ຝົນຕົກໜັກຢູ່ບ່ອນໃດ ນ້ຳຖ້ວມຫລາຍຢູ່ບ່ອນນັ້ນ ບັນຫາທີ່ສັງຄົມໃຫ້ຄວາມສົນໃຈເຖິງມາດຕະການປ້ອງກັນ ແລະ ແກ້ໄຂ

ໂດຍ: ທິດກໍ່າ

ຕອນເຊົ້າວັນທີ 20 ສິງຫາ 2022 ເກີດມີຝົນຕົກໜັກຢູ່ຂອບເຂດທົ່ວນະຄອນຫລວງວຽງຈັນ. ໂດຍສະເພາະເມືອງສີໂຄດ, ເມືອງໄຊທານີ, ເມືອງຈັນທະບູລີ ແລະ ສີສັດຕະນະນາກຂອບເຂດຕົວເມືອງໃຫຍ່ທັງ 4 ເມືອງຈາກສະພາບຝົນຕົກໄດ້ແກ່ຍາວເກືອບໝົດຄືນຊອດແຈ້ງ, ມີຫ່າຄ່ອຍຫ່າແຮງ ຈົນເຮັດໃຫ້ບ່ອນບໍ່ເຄີຍຖ້ວມກໍຖ້ວມ ຕາມເສັ້ນທາງຫລັກໆເຊັ່ນ ສີ່ແຍກດົງໂດກ. ຊ້າງຄູ້, ສີ່ແຍກທາດຫລວງ, ໂພນນພະເນົາ ມີນ້ຳໄຫລຫລາກຖ້ວມຈົນພຽງຫົວເຂົ່າກາງຂາ ເຮັດໃຫ້ການເດີນທາງໄປມາຄ້າຂາຍ ຫລື ໄປວຽກໄປງານໃນຕອນເຊົ້າຂອງວັນທີ20 ສິງຫາ ລຳບາກຊັກຊ້າໄປຫລາຍຊົ່ວໂມງ.

ດັ່ງທີ່ຮູ້ກັນດີແລ້ວວ່າ, ລະດູນີ້ເປັນລະດູຝົນ, ຫວ່າງສີ່ຫ້າມື້ກ່ອນ ທາງອຸຕຸນິຍົມກໍໄດ້ແຈ້ງລ່ວງໜ້າແລ້ວວ່າ ນັບແຕ່ວັນທີ 20 ຫາວັນທີ 23 ສິງຫາ 2022 ຈະມີຝົນຕົກໜັກໃນທົ່ວປະເທດ ຂໍໃຫ້ທຸກທ້ອງຖິ່ນເຝົ້າລະວັງໃນການໄປມາ. ໝາຍວ່າສິ່ງທີ່ຄວນຈົດຈໍ່ເອົາໃຈໃສ່ກໍແມ່ນກຽມພ້ອມເພື່ອຄວາມປອດໄພຂອງຊີວິດ ແລະ ຊັບສິນສິ່ງສຳຄັນແມ່ນຖ້າທ້ອງຖິ່ນໃດເກີດມີນ້ຳຖ້ວມໜັກກໍໃຫ້ສາມາດກູ້ໄພເພື່ອຮັກສາຊີວິດ, ຊັບສິນຂອງພົນລະເມືອງໃຫ້ປອດໄພທຸກຄົນ, ທຸກບ້ານ ແລະ ທຸກທ້ອງຖິ່ນ.

