ມາກເຊ ສົນໃຈຄວ້າ ເອຣິກ ໄບຢີ ເສີມກອງຫລັງ

‘‘ ເລີກິບ ’’ ສື່ໃນຝຣັ່ງ ລາຍງານວ່າ ໂອລິມປິກ ມາກເຊ ທີມດັງຈາກ  ລີກ ເອິງ ຝຣັ່ງ ພວມໃຫ້ຄວາມສົນໃຈທີ່ຈະຄວ້າ ເອຣິກ ໄບຢີ ກອງຫລັງຂອງ ແມນເຊສເຕີ ຢູໄນເຕັດ.

ກ່ອນໜ້ານີ້ ເອຣິກ ໄບຢີ ສ້າງຜົນງານໄດ້ໜ້າປະທັບໃຈກັບທີມແມນຢູໃນໄລຍະອຸ່ນເຄື່ອງກ່ອນເປີດລະດູການ ແນວໃດກໍຕາມ ເມື່ອເປີດສາກນັກທຳອິດຂອງລະດູການ ເອຣິກ ເທນ ຮາກ ຜູ້ຈັດການທີມ ຍັງບໍ່ໄດ້ເລືອກລາວເປັນຕົວຈິງ ໂດຍສົ່ງ ລິຊານໂດຣ ມາຕີເນສ ຈັບຄູ່ກັບ ແຮຣີ ແມັກໄກວ.

ຫລ້າສຸດມີການເປີດເຜີຍວ່າ ໂອລິມປິກ ມາກເຊ ທີມດັງຈາກຝຣັ່ງພວມສົນໃຈທີ່ຈະຄວ້າລາວໄປຮ່ວມທີມ ໂດຍເປັນການຊື້ຂາດ ໂດຍໄບຢີມີສັນຍາກັບແມນຢູ ຢູໄນເຕັດ ຈົນເຖິງປີ 2024.