ແຟນບານ ເຊລຊີ  ສ້າງກິດຈະກຳຫ້າມ ແອນໂທນີ ເທເລີ ລົງຕັດສິນໃຫ້ທີມອີກ

ແຟນບານ ເຊລຊີ ສ້າງກິດຈະກຳຫ້າມ ແອນໂທນີ ເທເລີ ລົງຕັດສິນໃນເກມທີ່ທີມລົງສະໜາມອີກ ຫລັງເບິ່ງວ່າລາວເຮັດໜ້າທີ່ຜິດ ພາດຫລາຍຈັງຫວະໃນເກມສະເຫມີ ສະເປີ 2-2 ເຊິ່ງປັດຈຸບັນມີຜູ້ຮ່ວມລົງຊື່ແລ້ວກວ່າ 67,000 ຄົນ.

ແນວໃດກໍຕາມໃນເກມດັ່ງກ່າວມີຈັງຫວະຄາໃຈຫລາຍຄັ້ງ ທີ່ ເທເລີ ບໍ່ຍອມເປ່ົາໄຫມໃຫ້ເຈົ້າຖິ່ນ ເຊິ່ງນຳໄປສູ່ການເສຍປະຕູທັງ 2 ໜ່ວຍ ເລີ່ມຈາກປະຕູທຳອິດທີ່ ໄຄ ຮາແວດ ຖືກ ໂຣດຣີໂກ ເບນຕານກູ ເຮັດບານໄຫມກ່ອນ ລວມເຖິງ ຣິຊາດລີຊອນ ທີ່ຢືນຢູ່ໃນ ຕຳແໜ່ງລຳ້ໜ້າ ແລະ ບົດບັງການເບິ່ງເຫັນຂອງ ເອດູອາ ເມນດີ ເຮັດໃຫ້ເຫັນລູກຍິງໄກຂອງ ປີແອ ເອມິລ ຮອຍເບີກ ບໍ່ຈະແຈ້ງ.

ຂະນະທີ່ປະຕູທີ 2 ກໍມີຈັງຫວະທີ່ ຄຣິສຕຽນ ໂຣເມໂຣ ໄປດຶງຜົມ ມາກ ກູກູເຣຢາ ໃນເຂດໂທດແບບຈະແຈ້ງ ແຕ່ກຳມະການກໍ ບໍ່ໄດ້ເບິ່ງວ່າເປັນການໄຫມ ກ່ອນ ແຮຣີ ເຄນ ຈະຂຶ້ນຫົວຕຳເປັນປະຕູຕີສະເຫມີໃນນາທີທີ 90+6.

ຈາກເຫດການທີ່ເກີດຂຶ້ນ ລວມເຖິງໃນຫລາຍເກມກ່ອນໜ້ານີ້ທີ່ເບິ່ງຄືວ່າ ເທເລີ ຈະຕັດສິນບໍ່ເປັນທຳກັບ ເຊລຊີ ສົ່ງຜົນໃຫ້ ຫລ້າສຸດ ແຟນບານ ເຊລຊີ ທີ່ມີຊື່ວ່າ CFC DUUBois ໄດ້ເກີດແນວຄິດໃນເວັບໄຊ change.org ໃນການຫ້າມບໍ່ໃຫ້ກຳມະການ ດັ່ງກ່າວລົງຕັດສິນໃນເກມທີ່ທີມຮັກຂອງພວກເຂົາລົງແຂ່ງຂັນອີກ.

ໂດຍປັດຈຸບັນມີຜູ້ຮ່ວມລົງຊື່ໃນກິດຈະກຳດັ່ງກ່າວໄປແລ້ວຫລາຍເຖິງ 67,123 ຄົນ.