ສະພາບດິນຟ້າອາກາດຍາມລະດູຝົນນີ້ພວມເຮົາຄວນໄດ້ເຝົ້າລະວັງຢ່າງໃກ້ຊິດ ເພາະຝົນຕົກໜັກຢູ່ບ່ອນໃດມັນກໍຖ້ວມຢູ່ບ່ອນຫັ້ນ ໂດຍສະເພາະແມ່ນຢູ່ກະໂຕໃຈກາງນະຄອນຫລວງເກີດມີນ້ຳຖ້ວມເສັ້ນທາງ, ຖ້ວມເຮືອນຊານບ້ານຊ່ອງ, ຖ້ວມພື້ນຖານການຜະລິດເຊັ່ນ: ຖ້ວມຄອກໝູ, ຄອກງົວ, ຄອກຄວາຍ, ຄອກເປັດ, ຄອກໄກ່, ຖ້ວມໜອງປູໜອງປາ, ໄຮ່ນາຮົ້ວສວນແຕກຊະນະໂມຈົນພວກລໍຖ້າຕຶກກະດຸ້ງ, ຕຶກແຫ, ໃສ່ມອງເອົາປາແຕກໜອງຕ້ອງໄດ້ພາກັນເຮສະໜັ່ນ. ແຕ່ອັນສຳຄັນທີ່ສຸດກໍຂໍຢ່າໃຫ້ຖ້ວມປາກຖ້ວມດັງໃນເວລານອນຫລັບໄຫລຍາມເດິກຍາມດື່ນ.

ຫາກຕັ້ງໂຈດກັນວ່າ, ດ້ວຍສາເຫດໃດໃນສະໄໝນີ້ຢູ່ຕາມຕົວເມືອງເມື່ອຝົນຕົກໜັກລົງມາມີນ້ຳໄຫລຫລາກແບບຜິດປົກກະຕິ. ຄຳຕອບໂຈດກໍຄື ຕາມແລວຫ້ວຍຮ່ອງຄອງບຶງທີ່ມີໃນສະໄໝກ່ອນເພິ່ນພາກັນຖົມປຸກເຮືອນປຸກຊານ, ປຸກສຳນັກງານອົງການ, ສ້າງເປັນເຂດການຜະລິດທຸລະກິດໝົດກ້ຽງ ຄອງນ້ຳທີ່ເຮັດໄວ້ກໍບໍ່ໄດ້ມາດຕະຖານ, ຊ້ຳບໍ່ໜຳ ມີຂີ້ເຫຍື້ອໄຫລອຸດຕັນກໍຍິ່ງເຮັດໃຫ້ນ້ຳໄຫລບໍ່ສະດວກເປັນອຶ່ງຕຶ່ງໄຫລຈາກບ່ອນສູງໄປຫົ່ງຢູ່ບ່ອນຕໍ່າຊະຊາຍໃຜເອົາທັນກໍທັນ, ໃຜເອົາບໍ່ທັນກໍເປັນອັນວ່າປາຢູ່ໜອງ, ເປັດໄກ່ທີ່ກຳລັງພວມຈະໄດ້ຂາຍຢູ່ໃນຄອກຖືກໄຫລຊຸທັງກາຍເປັນຂອງສາທາລະນະຢ່າງຊິ້ນເນື້ອປະດາຕົວ.

ເວົ້າເລື່ອງໄພທຳມະຊາດ ບໍ່ວ່າດ້ານໃດກໍຕາມ ເມື່ອເກີດໄພພິບັດຂຶ້ນມາແລ້ວມັນກະທົບເຖິງຊີວິດການເປັນຢູ່ ແລະ ການຜະລິດ, ຊີວິດການເປັນຢູ່ຂອງປະຊາຊົນບໍ່ຫລາຍກໍໜ້ອຍດັ່ງຫລາຍປີຜ່ານມາ ເຂື່ອນເຊປ່ຽນ-ເຊນ້ຳນ້ອຍແຕກຈົນເຖິງຂັ້ນໄດ້ພາກັນຍ້າຍບ້ານ, ປະບ້ານເກົ່າໄປຢູ່ບ້ານໃໝ່ ຈິດໃຈກໍຍັງສະທ້ານ, ບ້ານເກົ່າຊ່າກັນວ່າເປັນບ້ານຜີສິງ, ໄປຢູ່ບ້ານໃໝ່ກ່ອນຈິດໃຈຈະສະຫງົບ, ໄດ້ຊັບສິນຄືນມາຕ້ອງໃຊ້ເວລາສິບປີຊາວປີເຕີບເດີ້ພີ່ນ້ອງເອີຍ!.