ເມືອງຊຽງຮ່ອນ ແຂວງໄຊຍະບູລີ 244 ຄອບຄົວ ແລະ ເນື້ອທີ່ທໍາການຜະລິດເສຍຫາຍ 600 ກວ່າເຮັກຕາ

ໃນວັນທີ 14 ສິງຫາ 2022 ນີ້ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ ໄດ້ລົງຕິດຕາມສະພາບຜົນກະທົບຈາກໄພນໍ້າຖ້ວມຢູ່ເມືອງຊຽງຮ່ອນໃນຄັ້ງວັນທີ11-12ສິງຫາ 2022, ໂດຍການຕ້ອນຮັບຂອງທ່ານ ກົງທອງ ສິດທິໄຊ ເຈົ້າເມືອງຯຊຽງຮ່ອນພ້ອມດ້ວຍຄະນະນໍາຂັ້ນເມືອງ.

ທ່ານ ກົງທອງ ສິດທິໄຊ ເຈົ້າເມືອງໆຊຽງຮ່ອນ ໄດ້ລາຍງານສະພາບການທີ່ເກີດຂື້ນວ່າ: ໄພນ້ຳຖ້ວມຄັ້ງນີ້ໄດ້ສ້າງຄວາມເສຍຫາຍໃຫ້ປະຊາຊົນ ຈໍານວນ 244 ຄອບຄົວ, ເຮືອນເສຍຫາຍ 4 ຫລັງ ຖືກນໍ້າພັດໄຫລສູນຫາຍ 1 ຫລັງ,ໂຮງຮຽນ 1 ຫລັງ, ເນື້ອທີ່ທໍາການຜະລິດເສຍຫາຍ 600 ກວ່າເຮັກຕາ, ເນື້ອທີ່ສວນຢາງພາລາ 2,5 ເຮັກຕາ, ມີສັດລ້ຽງຕາຍ ປະເພດງົວ21 ໂຕ,ໄກ່ ແລະ ເປັດ 790ໂຕ, ລົດໄຖນາ 2 ຄັນ, ລົດຈັກ13ຄັນ, ໜອງປາ 43 ໜອງ, ເຂົ້າເປືອກເສຍຫາຍ 789 ເປົາ, ເຂົ້າສານເສຍຫາຍ 231 ເປົາ, ຊົນລະປະທານຫລາຍແຫ່ງໄດ້ຮັບຜົນເສຍຫາຍ, ດິນເຈື່ອນທັບຖົມທາງ, ນໍ້າເຊາະເສັ້ນທາງ ເສັ້ນທາງລະຫວ່າເມືອງ ຊຽງຮ່ອນ-ເມືອງເງິນຖືກຕັດຂາດ ນອກນີ້ຍັງເຮັດໃຫ້ຊັບສິນ, ເຄື່ອງໃຊ້ໃນຄົວເຮືອນຂອງປະຊາຊົນເສຍຫາຍເປັນຈຳນວນຫລວງຫລາຍ ໃນການລົງຕິດຕາມສະພາບນໍ້າຖ້ວມໃນຄັ້ງນີ້ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ມອບເງິນຈໍານວນ 100,000,000 ກີບ ໃຫ້ການນໍາຂອງເມືອງເພື່ອນໍາໄປຟື້ນຟູບູລະນະພື້ນຖານໂຄງລ່າງຕ່າງໆທີ່ໄດ້ຮັບຜົນກະທົບ ຈາກໄພພິບັດທາງທໍາມະຊາດ ແລະ ທ່ານຍັງໄດ້ເໜັ້ນໜັກໃຫ້ອົງການປົກຄອງເມືອງຈົ່ງເອົາໃຈໃສ່ ຟື້ນຟູຈິດໃຈຜູ້ທີ່ໄດ້ຮັບຜົນກະທົບ ແລະ ຟື້ນຟູອາຄານສະຖານທີ່ຕ່າງໆໃຫ້ຜູ້ປະສົບໄພໃຫ້ກັບມາໃຊ້ຊີວິດເປັນປົກກະຕິ.