ທັບນັກກິລາຄົນພິການລາວ ເດີນທາງເຖິງບ້ານດ້ວຍຄວາມສະຫວັດດີພາບ ພ້ອມກັບຜົນງານ 2 ຫຼຽນເງິນ ແລະ 7 ຫຼຽນທອງ

ໃນໂອກາດນີ້, ທ່ານຫົວໜ້າຫ້ອງການກະຊວງ ສສກ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະນຳ, ຄູຝຶກ ແລະ ນັກກິລາທຸກຄົນ ທີ່ເຂົ້າຮ່ວມການແຂ່ງຂັນ ແລະ ພ້ອມກັນທຸ້ມເທສຸດກຳລັງ ເພື່ອຍາດໄຊຊະນະ ແລະ ນຳກຽດສັກສີມາໃຫ້ປະເທດຊາດພວກເຮົາ ເຖິງແມ່ນວ່າການເດີນທາງ ຫຼື ການແຂ່ງຂັນ ຈະພົບອຸປະສັກຄວາມຫຍຸ້ງຍາກນານາປະການກໍຕາມ ແຕ່ຄະນະນຳ, ຄູຝຶກ ແລະ ນັກກິລາທຸກຄົນ ກໍໄດ້ມີຄວາມຮັບຜິດຊອບສູງ, ມີຄວາມອົດທົນພະຍາຍາມ ແລະ ຄວາມສາມັກຄີກັນ ຈົນນຳມາແຫ່ງຜົນງານທີ່ໜ້າພໍໃຈ ຄື 2 ຫຼຽນເງິນ ແລະ 7 ຫຼຽນທອງ.

ສຳລັບການແຂ່ງຂັນຄັ້ງນີ້ ມີການຊີງທັງໝົດ 14 ປະເພດກິລາ ປະກອບມີ: ຍິງທະນູ, ແລ່ນ-ລານ, ດອກປີກໄກ່, ບັອດເຊຍ, ໝາກເສິກ, ເຕະບານ, ໂກນບານ, ຢູໂດ, ຍົກນໍ້າໜັກ, ລອຍນໍ້າ, ບານສົ່ງ, ປິ່ງປ່ອງ, ບານບ້ວງລໍ້ເລື່ອນ ແລະ ເທັນນິດລໍ້ເລື່ອນ, ໂດຍມີນັກກິລາເຂົ້າຮ່ວມເກືອບ 1.300 ຄົນ ຈາກ 11 ປະເທດ, ໃນນີ້ສະເພາະ ສປປ ລາວ ສົ່ງຄະນະນຳ ແລະ ນັກກິລາເຂົ້າຮ່ວມ ທັງໝົດ 79 ຄົນ ໃນ 6 ປະເພດກິລາຄື: ຍົກນໍ້າໜັກ, ລອຍນໍ້າ, ແລ່ນ-ລານ, ບັອດເຊຍ, ບານບ້ວງລໍ້ເລື່ອນ (ທີມຍິງ) ແລະ ໂກນບານ (ທີມຊາຍ-ຍິງ). ຜ່ານການແຂ່ງຂັນຜົນປະກົດວ່າ ທັບນັກກິລາຄົນພິການລາວ ຍາດມາໄດ້ 2 ຫຼຽນເງິນ ແລະ 7 ຫຼຽນທອງ ໂດຍ 2 ຫຼຽນເງິນ ໄດ້ຈາກ ນາງ ລັດສະໝີ ສີປະເສີດ ນັກກິລາຍົກນໍ້າໜັກຄົນພິການລາວ ຮຸ່ນນໍ້າໜັກບໍ່ເກີນ 41 ກິໂລກຣາມ ແລະ 7 ຫຼຽນທອງ ໄດ້ຈາກ ທ້າວ ເປ້ຍ ເລົາພັກດີ ນັກກິລາຍົກນໍ້າໜັກ ຍາດໄດ້ 2 ຫຼຽນທອງ, ທ້າວ ບຸນເພັດ ເທບທິດາ ນັກກິລາແລ່ນ-ລານຄົນພິການທີມຊາດລາວ ຍາດໄດ້ 2 ຫຼຽນທອງ ລາຍການແລ່ນ 200 ແມັດ ແລະ 400 ແມັດ, ທ້າວ ແກ່ນ ເທບທິດາ ຍາດໄດ້ 1 ຫຼຽນທອງ ລາຍການ ແລ່ນ 100 ແມັດ ແລະ ອີກ 2 ຫຼຽນທອງຈາກ ກິລາບານບ້ວງລໍ້ເລື່ອນທີມຍິງ 5 ຄົນ (5×5) ແລະ ທີມຍິງ 3 ຄົນ (3×3).

ສ.ສຸກ ລາຍງານຈາກນະຄອນໂຊໂລ, ອິນໂດເນເຊຍ