ຄົບຮອບ 72 ປີວັນສື່ມວນຊົນ ແລະ ພິມຈຳໜ່າຍ ເປັນເໝືອນສາຍໃຍ ແລະ ຂົວຕໍ່ໃນການສ້າງສາພັດທະນາປະເທດຊາດ
ວັນທີ 13 ສິງຫາ ເປັນວັນສື່ມວນຊົນ ແລະ ພິມຈຳໜ່າຍ. ປີນີ້ມີອາຍຸຄົບຮອບ 72 ປີພໍດີ (13/8/1950-13/8/2022). ເວົ້າໄດ້ວ່າຕະຫລອດ 72 ປີແຫ່ງພາລະກິດຂອງສື່ມວນຊົນນັ້ນໄດ້ຜ່ານພົ້ນໄລຍະປະຫວັດສາດມາແລ້ວສອງຍຸກສອງສະໄໝ ເປັນຕົ້ນສະໄໝຕໍ່ສູ້ກູ້ຊາດ ແລະ ສະໄໝສ້າງສາພັດທະນາປະເທດຊາດ.
ໃນສະໄໝຕໍ່ສູ້ກູ້ຊາດນັ້ນ ແມ່ນເລີ່ມຕົ້ນຈາກຂັ້ນປະຖົມປະຖານ ໂດຍນັກສື່ມວນຊົນທັງຫລາຍເປັນຜູ້ເຮັດ, ເປັນຜູ້ສ້າງມັນຂຶ້ນມາດ້ວຍພະລັງນ້ຳໃຈເດັດດ່ຽວຕໍ່ສູ້ ເຊິ່ງເລີ່ມຈາກການຂຽນໃບປິວ, ຫວ່ານໃບປິວ, ແຈກຢາຍໃຫ້ປະຊາຊົນໃນແຕ່ລະບ້ານ, ແຕ່ລະທ້ອງຖິ່ນໃນເຂດປົດປ່ອຍ ແລະ ເຂດຍາດແຍ່ງ ເພື່ອໂຄສະນາຊວນເຊື່ອດຶງດູດເອົາກຳລັງແຮງສະໜັບສະໜູນແນວທາງການຕໍ່ສູ້ອັນເປັນທຳຂອງການປະຕິວັດ ພາຍໃຕ້ການນຳພາຂອງແນວລາວອິດສະຫລະ. ຫລັງຈາກຕໍ່ມາ ຈຶ່ງໄດ້ຂະຫຍາຍຕົວມີໜັງສືພິມແນວລາວຮັກຊາດ, ມີວິທະຍຸກະຈາຍສຽງແນວລາວຮັກຊາດ, ມີໂຮງພິມ, ມີການພິມຈຳໜ່າຍສື່ສິ່ງພິມຕ່າງໆຂອງສູນກາງແນວລາວຮັກຊາດ.
ຜ່ານຂະບວນວິວັດແຫ່ງການຕໍ່ສູ້ດ້ວຍຄວາມຸ່ງໝັ້ນ, ສື່ມວນຊົນປະຕິວັດໃນໄລຍະນັ້ນຈຶ່ງກາຍເປັນກະບອກສຽງອັນແຫລມຄົມປະກອບສ່ວນເຂົ້າໃນໄຊຊະນະລວມຂອງການປະຕິວັດປົດປ່ອຍຊາດຈົນມາຮອດປີ 1975 ຈຶ່ງສາມາດປົດປ່ອຍປະເທດຊາດໄດ້ຢ່າງສົມບູນ.
ພໍຕົກມາໃນໄລຍະສ້າງສາພັດທະນາປະເທດຊາດ ສື່ມວນຊົນລາວຍິ່ງມີບົດບາດໜ້າທີ່ອັນສຳຄັນໃຫ້ແກ່ປະເທດຊາດບ້ານເມືອງ. ໃນໄລຍະນີ້ ສື່ມວນຊົນໄດ້ກາຍເປັນກະບອກສຽງອັນສຳຄັນຂອງພັກ, ຮັບໃຊ້ຊາດ, ຮັບໃຊ້ປະຊາຊົນດ້ວຍການນຳເອົາແນວທາງນະໂຍບາຍຂອງພັກ ແລະ ລັດຖະບານຜ່ານສື່ຕ່າງໆໄດ້ຢ່າງກວ້າງຂວາງ. ນອກຈາກນັ້ນ ກໍນຳເອົາບັນດາຜົນງານການສ້າງສາພັດທະນາປະເທດຊາດຂອງປະຊາຊົນບັນດາເຜົ່າ ກໍຄືໝາກຜົນແຫ່ງການຈັດຕັ້ງປະຕິບັດບັນດາມະຕິຄຳສັ່ງ, ແນວທາງນະໂຍບາຍຂອງພັກ-ລັດວາງອອກ ດ້ວຍການໂຄສະນາຜ່ານສື່ແຕ່ລະໄລຍະດ້ວຍຄວາມຮັບຜິດຊອບສູງ ແລະ ວ່ອງໄວທັນໃຈ.
ມາຮອດປັດຈຸບັນ, ສື່ມວນຊົນລາວໄດ້ເຕີບໃຫຍ່ຂະຫຍາຍຕົວຢ່າງໃຫຍ່ຫລວງ ສິ່ງທີ່ໂດດເດັ່ນທີ່ສຸດແມ່ນມີສື່ໃໝ່ ຫລືວ່າ ສື່ອອນລາຍ ໄດ້ປາກົດຕົວຂຶ້ນໃນສັງຄົມລາວຢ່າງກວ້າງຂວາງ, ບັນດາສື່ສິ່ງພິມຕ່າງໆ, ວິທະຍຸກະຈາຍສຽງ, ໂທລະພາບ, ໂທລະໂຄ່ງ ຕະຫລອດຮອດພາຫະນະ ແລະ ບຸກຄະລາກອນໄດ້ມີການພັດທະນາໃຫ້ເຕີບໃຫຍ່ ແລະ ຂະຫຍາຍຕົວໃນທຸກເມືອງ, ທຸກແຂວງ, ມີທັງຂອງສູນກາງ ແລະ ທ້ອງຖິ່ນ, ມີທັງຂອງລັດ, ເອກະຊົນ, ບຸກຄົນ ແລະ ນິຕິບຸກຄົນ.
ເຖິງຢ່າງໃດກໍດີ, ອີງໃສ່ການເຕີບໃຫຍ່ຂະຫຍາຍຕົວຂອງປະເທດຊາດທີ່ນັບມື້ມີການພັດທະນາໄປຢ່າງບໍ່ຢຸດຢັ້ງ ບັນດານັກສື່ມວນຊົນ ກໍຄືສື່ມວນຊົນລາວຕ້ອງໄດ້ປັບຕົວພັດທະນາຕົນເອງ, ປັບປຸງຄຸນນະພາບໃຫ້ດີຂຶ້ນ ແລະ ໃຫ້ທ່ວງທັນກັບການຂະຫຍາຍຕົວຂອງສັງຄົມລາວ ແລະ ສັງຄົມໂລກທີ່ນັບມື້ມີການພັດທະນາປ່ຽນແປງໄປຢ່າງບໍ່ຢຸດຢັ້ງ.
