ລັດຖະມົນຕີສຶກສາ ສ.ເກົາຫລີ ຂໍລາອອກ ຂໍ້ຫາຫລຸດອາຍຸເດັກເຂົ້າຮຽນຊັ້ນປະຖົມເຫລືອ 5 ປີ
ໃນວັນທີ 8 ສິງຫາຜ່ານມາ, ລັດຖະມົນຕີກະຊວງສຶກສາທິການ ສ.ເກົາຫລີ ຂໍລາອອກຈາກຕຳແໜ່ງ ທ່າມກາງປະຕິກິລິຍາທາງລົບທີ່ມີຕໍ່ຂໍ້ສະເໜີຂອງທ່ານ ໃນການຫລຸດເກນອາຍຸຂອງເດັກ ເພື່ອເຂົ້າສຶກສາລະດັບປະຖົມ ໃຫ້ເລີ່ມອາຍຸ 5 ປີ ເຊິ່ງກາຍເປັນຄວາມລົ້ມເຫລວແຕ່ລະບຸກຄົນຂອງປະທານາທິບໍດີ ຢຸນ ຊອກຢໍ ກັບເຈົ້າໜ້າທີ່ລັດຄົນອື່ນ ສົ່ງຜົນໃຫ້ຄະແນນຄວາມນິຍົມຂອງຜູ້ນຳ ສ.ເກົາຫລີ ຫລຸດລົງຫລາຍ.
ວັນທີ 9 ສິງຫາ 2022, ສຳນັກຂ່າວຣອຍເຕີລາຍງານວ່າ: ການຂໍລາອອກຂອງທ່ານ ນາງ ພັກ ຊຸນເອ ລັດຖະມົນຕີກະຊວງສຶກສາທິການ ສ.ເກົາຫລີ ເກີດຂຶ້ນພຽງ 2 ອາທິດ ຫລັງທ່ານສະເໜີແຜນຫລຸດອາຍຸການເຂົ້າສຶກສາໃນລະດັບປະຖົມ ຈາກ 6 ປີ ລົງມາຢູ່ 5 ປີ ເລີ່ມປີ 2025 ແລະ ຄາດຫວັງການໄດ້ຮັບການສະໜັບສະໜູນຈາກສາທາລະນະ ແລະ ແຜນການນີ້ຍັງຕັ້ງເປົ້າຂະຫຍາຍກຳລັງແຮງງານໂດຍເລັ່ງການຈົບການສຶກສາຂອງຄົນໜຸ່ມສາວໃຫ້ໄວຂຶ້ນນຳອີກ.
ເຖິງຢ່າງໃດກໍຕາມ, ກຸ່ມຜູ້ປົກຄອງ ແລະ ບຸກຄະລາກອນຄູຊາວ ສ.ເກົາຫລີ ໄດ້ຈັດການຊຸມນຸມຢູ່ໜ້າທຳນຽບປະທານາທິບໍດີໃນອາທິດຜ່ານມາ ພ້ອມຮຽກຮ້ອງໃຫ້ມີການຍົກເລີກແຜນດັ່ງກ່າວ ໂດຍໃຫ້ເຫດຜົນວ່າ: ເດັກອາຍຸນ້ອຍຍັງບໍ່ມີຄວາມພ້ອມທາງສະຕິປັນຍາ ແລະ ການປ່ຽນແປງຈະເພີ່ມຄວາມຍາກລຳບາກໃນການຫາບໍລິການເບິ່ງແຍງເດັກ.
ທັງນີ້, ການຄັດຄ້ານຕໍ່ນະໂຍບາຍ ແລະ ການປ່ຽນແປງດ້ານການສຶກສາອື່ນໆທີ່ມີການສະເໜີ ເປັນສິ່ງດຶງຄະແນນຄວາມນິຍົມຂອງປະທານາທິບໍດີ ຢຸນ ຊອກຢໍ ເຫລືອພຽງ 24% ເຊິ່ງຖືວ່າຕໍ່າສຸດນັບແຕ່ທ່ານເຂົ້າຮັບຕຳແໜ່ງຜູ້ນຳ ສ.ເກົາຫລີ ໃນເດືອນພຶດສະພາຜ່ານມາ ໂດຍຜູ້ຕອບແບບສອບຖາມຫລາຍຄົນສະແດງຄວາມເຫັນວ່າ: ບັນຫາກ່ຽວກັບການແຕ່ງຕັ້ງບຸກຄະລາກອນຂອງທ່ານ ຢຸນ ຊອກຢໍ ຄືເຫດຜົນສຳຄັນທີ່ສຸດຕໍ່ຄວາມນິຍົມທີ່ຕົກຕໍ່າຂອງທ່ານ.
