ຍີ່ປຸ່ນອະນຸຍາດໃຊ້ວັກຊີນ “ໝາກສຸກ” ປ້ອງກັນ “ໝາກສຸກລີງ”

ວັນທີ 3 ສິງຫາ 2022, ສຳນັກຂ່າວຊິນຮົວລາຍງານວ່າ: ກະຊວງສາທາລະນະສຸກຍີ່ປຸ່ນປະກາດອະນຸຍາດການໃຊ້ວັກຊີນປ້ອງກັນພະຍາດໝາກສຸກທີ່ເຊື່ອວ່າມີປະສິດທິພາບປ້ອງກັນພະຍາດໝາກສຸກລີງໄດ້ 85%.

ຄວາມຄືບໜ້າດັ່ງກ່າວມີຂຶ້ນຫລັງຈາກຍີ່ປຸ່ນຢືນຢັນການພົບຜູ້ຕິດເຊື້ອພະຍາດໝາກສຸກລີງ 2 ຄົນ ໃນທ້າຍເດືອນກໍລະກົດ ເຊິ່ງທັງສອງເປັນຊາຍໃນຊ່ວງອາຍຸ 30 ປີ ທີ່ເດີນທາງມາຈາກຕ່າງປະເທດ ໂດຍລັດຖະບານໄດ້ປະກາດມາດຕະການປ້ອງກັນລ່ວງໜ້າເພື່ອປ້ອງກັນການແພ່ລະບາດຂອງພະຍາດດັ່ງກ່າວແລ້ວ.

ຂະນະກະຊວງສາທາລະນະສຸກຍີ່ປຸ່ນກຳລັງກວດສອບຢາສຳລັບປິ່ນປົວຊື່ວ່າ: “ເທໂຄວິຣິແມດ” (tecovirimat) ເຊິ່ງເປັນຢາຊະນິດຮັບປະທານທີ່ໃຊ້ປິ່ນປົວພະຍາດໝາກສຸກລີງ.

ເຈົ້າໜ້າທີ່ສາທາລະນະສຸກຍີ່ປຸ່ນລະບຸວ່າ: ອາການຂອງພະຍາດໝາກສຸກລີງ ເຊິ່ງເປັນພະຍາດເຂດຮ້ອນທີ່ແພ່ກະຈາຍຜ່ານການສຳຜັດຮ່າງກາຍຢ່າງໃກ້ຊິດ, ມີອາການຄືພະຍາດໝາກສຸກ ໄດ້ແກ່ ເປັນໄຂ້, ຜື່ນເປັນວົງກວ້າງ, ຮອຍພະຍາດ ແລະ ຕ່ອມນ້ຳເຫລືອງບວມ ຫລັງຈາກໄລຍະຟັກຕົວ 5-21 ວັນ.

ນອກຈາກນັ້ນ, ກະຊວງສາທາລະນະສຸກຍີ່ປຸ່ນຍັງກຳລັງສ້າງລະບົບກວດພະຍາດໝາກສຸກລີງສຳລັບໜ່ວຍງານສາທາລະນະສຸກທ້ອງຖິ່ນ ແລະ ຮຽກຮ້ອງໃຫ້ມີການລາຍງານຜູ້ຕິດເຊື້ອໃໝ່ໃນປະເທດທັນທີ. ພ້ອມກ່າວວ່າ: ຈະມີການຫາລືກ່ຽວກັບການຈັດສັນວັກຊີນຕໍ່ບຸກຄະລາກອນທາງການແພດ, ບຸກຄະລາກອນຫ້ອງປະຕິບັດການ ແລະ ເຈົ້າໜ້າທີ່ສູນສຸຂະພາບທີ່ຂໍຮັບວັກຊີນ.

ທັງນີ້, ອົງການອະນາໄມໂລກ (WHO) ໄດ້ປະກາດໃຫ້ພະຍາດໝາກສຸກລີງເປັນສະຖານະການສຸກເສີນດ້ານສາທາລະນະສຸກລະດັບໂລກ ທ່າມກາງການລະບາດທົ່ວໂລກ.

ກະຊວງສາທາລະນະສຸກຍີ່ປຸ່ນ ກ່າວວ່າ: ປັດຈຸບັນຍີ່ປຸ່ນມີປະລິມານວັກຊີນພະຍາດໝາກສຸກພຽງພໍໃນປະເທດ ທັງຍັງມີການຕັ້ງຄະນະສະເພາະກິດເພື່ອຮັບມືການລະບາດຂອງພະຍາດດັ່ງກ່າວ ເຊິ່ງນຳໂດຍທ່ານ ທາຄາຊິ ມູຣາຕະ ຮອງຫົວໜ້າເລຂາທິການຄະນະລັດຖະບານຝ່າຍຈັດການສະພາບວິກິດ.