ເປີດໃຈໄຂປະຕູຕ້ອນຮັບແຂກຕ່າງດ້າວທ້າວຕ່າງແດນ ແຕ່ຍັງຄັບແຄ້ນບາງບັນຫາຂອດບໍລິການ ແລະ ລາຄາສິນຄ້າ

ໃນຄວາມເປັນຈິງແລ້ວ, ນັບແຕ່ພັກ ແລະ ລັດຖະບານໄດ້ມີນະໂຍບາຍເປີດປະເທດມາແຕ່ກາງເດືອນພຶດສະພາ 2022 ມາຮອດປັດຈຸບັນ ເຫັນວ່າມີນັກທ່ອງທ່ຽວເລີ່ມທະຍອຍເຂົ້າມາທ່ຽວລາວນັບມື້ຫລາຍຂຶ້ນ. ໃນຈຳນວນນັກທ່ອງທ່ຽວທີ່ໄດ້ເຂົ້າມາທ່ຽວລາວຫລາຍກວ່າໝູ່ກໍແມ່ນພີ່ນ້ອງຊາວໄທ ເຊິ່ງເປັນເພື່ອນບ້ານໃກ້ຄຽງທີ່ມີຮາກເຫງົ້າທາງເຊື້ອຊາດ ແລະ ພາສາ. ຄາດວ່າໃນອະນາຄົດຕໍ່ໜ້າ ຫລື ຍາວນານ ອາດຈະມີນັກທ່ອງທ່ຽວຈາກຫລາຍປະເທດພາກັນມາທ່ຽວເມືອງລາວຫລາຍຂຶ້ນໃນແຕ່ລະປີ.

ດັ່ງທີ່ຮູ້ກັນແລ້ວວ່າ, ປະເທດລາວເຮົາເປັນປະເທດທີ່ເຕັມໄປດ້ວຍວັດທະນະທຳ ແລະ ທຳມະຊາດທີ່ສວຍສົດງົດງາມ ເປັນຕົ້ນມີຫ້ວຍນ້ຳລຳເຊ, ມີພູຜາປ່າໄມ້ ແລະ ມີຮີດຄອງປະເພນີອັນດີງາມ, ໄປພ້ອມໆກັບຄົນລາວເຮົາກໍມີອັດທະຍາໃສໄມຕີກາຍເປັນສະເໜ່ຢ່າງໜຶ່ງທີ່ເປັນຈຸດຂາຍເພື່ອດຶງດູດນັກທ່ອງທ່ຽວເຂົ້າມາທ່ຽວເມືອງລາວ.

ອັນທີ່ພິເສດສຸດໆກໍແມ່ນມີລົດໄຟຄວາມໄວສູງ ລາວ-ຈີນ ທີ່ພວມກາຍເປັນນິຕິໃໝ່ດຶງດູດນັກທ່ອງທ່ຽວພາກັນຫລັ່ງໄຫລເຂົ້າມາທ່ຽວລາວຢ່າງຄັບຄາໜາແໜ້ນ. ການທີ່ລາວເຮົາມີລົດໄຟຄວາມໄວສູງ ລາວ-ຈີນ ບໍ່ພຽງແຕ່ສ້າງເງື່ອນໄຂໃນການໄປມາຢ່າງສະດວກສະບາຍ, ແຕ່ຍັງເປັນການຊຸກຍູ້ສົ່ງເສີມເສດຖະກິດລາວໃຫ້ເຕີບໃຫຍ່ເຂັ້ມແຂງ ແລະ ຂະຫຍາຍຕົວໃນອະນາຄົດ.

ຢ່າງໃດກໍດີ, ໃນເມື່ອມີນັກທ່ອງທ່ຽວເຂົ້າມາທ່ຽວເມືອງລາວດ້ວຍຄວາມເຕັມໃຈແລ້ວ ພວກເຮົາກໍຕ້ອງມີນ້ຳໃຈຕ້ອນຮັບຂັບສູ່ດ້ວຍອັດທະຍາໃສໄມຕີ ຫລື ເວົ້າອີກຢ່າງໜຶ່ງກໍແມ່ນເປີດໃຈໄຂປະຕູຕ້ອນຮັບແຂກບ້ານແຂກເມືອງດ້ວຍຄວາມພໍໃຈ ແລະ ເຕັມໃຈ.

ການຕ້ອນຮັບແຂກບ້ານແຂກເມືອງດ້ວຍຄວາມເຕັມໃຈມັນກໍຍ່ອມສະແດງອອກຫລາຍດ້ານ ເປັນຕົ້ນນັບແຕ່ເຂົ້າ-ອອກເມືອງກໍຕ້ອງອຳນວຍຄວາມສະດວກວ່ອງໄວ, ເວົ້າຢ່າງໜຶ່ງແມ່ນບໍ່ຄວນເຮັດຊັກຊ້າແກ່ຍາວ, ເຢີບໆຢາບໆຫາວິທີກົດໜ່ວງເພື່ອຢາກໄດ້ເງິນກ້ອງໂຕະນຳແຂກ ຕະຫລອດຮອດການວາງທັດສະນະທ່າທີກັບແຂກກໍຕ້ອງສຸພາບດູດີ, ສ່ວນບັນດາໂຮງແຮມ, ຮ້ານອາຫານ ແລະ ການບໍລິການໃນສະຖານທີ່ທ່ອງທ່ຽວກໍຕ້ອງເຕັມໄປດ້ວຍຄວາມພໍໃຈຂອງແຂກ, ບໍ່ຂຶ້ນຄ່າຫ້ອງ ຫລື ຈອງຫ້ອງແລ້ວພັດປ່ຽນໃຫ້ຄົນອື່ນ ຍ້ອນຄວາມຢາກໄດ້ແຕ່ເງິນ, ຄ່າອາຫານ ແລະ ຄ່າບໍລິການຕ່າງໆກໍຕ້ອງສົມເຫດສົມຜົນ ບໍ່ເຮັດແບບລຳພັງໃຈ.

ພິເສດການເວົ້າຈາປາໄສກັບແຂກຄົນ, ນັກທ່ອງທ່ຽວກໍຕ້ອງແບບເປັນກັນເອງ, ມີອັດທະຍາໃສໄມຕີ ເຮັດໃຫ້ແຂກຕິດໃຈກັບໄປແລ້ວກໍຢາກກັບຄືນມາທ່ຽວອີກ. ນີ້ລະຄືການເປີດໃຈໄຂປະຕູຕ້ອນຮັບແຂກຕ່າງດ້າວທ້າວຕ່າງແດນທີ່ເຂົ້າມາທ່ອງທ່ຽວເມືອງລາວ.