ອູແກຣນເຜີຍສົ່ງເຮືອຂົນສິນຄ້າ ອອກຈາກທ່າເຮືອເປັນລຳທຳອິດແລ້ວ ຫລັງໂດຣນຣັດເຊຍຂວາງເກືອບ 5 ເດືອນ
ເຮືອຂົນສົ່ງທັນຍາພືດສາມາດເດີນທາງອອກຈາກທ່າເຮືອໃນອູແກຣນສຳເລັດເປັນລຳທຳອິດ ພາຍໃຕ້ຂໍ້ຕົກລົງເພື່ອບັນເທົາວິກິດອາຫານໂລກ.
ພາຍຫລັງກອງທັບຣັດເຊຍມີການປິດກັ້ນເສັ້ນທາງຂົນສົ່ງສິນຄ້າຂອງອູແກຣນໃນທະເລດຳມາເປັນເວລາ 5 ເດືອນກວ່າ ຈົນເຮັດໃຫ້ອູແກຣນບໍ່ສາມາດສົ່ງອອກທັນຍາພືດທີ່ເປັນສິນຄ້າສົ່ງອອກຫລັກໄດ້ ສົ່ງຜົນໃຫ້ທົ່ວໂລກຜະເຊີນວິກິດອາຫານເປັນວົງກວ້າງ.
ຫລ້າສຸດ, ເຮືອຂົນສົ່ງສິນຄ້າ Razoni ຂອງເຊຍຣາລີໂອນທີ່ບັນທຸກເຂົ້າໂພດ 26.000 ກວ່າໂຕນ ໄດ້ຂີ່ອອກຈາກທ່າເຮືອໃນເມືອງໂອເດສຊາຂອງອູແກຣນເມື່ອວັນທີ 1 ສິງຫາ 2022 ໂດຍມີຈຸດໝາຍປາຍທາງຄືທ່າເຮືອຢູ່ນະຄອນຫລວງຕຣິໂປລີ ປະເທດລີບີ.
ເຖິງວ່າຫລາຍຝ່າຍຈະອອກມາສະແດງຄວາມຍິນດີທີ່ອູແກຣນສາມາດສົ່ງອອກທັນຍາພືດໄດ້ອີກເທື່ອໜຶ່ງ, ແຕ່ປະທານາທິບໍດີ ໂວໂລດິມີ ເຊເລນສກີ ຢືນຢັນວ່າຕອນນີ້ຍັງໄວເກີນໄປທີ່ຈະສະຫລຸບ ຫລື ຄາດເດົາວ່າທຸກຢ່າງຈະໄປໄດ້ດີ, ເຮົາຄວນເບິ່ງວ່າທຸກຝ່າຍຈະເຮັດຕາມຂໍ້ຕົກລົງທີ່ເຊັນໄວ ແລະ ການຢືນຢັນຄວາມປອດໄພແທ້ ຫລື ບໍ່.
ໂດຍໃນຕອນນີ້ຍັງມີເຮືອຂົນສົ່ງສິນຄ້າອີກ 16 ລຳ ທີ່ລໍຖ້າອອກຈາກທ່າເຮືອ ຄາດວ່າການທີ່ອູແກຣນກັບມາສົ່ງອອກທັນຍາພືດໄດ້ອີກ ຈະເຮັດໃຫ້ພວກເຂົາໄດ້ຮັບເງິນຕາຕ່າງປະເທດເຂົ້າມາຢ່າງໜ້ອຍ 1 ພັນລ້ານໂດລາສະຫະລັດ ເຊິ່ງອູແກຣນເອງກຳລັງຕ້ອງການຫລາຍ.
ອ້າງອີງ:
https://www.washingtonpost.com/…/ukraine-grain-deal…/
https://www.barrons.com/…/too-early-to-celebrate-grain…
