ບໍ່ໃຫ້ນ້ຳຖ້ວມຂັງ ຕ້ອງຈິງຈັງຮ່ວມມືກັນແກ້ໄຂ

ບັນດາຕົວເມືອງໃຫຍ່ ໂດຍສະເພາະນະຄອນຫລວງວຽງຈັນ ພໍໜ້າຝົນມາ ມັກເກີດບັນຫານ້ຳຖ້ວມຂັງຖະ ໜົນຫົນທາງ, ເຮືອນຊານປະຊາຊົນ ເນື່ອງຈາກບັນດາຮ່ອງລະບາຍນ້ຳທີ່ມີຢູ່ນັ້ນລະບາຍນ້ຳບໍ່ທັນ ຍ້ອນອຸດຕັນ ແລະການທີ່ຮ່ອງລະບາຍນໍ້າໃນຕົວເມືອງອຸດຕັນສ່ວນໜຶ່ງເກີດຈາກຄວາມບໍ່ເອົາໃຈໃສ່ຂອງສັງຄົມເຊັ່ນ ຖິ້ມຂີ້ເຫຍື້ອ ແລະ ສິ່ງເສດເຫລືອຕ່າງໆລົງຮ່ອງລົງຄອງ.

ຜ່ານມາ, ເຈົ້າໜ້າທີ່ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ສຸມກຳລັງອະນາໄມຕົວເມືອງໂດຍການຊວ້ານດິນອອກຈາກແຄມທາງ, ຮ່ອງລະບາຍນໍ້າສາຍຫລັກ, ຮ່ອງຖະໜົນທ່າເດື່ອ(ຈຸດໄຟອຳ ນາດທາດຂາວ), ຂຸມພັກນໍ້າສາມແຍກໂພນສີນວນ, ຮ່ອງແຄມຖະໜົນລາວ-ໄທ, ຮ່ອງແຄມທາງໂພນສີນວນ, ອະນາໄມດູດນໍ້າເປື້ອນຢູ່ສູນກັກກັນສີເກີດ, ອະນາໄມຂຸດດິນຕັນປາກທໍ່ຂ້າມທາງເຕ 2, ຮ່ອງວັດໄຕ 1 ທາງເຂົ້າບ້ານພັກດົງປ່າສັກ, ຮ່ອງຂົວຂາວເຂດໂພນສະຫວາດໃຕ້, ສ້າງຂຸມຮັບ ນໍ້າ ແລະ ທໍ່ລະບາຍນໍ້າໜ້າທາງເຂດໜອງບອນ.

ໄລຍະນີ້ຝົນຂາດໄລຍະ ຊຶ່ງເປັນໂອກາດດີສຳລັບການແກ້ໄຂບັນຫານ້ຳຖ້ວມຂັງໃນຕົວເມືອງ ແລະ ການແກ້ໄຂບັນຫານີ້ຖືວ່າເປັນເລື່ອງທີ່ທຸກຄົນຕ້ອງໄດ້ຮ່ວມແຮງຮ່ວມໃຈກັນ ຢ່າຖິ້ມຂີ້ເຫຍື້ອ, ສິ່ງເສດເຫລືອລົງຮ່ອງລະບາຍນໍ້າ ເພາະຈະໄປອຸດຕັນ ເຮັດໃຫ້ນໍ້າໄຫລບໍ່ສະດວກ. ສິ່ງສໍາຄັນກໍຂໍໃຫ້ຄວາມຮ່ວມມືເປັນໜ້າທີ່ຂອງທຸກຄົນ ແລະ ຄວນເຮັດເປັນປະຈຳ, ບໍ່ຄວນອາໄສພາກສ່ວນກ່ຽວຂ້ອງມາຮັບຜິດຊອບເຖິງວ່າ ຄບຕ ມີໜ້າທີ່ຮັບຜິດຊອບລວງຮ່ອງລະບາຍນໍ້າຕາມຖະໜົນສາຍສຳຄັນຕ່າງໆໃນນະຄອນຫລວງວຽງ.

ທັງນີ້ຊາວນະຄອນຫລວງວຽງຈັນ ແລະ ທຸກການຈັດຕັ້ງຈົ່ງຊ່ວຍກັນອະນາໄມຖ້າເຮືອນຢູ່ໃກ້ ຫລື ຕິດແຄມທາງໃຫຍ່ຫລື ມີຮ່ອງລະບາຍນໍ້າຢູ່ໜ້າເຮືອນ ກໍໃຫ້ພ້ອມກັນຊ່ວຍຂຸດລວງຮ່ອງລະບາຍນໍ້າ, ຈົກເອົາສິ່ງອຸດຕັນອອກ ເພື່ອຊ່ວຍໃຫ້ນໍ້າໄຫລສະດວກ ແລະ ບໍ່ສົ່ງກິ່ນເໝັນທີ່ເກີດຈາກນໍ້າທີ່ໃຊ້ແລ້ວ ຫລື ສິ່ງເສດເຫລືອອື່ນໆທີ່ສະສົມຢູ່ເປັນເວລາດົນນານ.