ທ່ານ ທຣຳ ຍຸບສະພາທີ່ປຶກສາເສດຖະກິດ ຫລັງຜູ້ບໍລິຫານພາກັນລາອອກ
ທ່ານ ທຣຳ ຍຸບສະພາທີ່ປຶກສາທາງເສດຖະກິດ 2 ແຫ່ງ, ພາຍຫລັງບັນດາຜູ້ບໍລິຫານບໍລິສັດເອກະຊົນ ເຊິ່ງເປັນສະມາຊິກພາກັນລາອອກ ເພື່ອປະທ້ວງແນວຄິດທີ່ມີຕໍ່ເຫດປະທ້ວງຢຽດຜິວຢູ່ເວີຈິເນຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 16 ສິງຫາວ່າ: ປະທານາທິບໍດີ ໂດນັນ ທຣຳ ປະກາດຜ່ານທະວິດເຕີ ໃນວັນທີ 16 ສິງຫາ ຍຸບສະພາທີ່ປຶກສາທາງເສດຖະກິດ 2 ແຫ່ງທີ່ຈັດຕັ້ງຂຶ້ນ ຄືສະພາການຜະລິດອາເມລິກາ ແລະ ຄະນະເຮັດວຽກດ້ານແຜນຍຸດທະສາດ ແລະ ນະໂຍບາຍ ທີ່ສະມາຊິກສ່ວນຫລາຍເປັນປະທານ ຫລື ປະທານຄະນະເຈົ້າໜ້າທີ່ບໍລິຫານຂອງບໍລິສັດຍັກໃຫຍ່ຫລາຍແຫ່ງໃນອາເມລິກາ ໂດຍບໍ່ມີການລະບຸເຫດຜົນທີ່ຈະແຈ້ງ, ແຕ່ການຕັດສິນໃຈດັ່ງກ່າວຂອງທ່ານ ທຣຳ ມີຂຶ້ນ ພາຍຫລັງທ່ານ ເດນິ ສ. ມໍຣິສັນ ຜູ້ບໍລິຫານຂອງແຄມເບລ ຊຸບ ແລະ ທ່ານ ອິງເງີ ທູລິນ ຜູ້ບໍລິຫານຂອງ 3 ເອັມ ເປັນຜູ້ບໍລິຫານ 2 ຄົນຫລ້າສຸດທີ່ລາອອກຈາກການຮ່ວມເປັນໜຶ່ງໃນສະມາຊິກສະພາທີ່ປຶກສາ.
ທັງນີ້, ບັນດາຜູ້ບໍລິຫານຂອງບໍລິສັດຊັ້ນນຳໃນອາເມລິກາພາກັນລາອອກຈາກການເຮັດວຽກຮ່ວມກັບທຳນຽບຂາວໃນວັນທີ 14 ສິງຫາ ຫລື ພຽງບໍ່ດົນຫລັງເກີດເຫດປະທ້ວງນອງເລືອດຢູ່ເມືອງຊາລອດສະວິວ ໃນລັດເວີຈິເນຍ ທີ່ເປັນການປະທະກັນຢ່າງດຸເດືອດລະຫວ່າງກຸ່ມຜູ້ຊຸມນຸມຝ່າຍຊາດນິຍົມຂວາຈັດ ເຊິ່ງລວມທັງລັດທິນີໂອນາຊີ ແລະ ດູລັກແຄລນ ກັບກຸ່ມການເມືອງຝ່າຍຊ້າຍ ເປັນເຫດໃຫ້ມີຜູ້ເສຍຊີວິດຢ່າງໜ້ອຍ 1 ຄົນ ຈາກການທີ່ຜູ້ປະທ້ວງຝ່າຍຂວາຈັດຂັບລົດຕຳ ແລະ ມີຜູ້ໄດ້ຮັບບາດອີກເປັນຈຳນວນຫລາຍ.
