ຕໍາຫລວດຈັບຜູ້ຄ້າເຮໂຣອິນດໍາເນີນຄະດີ

ເມື່ອບໍ່ດົນມານີ້, ກົມຕຳຫລວດສະກັດກັ້ນ ແລະ ຕ້ານຢາເສບຕິດ ສາມາດຈັບຕົວຜູ້ຄ້າຂາຍຢາເສບໃນຂະນະທີ່ມີການລັກລອບຊື້-ຂາຍຢາເສບຕິດປະເພດເຮໂຣອິນໃນຮ້ານອາຫານແຫ່ງໜຶ່ງເຂດເມືອງຫາດຊາຍຟອງນະຄອນຫລວງວຽງຈັນ, ຊຶ່ງມີຜູ້ຕ້ອງຫາສອງຄົນຄື: ທ້າວ ວັນທາ ອາຍຸ 29 ປີຢູ່ແຂວງຜົ້ງສາລີ ແລະ ທ້າວ ໄມແສງ ອາຍຸ 35 ປີຢູ່ບ້ານມອມເມືອງຕົ້ນເຜິ້ງແຂວງບໍ່ແກ້ວ, ພ້ອມຂອງກາງເຮໂຣອິນໜັກ 380 ກຣາມ, ນອກນີ້ຍັງມີລົດໃຫຍ່ ແລະ ລົດຈັກໜຶ່ງຄັນ, ໂທລະສັບມືຖືໜຶ່ງໜ່ວຍ ແລະ ເງິນຈຳນວນໜຶ່ງທີ່ພວກເຂົານໍາໃຊ້ໃນການເຄື່ອນໄຫວກະທໍາຜິດຄັ້ງນີ້, ຈຶ່ງໄດ້ຍຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ.

ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວຮັບສາລະພາບວ່າ: ຢາເສບຕິດດັ່ງກ່າວແມ່ນເປັນຂອງພວກຕົນແທ້, ເຊິ່ງໄດ້ຊື້ມາຈາກເຄືອຂ່າຍຢາເສບຕິດຂະບວນການດຽວກັນເພື່ອເອົາມາຂາຍໃຫ້ລູກຄ້າທີ່ນັດຊື້ຢູ່ຮ້ານອາຫານແຫ່ງໜຶ່ງ, ແຕ່ຖືກເຈົ້າໜ້າທີ່ຈັບຕົວໄດ້ກ່ອນ.

ຄະດີຢາເສບຕິດລາຍນີ້ພວມຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍໃຫ້ໄດ້ໂດຍໄວ.

ຂ່າວໃຫ້ຮູ້ຕື່ມວ່າ: ເມື່ອບໍ່ດົນນີ້, ເຈົ້າໜ້າທີ່ ປກສ ເມືອງໂພນໂຮງແຂວງວຽງຈັນໄດ້ຈັບຕົວທ້າວ ນີວັນ ອາຍຸ 26 ປີຢູ່ບ້ານແສນຊຸມເມືອງໂພນໂຮງ, ພ້ອມຂອງກາງຢາບ້າ 326 ເມັດໃນຂະນະເອົາໄປສົ່ງໃຫ້ລູກຄ້າຢູ່ບ້ານຂາມເມືອງໂພນໂຮງ, ແຕ່ຖືກເຈົ້າໜ້າທີ່ຈັບຕົວໄດ້ກ່ອນ ແລະ ໃນຂະນະດຽວກັນໜ້າທີ່ ປກສ ແຂວງວຽງຈັນ ຍັງໄດ້ຈັບຕົວທ້າວ ດາວເດືອງ ອາຍຸ 56 ປີສັນຊາດຫວຽດນາມ, ພັກເຊົາຢູ່ບ້ານສີວິໄລເມືອງໂພນໂຮງ, ພ້ອມຂອງກາງຢາບ້າ 72 ເມັດມາດໍາເນີນຄະດີຕາມລະບຽບກົດໝາຍ.