ແອນເດີເຊັນ ເປີດເຜີຍຖືກສົ່ງຂໍ້ຄວາມຂູ່ຂ້າຫລັງມີສ່ວນເຮັດ ນູນເຢສ ຖືກໃບແດງ

ໂຢອາຄິມ ແອນເດີເຊັນ ກອງຫລັງ ຂອງ ຄຣິສຕັລ ພາເລດ ເປີດເຜີຍວ່າຕົນເອງໄດ້ຮັບຂໍ້ຄວາມດ່າ ລວມເຖິງຂູ່ຂ້າຫລາຍກວ່າ 300-400 ຂໍ້ຄວາມ ຫລັງຕົນເອງມີສ່ວນເຮັດໃຫ້ ດາວິນ ນູນເຢສ ກອງໜ້າ ລີເວີພູລ ຖືກໃບແດງ.

ໂດຍ ແອນເດີເຊັນ ແລະ ນູນເຢສ ມີການກະທົບກະເທືອນກັນຕະຫລອດໃນເກມທີ່ ລີເວີພູລ ເປີດສະໜາມ ແອນຟິລ ພົບກັບ ຄຣິສຕັລ ພາເລດ ພຣີເມຍລີກ ອັງກິດ ເມື່ອວັນທີ 16 ສິງຫາຜ່ານມາ.

ຈົນຫລ້າສຸດໃນນາທີທີ 57 ນູນເຢສ ໃຊ້ຫົວຕຳໃສ່ໃບໜ້າ ແອນເດີເຊັນ ເຊິ່ງຜູ້ຕັດສິນແຈກໃບແດງໄລ່ດາວຍິງທີມຊາດອຸຣຸໄກວ ອອກຈາກສະໜາມທັນທີ ແລະ ລີເວີພູລ ຕ້ອງເຫລືອນັກເຕະ 10 ຄົນ ແລະ ຕາມຫລັງ 0-1.

ຈົນສຸດທ້າຍແລ້ວ ລີເວີພູລ ມາໄດ້ ຫລຸຍ ດີອາສ ຍິງປະຕູຕີສະເໝີເປັນ 1-1 ໃນນາທີທີ 61 ກ່ອນຈະຈົບລົງດ້ວຍປະຕູດັ່ງກ່າວ ແຕ່ ຈາກໃບແດງທີ່ເກີດຂຶ້ນເຮັດໃຫ້ ນູນເຢສ ຈະຖືກລົງໂທດຫ້າມລົງຫລິ້ນຈຳນວນ 3 ນັດ ເລີ່ມຈາກເກມບຸກໄປຢາມ ແມນເຊສເຕີ ຢູໄນເຕັດ ໃນເສິກແດງເດືອດອາທິດໜ້າ.

ຫລ້າສຸດ ແອນເດີເຊັນ ໄດ້ອອກມາເປີດເຜີຍຜ່ານອິນສະຕາແກຣມສ່ວນຕົນວ່າ ລາວຖືກແຟນບານສົ່ງຂໍ້ຄວາມຜ່ານ ສື່ສັງຄົມອອນລາຍເຖິງ 400 ຂໍ້ຄວາມມາດ່າ ລວມເຖິງຂູ່ຂ້າຕົນເອງ ແລະ ຄອບຄົວ ນຳອີກ.

‘‘  ເມື່ອຄືນຂ້ອຍໄດ້ຮັບຂໍ້ຄວາມເຫລົ່ານີ້ປະມານ 300-400 ຂໍ້ຄວາມ ຂ້ອຍເຂົ້າໃຈວ່າເຈົ້າສະໜັບສະໜູນທີມ ແຕ່ໃຫ້ຄວາມເຄົາລົບ ແລະ ເຮັດຕົວຮຸນແຮງໃນໂລກອອນລາຍ ຫວັງວ່າ ອິນສະຕາແກຣມ ແລະ ພຣີເມຍລີກ ຈະເຮັດບາງຢ່າງກ່ຽວກັບເລື່ອງນີ້ ’’.