ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 55
ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ໄດ້ນຳພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 55 ພາຍໃຕ້ຄໍາຂວັນ “ອາຊຽນ: ຮ່ວມກັນແກ້ໄຂບັນດາສິ່ງທ້າທາຍ” ເປີດຂຶ້ນຢ່າງເປັນທາງການ ໃນວັນທີ 3 ສິງຫາ 2022 ທີ່ ພະນົມເປັນ ຣາຊະອານາຈັກກໍາປູເຈຍ, ໂດຍການເປັນກຽດເຂົ້າຮ່ວມ ແລະ ກ່າວເປີດກອງປະຊຸມຢ່າງເປັນທາງການຂອງ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ເຊນ ນາຍົກ ລັດຖະມົນຕີ ແຫ່ງ ຣາຊະອານາຈັກກໍາປູເຈຍ.
ພາຍຫຼັງສຳເລັດພິທີເປີດກອງປະຊຸມຢ່າງເປັນທາງການ, ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 55 ກໍໄດ້ມີຂຶ້ນ, ໂດຍການເປັນປະທານຂອງ ທ່ານ ປຣາກ ໂຊຄົນ ຮອງນາຍົກລັດຖະມົນຕີ ລັດຖະມົນຕີຕ່າງປະເທດ ແລະ ການຮ່ວມມືສາກົນ ແຫ່ງ ຣາຊະອານາຈັກກໍາປູເຈຍ. ໃນກອງປະຊຸມ, ບັນດາລັດຖະມົນຕີຕ່າງປະເທດອາຊຽນ ໄດ້ຢືນຢັນຄືນຄວາມໝາຍໝັ້ນຂອງອາຊຽນ ໃນການຮັບມືກັບບັນດາສິ່ງທ້າທາຍຕ່າງໆຮ່ວມກັນ ແລະ ສືບຕໍ່ຮັກສາທ່ວງທ່າຂອງການສ້າງປະຊາຄົມອາຊຽນ. ພ້ອມດຽວກັນນີ້, ບັນດາລັດຖະມົນຕີຕ່າງປະເທດອາຊຽນ ກໍໄດ້ປຶກສາຫາລື ແລະ ເຫັນດີເພີ່ມທະວີການຮ່ວມມືກັບບັນດາປະເທດຄູ່ເຈລະຈາອາຊຽນ ແລະ ບັນດາຄູ່ຮ່ວມມືພາຍນອກ ໂດຍຜ່ານບັນດາກົນໄກການຮ່ວມມືທີ່ອາຊຽນສ້າງຂຶ້ນ, ລວມທັງການຮັດແໜ້ນຄວາມເປັນແກນກາງຂອງອາຊຽນ ໃນໂຄງສ້າງພາກພື້ນທີ່ພວມຜັນແປໄປ.
ພ້ອມດຽວກັນນີ້, ກອງປະຊຸມ ໄດ້ຮັບຊາບຄວາມຄືບໜ້າຂອງຂະບວນການສ້າງປະຊາຄົມອາຊຽນ ໂດຍສະເພາະການຈັດຕັ້ງປະຕິບັດບັນດາບຸລິມະສິດສໍາລັບການເປັນປະທານອາຊຽນຂອງກໍາປູເຈຍ ໃນປີ 2022 ແລະ ການກະກຽມຮ່າງວິໄສທັດປະຊາຄົມອາຊຽນ ຫຼັງປີ 2025. ອັນສໍາຄັນ, ກອງປະຊຸມໄດ້ເຫັນດີຮັດແໜ້ນການຮ່ວມມືໃນການຮັບມືກັບພະຍາດໂຄວິດ-19 ແລະ ການຟື້ນຟູພາກພື້ນຢ່າງຮອບດ້ານຫຼັງໂຄວິດ-19 ກໍຄື ການສ້າງປະຊາຄົມອາຊຽນ ໃຫ້ເຂັ້ມແຂງ. ນອກຈາກນີ້, ກອງປະຊຸມ ຍັງໄດ້ແລກປ່ຽນຄໍາຄິດເຫັນ ກ່ຽວກັບ ບັນຫາພາກພື້ນ ແລະ ສາກົນ.
ໃນໂອກາດເຂົ້າຮ່ວມກອງປະຊຸມຄັ້ງນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ຮ່ວມກັບບັນດາລັດຖະມົນຕີຕ່າງປະເທດອາຊຽນ ແລະ ເລຂາທິການໃຫຍ່ອາຊຽນ ເຂົ້າຢ້ຽມຂໍ່ານັບ ສົມເດັດ ອັກຄະມະຫາ ເສນາບໍດີ ເຕໂຈ ຮຸນ ເຊນ ອີກດ້ວຍ.
ໂອກາດເດີນທາງໄປເຂົ້າຮ່ວມກອງປະຊຸມຄັ້ງນີ້, ໃນຕອນແລງຂອງວັນທີ 2 ສິງຫາ 2022 ຜ່ານມາ, ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະຜູ້ແທນລາວ ໄດ້ພົບປະສອງຝ່າຍກັບ ທ່ານ ບຸຍ ແທັງ ເຊິນ ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ, ເພື່ອປຶກສາຫາລືກັນໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຈະເລີນງອກງາມຍິ່ງຂຶ້ນ.
ພ້ອມດຽວກັນນີ້, ໃນວັນທີ 3 ສິງຫາ 2022, ທ່ານຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ສະເຫຼີມໄຊ ກົມມະສິດ ພ້ອມດ້ວຍຄະນະ ໄດ້ສືບຕໍ່ພົບປະສອງຝ່າຍກັບ ບັນດາປະເທດເພື່ອນມິດ ເປັນຕົ້ນ ພົບປະສອງຝ່າຍກັບ ທ່ານ ຫວັງ ອີ້ ລັດຖະມົນຕີຕ່າງປະເທດ ແຫ່ງ ສປ ຈີນ; ພົບປະສອງຝ່າຍກັບ ທ່ານ ນາງ ນານາຍຢາ ມາຫຸຕາ (Nanaia MAHUTA) ລັດຖະມົນຕີຕ່າງປະເທດ ແຫ່ງ ປະເທດ ນິວຊີແລນ ແລະ ພົບປະສອງຝ່າຍກັບ ທ່ານ ເມັບວ໌ລຸດ ຊາວຸໂຊລູ (Mevlut Cavusoglu) ລັດຖະມົນຕີຕ່າງປະເທດ ແຫ່ງ ສາທາລະນະລັດ ຕຸລາເກຍ, ເພື່ອປຶກ ສາຫາລື ກ່ຽວກັບ ການພົວພັນ ແລະ ຮ່ວມມືຂອງສອງຝ່າຍ.
