ທ່ານ ກິມຈອງອຸນ ປະກາດໄຊຊະນະ ຄຸມການລະບາດຂອງໂຄວິດໄດ້ແລ້ວ ພ້ອມສັ່ງໃຫ້ເລີ່ມຫລຸດຜ່ອນມາດຕະການ

ຜູ້ນຳ ສປປ ເກົາຫລີ ປະກາດໄຊຊະນະເໜືອໂຄວິດ-19 ຫລັງບໍ່ມີລາຍງານກໍລະນີຜູ້ຖືກສົງໄສເຂົ້າມາ 2 ອາທິດແລ້ວ.

ສຳນັກຂ່າວກາງເກົາຫລີ (KCNA) ລາຍງານໃນວັນທີ 11 ສິງຫາ 2022 ວ່າ: ທ່ານ ກິມຈອງອຸນ ຜູ້ນຳສູງສຸດຂອງ ສປປ ເກົາຫລີ ໄດ້ມີການປະກາດໄຊຊະນະໃນການຕໍ່ສູ້ກັບການລະບາດຂອງພະຍາດໂຄວິດ-19 ຢ່າງເປັນທາງການ, ພ້ອມຍົກເລີກມາດຕະການຕ່າງໆທີ່ບັງຄັບໃຊ້ມາແຕ່ເດືອນພຶດສະພາ.

ກ່ອນໜ້ານີ້, ສປປ ເກົາຫລີ ບໍ່ສາມາດຢືນຢັນໄດ້ວ່າມີຜູ້ຕິດເຊື້ອພະຍາດໂຄວິດ-19 ຈັກຄົນ ເນື່ອງຈາກບໍ່ມີຊຸດກວດທີ່ພຽງພໍ ໂດຍໜັກສຸດຂອງການລະບາດເກີດຂຶ້ນເມື່ອວັນທີ 15 ພຶດສະພາ ທີ່ມີການຢືນຢັນຜູ້ມີອາການໄຂ້ເຖິງ 392.920 ຄົນ.

ນອກຈາກຈະບໍ່ມີຊຸດກວດແລ້ວ ສປປ ເກົາຫລີ ຍັງບໍ່ໄດ້ມີການສັກວັກຊີນໃຫ້ປະຊາກອນ ໂດຍລັດຖະບານພຽງຢາງອ້າງວ່າພວກເຂົາອາໄສພຽງການລັອກດາວ, ການປິ່ນປົວດ້ວຍຢາທີ່ມີໃນປະເທດ ແລະ ຄວາມໄດ້ປຽບຈາກລະບອບສັງຄົມນິຍົມແບບເກົາຫລີ ໃນການແກ້ໄຂພະຍາດໂຄວິດ-19.

ເຖິງຢ່າງໃດກໍຕາມ, ຄຳກ່າວອ້າງຂອງທາງການ ສປປ ເກົາຫລີ ໃນຄັ້ງນີ້ຍັງບໍ່ໄດ້ຮັບຄວາມເຊື່ອຖືຈາກນາໆຊາດ ເນື່ອງຈາກບໍ່ມີຫົນທາງທີ່ຈະສາມາດກວດສອບຂໍ້ມູນໂດຍອິດສະຫລະໄດ້.

ຂະນະທີ່, ນາງ ກິມໂຢຈອງ ນ້ອງສາວຂອງຜູ້ນຳສູງສຸດ ອອກມາກ່າວຫາ ສ.ເກົາຫລີ ວ່າເປັນຜູ້ນຳເອົາໄວຣັສຂ້າມຊາຍແດນເຂົ້າມາ ແລະ ປະກາດວ່າຖ້າຂ້າເສິກຍັງກະທຳການທີ່ເປັນອັນຕະລາຍດ້ວຍການນຳເອົາໄວຣັສເຂົ້າມາອີກ ທາງ ສປປ ເກົາຫລີ ຈະຕອບໂຕ້ດ້ວຍການກຳຈັດທັງໄວຣັສ ແລະ ສ.ເກົາຫລີ ອອກໄປ.

ອ້າງອີງ:

https://en.yna.co.kr/view/AEN20220811000352325

https://www.reuters.com/…/nkoreas-kim-declares-victory…/