົງກອນຈະລວມທັງການຍົກຍ້າຍພະນັກງານພາຍໃນ ແລະ ການເພີ່ມຄວາມໄວໃນການເຜີຍແພ່ຂໍ້ມູນ.
ຂະນະທີ່ທ່ານຊີ້ວ່າ: ການປະຕິຮູບອົງກອນດັ່ງກ່າວເປັນຂໍ້ລິເລີ່ມຂອງ CDC ແລະ ບໍ່ໄດ້ຖືກສັ່ງການຈາກທຳນຽບຂາວ ຫລື ໜ່ວຍງານລັດຖະບານອື່ນໆ.
ຂະນະທີ່ CDC ເຊິ່ງໄດ້ງົບປະມານສະໜັບສະໜູນຫລາຍກວ່າ 1,2 ໝື່ນລ້ານໂດລາສະຫະລັດ ແລະ ມີເຈົ້າໜ້າທີ່ຫລາຍກວ່າ 11.000 ຄົນ ມີໜ້າທີ່ໃນການປົກປ້ອງຊາວອາເມລິກາຈາກພະຍາດລະບາດ ແລະ ໄພຄຸກຄາມທາງສາທາລະນະສຸກຕ່າງໆ.
ເຊິ່ງການປັບປຸງອົງກອນນັ້ນຖືເປັນເລື່ອງປົກກະຕິຂອງຜູ້ອຳນວຍການ CDC, ແຕ່ການເຄື່ອນໄຫວໃນຄັ້ງນີ້ເກີດຂຶ້ນທ່າມກາງກະແສຮຽກຮ້ອງຢ່າງກວ້າງຂວາງຈາກປະຊາຊົນທີ່ຕ້ອງການໃຫ້ເກີດການປ່ຽນແປງ.
ໂດຍຜ່ານມາ CDC ຖືກວິຈານວ່າເປັນໜ່ວຍງານທີ່ອ່ອນແອ ແລະ ຊັກຊ້າ ແລະ ເນັ້ນການເຮັດວຽກໃສ່ການເກັບລວມລວມຂໍ້ມູນຜົນວິເຄາະ ແຕ່ພັດບໍ່ດຳເນີນງານຢ່າງວ່ອງໄວໃນການຮັບມືໄພຄຸກຄາມທາງສາທາລະນະສຸກໃໝ່ໆ.
ທັງນີ້, ກະແສວິພາກວິຈານໃນແງ່ລົບ ແລະ ຄວາມບໍ່ພໍໃຈຂອງປະຊາຊົນອາເມລິກາທີ່ມີຕໍ່ CDC ນັ້ນເພິີ່ມຂຶ້ນຫລາຍໃນໄລຍະການແພ່ລະບາດຂອງໂຄວິດ.
ໂດຍຜູ້ຊ່ຽວຊານຫລາຍຄົນເບິ່ງວ່າ: CDC ນັ້ນຊັກຊ້າ ທັງເລື່ອງການຍອມຮັບກໍລະນີການແພ່ລະບາດຂອງໂຄວິດຈາກເອີຣົບເຂົ້າສູ່ອາເມລິກາ ແລະ ການແນະນຳໃຫ້ປະຊາຊົນໃສ່ຜ້າປິດປາກ ລວມທັງການແຈ້ງເຕືອນປະຊາຊົນວ່າໄວຣັສສາມາດແພ່ກະຈາຍໄດ້ໃນອາກາດ ຕະຫລອດຈົນການເພີ່ມການທົດລອງຢ່າງເປັນລະບົບສຳລັບເຊື້ອໂຄວິດສາຍພັນໃໝ່ຕ່າງໆ.
