ອິນໂດເນເຊຍ ບັອກ “Yahoo-PayPal-Dota” ຂໍ້ຫາບໍ່ຂໍໃບອະນຸຍາດ

ວັນທີ 1 ສິງຫາ 2022, ສຳນັກຂ່າວຊິນຮົວລາຍງານວ່າ: ໃນວັນທີ 30 ສິງຫາຜ່ານມາ, ທ່ານ ເຊມູເອລ ອາບຣິຈານີ ປັນເກຣາປັນ ຫົວໜ້າດ້ານການປະຍຸກໃຊ້ຂໍ້ມູນຂ່າວສານ ກະຊວງເຕັກໂນໂລຊີຂໍ້ມູນຂ່າວສານ ແລະ ການສື່ສານຂອງອິນໂດເນເຊຍ ລະບຸວ່າ: ລັດຖະບານອິນໂດເນເຊຍໄດ້ສັ່ງຫ້າມການເຂົ້າເຖິງ 8 ແພກຟອມອອນລາຍລາຍໃຫຍ່ເຊັ່ນ: Yahoo, PayPal ແລະ Dota ເນື່ອງຈາກແພກຟອມດັ່ງກ່າວບໍ່ໄດ້ລົງທະບຽນຂໍໃບອະນຸຍາດ.

ຖະແຫລງຈາກທ່ານ ປັນເກຣາປັນ ລະບຸວ່າ: ອີກ 5 ແພກຟອມທີ່ອິນໂດເນເຊຍສັ່ງຫ້າມການເຂົ້າເຖິງປະກອບມີ Steam, Counter-Strike, Epic Games, Origin.com ແລະ Xandr.com ໂດຍຜູ້ໃຫ້ບໍລິການເອເລັກໂຕຣນິກທັງໝົດຈຳເປັນຕ້ອງລົງທະບຽນຂໍໃບອະນຸຍາດພາຍໃຕ້ນະໂຍບາຍທີ່ອອກໃນປີ 2020.

ທັງນີ້, ຜູ້ໃຫ້ບໍລິການເອເລັກໂຕຣນິກຕ່າງປະເທດໃນອິນໂດເນເຊຍປະມານ 20 ແຫ່ງ ເຊັ່ນ: Google, Zoom, Netflix ແລະ Facebook ເລັ່ງລົງທະບຽນໃນບໍ່ເທົ່າໃດວັນກ່ອນຮອດກຳນົດເສັ້ນຕາຍໃນວັນທີ 29 ກໍລະກົດ. ຂະນະທີ່ຜູ້ໃຊ້ບໍລິການໃນປະເທດລົງທະບຽນນຳກະຊວງເຕັກໂນໂລຊີຂໍ້ມູນຂ່າວສານ ແລະ ການສື່ສານກ່ອນຮອດເສັ້ນຕາຍປະມານ 8.000 ແຫ່ງແລ້ວ.