ການພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ 6 ເດືອນຕົ້ນປີ ຍັງພົບກັບບັນຫາຄວາມຫຍຸ້ງຍາກຫຼາຍດ້ານ

ໂອກາດດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງສະຫວັນນະເຂດ ຊຸດທີ II ຊຶ່ງຈັດຂຶ້ນໃນລະຫວ່າງວັນທີ 27-29 ກໍລະກົດ ຜ່ານມານີ້, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕໍ່ກອງປະຊຸມຄັ້ງນີ້ວ່າ: ເຖິງແມ່ນວ່າສະພາບເງື່ອນໄຂພາຍໃນຫຼາຍດ້ານ ຍັງບໍ່ທັນເອື້ອອຳນວຍເປັນຕົ້ນ: ຜົນກະທົບຈາກ ເງິນກີບອ່ອນຄ່າ, ລາຄາສິນຄ້າ ແລະ ບໍລິການ ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ຄ່າຄອງຊີບສູງ, ລາຄານໍ້າມັນເຊື້ອໄຟແພງ (ຂາດປໍ້າ) ຄຽງຄູ່ກັນນີ້, ບັນຫາປະກົດການຫຍໍ້ທໍ້ທາງດ້ານສັງຄົມ ເຖິງວ່າພວກເຮົາໄດ້ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ກໍຍັງສືບຕໍ່ເປັນສິ່ງທ້າທາຍ, ສິ່ງທີ່ກ່າວມາຂ້າງເທິງນັ້ນ ໄດ້ສົ່ງຜົນກະທົບທັງທາງກົງ ແລະ ທາງອ້ອມ ຕໍ່ການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ 6 ເດືອນຕົ້ນປີຂອງແຂວງພວກເຮົາ. ຕໍ່ສະພາບການດັ່ງກ່າວ, ອົງການປົກຄອງແຂວງ ກໍໄດ້ພະຍາຍາມບຸກບືນ, ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນຕົ້ນປີ ໂດຍລວມການພັດທະນາເສດຖະກິດ-ສັງຄົມ ຍັງສືບຕໍ່ຂະຫຍາຍຕົວຕໍ່ເນື່ອງ ແລະ ມີຄວາມຄືບໜ້າດີພໍສົມຄວນເປັນຕົ້ນ: ສ້າງໄດ້ບ້ານປ້ອງກັນຊາດເຂັ້ມແຂງ ເພີ່ມຂຶ້ນ 98 ບ້ານ, ລວມທັງໝົດ 878 ບ້ານ, ກວມ 85,6% ຂອງບ້ານທົ່ວແຂວງ; ສໍາເລັດການເປີດຝຶກອົບຮົມກຸ່ມບ້ານປ້ອມໝັ້ນສູ້ຮົບຕິດລ່ຽນໄດ້ 2 ເມືອງ ແລະ 1 ນະຄອນ; ນອກນັ້ນ ຍັງໄດ້ລົງຊີ້ນໍາ-ນໍາພາການເຄື່ອນໄຫວກວດກາລາດຕະເວນຕາມຊາຍແດນລະຫວ່າງປະເທດ ເພື່ອຕ້ານ ແລະ ສະກັດກັ້ນບັນດາໜໍ່ແໜງ ທີ່ຈະກໍ່ໃຫ້ເກີດມີຄວາມບໍ່ສະຫງົບ ແລະ ປະກົດການຫຍໍ້ທໍ້ຕ່າງໆລຽບຕາມຊາຍແດນ; ໄດ້ຊີ້ນໍາ ແລະ ປັບປຸງລະບົບການເມືອງຢູ່ຂັ້ນຮາກຖານ ເພື່ອສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດທົ່ວແຂວງ, ໄດ້ຫັນກໍາລັງຕໍາຫຼວດ ລົງກໍ່ສ້າງຮາກຖານຢ່າງແຂງແຮງ, ສ້າງໄດ້ບ້ານປ້ອງກັນຄວາມສະຫງົບດີ ເພີ່ມຂຶ້ນ 188 ບ້ານ ລວມເປັນ 921 ບ້ານ ກວມ 89,9% ຂອງບ້ານທົ່ວແຂວງ; ສຸມໃສ່ແກ້ໄຂບັນຫາຢາເສບຕິດຕາມ 6 ວຽກຈຸດສຸມ ຕິດພັນກັບການແກ້ໄຂບັນດາປະກົດການຫຍໍ້ທໍ້ຕ່າງໆໃນສັງຄົມ ແລະ ປັບປຸງກົງຈັກຂອງກໍາລັງ ປກສ ແຕ່ລະຂັ້ນ, ບັນດາເຫຼົ່າວິຊາສະເພາະໃຫ້ເຂັ້ມແຂງ, ໂຄສະນາເຜີຍແຜ່ຜົນຮ້າຍຂອງຢາເສບຕິດ, ຂຶ້ນບັນຊີເປົ້າໝາຍຜູ້ຄ້າຂາຍຢາເສບຕິດ ລາຍນ້ອຍ-ລາຍໃຫຍ່, ຂຶ້ນບັນຊີພື້ນທີ່ຫຼໍ່ແຫຼມ ແລະ ສະຖານທີ່ມົ້ວສຸມຕາມເມືອງ ແລະ ນະຄອນ; ໃນ 6 ເດືອນຜ່ານມາ ສາມາດມ້າງຄະດີຢາເສບຕິດ 176 ລາຍ, ຢຶດຂອງກາງປະເພດເສບຕິດ, ອາວຸດສົງຄາມ, ພາຫະນະ, ເງິນສົດ ແລະ ຊັບສິນມີຄ່າຈໍານວນໜຶ່ງ, ດ້ານຄາດໝາຍດ້ານເສດຖະກິດມະຫາພາກ, ລວມຍອດຜະລິດຕະພັນພາຍໃນ (GDP) ບັນລຸໄດ້ 37,46% ຂອງແຜນການປີ, ດ້ວຍອັດຕາການຂະຫຍາຍຕົວໃນລະດັບ 4,62% ໃນນັ້ນ: ຂະແໜງກະສິກໍາ-ປ່າໄມ້ ຂະຫຍາຍ ຕົວເພີ່ມຂຶ້ນ 2,14%, ຂະແໜງອຸດສາຫະກໍາ ຂະຫຍາຍຕົວເພີ່ມຂຶ້ນ 8,72% ແລະ ຂະແໜງບໍລິການ ຂະຫຍາຍຕົວເພີ່ມຂຶ້ນ 1,49%, ໃນເດືອນ 6 ຕົ້ນປີ ເງິນເຟີ້ໃນແຂວງດີດໂຕສູງຂຶ້ນລະດັບ 2 ໂຕເລກ 30,04%, ສະເລ່ຍແຕ່ເດືອນ 1-6 ປີ 2022 ຢູ່ໃນລະດັບ 13,01% ລື່ນອັດຕາຄວບຄຸມ 8,01%, ການຈັດເກັບລາຍຮັບ ປະຕິບັດໄດ້ແລ້ວ 784,12 ຕື້ກີບ ເທົ່າ 46,50% ຂອງແຜນການປີ ໃນນັ້ນ ພູດສູນກາງ ປະຕິບັດໄດ້ 472,6 ຕື້ກີບ ເທົ່າ 49,6% ແລະ ພູດຂອງແຂວງ ປະຕິບັດໄດ້ 311,47 ຕື້ກີບ ເທົ່າ 42,38%; ການຈັດຕັ້ງປະຕິບັດໂຄງການລົງທຶນຂອງລັດ ບັນລຸໄດ້ 31,6% ຂອງແຜນການ, ບັນຍາກາດການລົງທຶນພາກເອກະຊົນ ທັງພາຍໃນ ແລະ ຕ່າງປະເທດ ປະຕິບັດໄດ້ 36,5%; ອັນພົ້ນເດັ່ນແມ່ນການລົງທຶນຂອງຕ່າງປະເທດ ທຽບໃສ່ໄລຍະດຽວກັນຂອງປີຜ່ານມາເຫັນວ່າເພີ່ມຂຶ້ນ 35,8% ສະເພາະຕົ້ນປີ 2022 ເຫັນວ່າປະຊາຊົນແຕ່ລະເມືອງ ໄດ້ມີຄວາມຕື່ນຕົວສູງປະກອບສ່ວນໃນການຟື້ນຟູ – ສ້ອມແປງພື້ນຖານໂຄງລ່າງຂອງບ້ານ ເປັນຂະບວນຟົດຟື້ນດີ ຊຶ່ງສະແດງອອກທຶນສົມທົບທັງໝົດ ໃນ 6 ເດືອນຜ່ານມາ ປະຕິບັດໄດ້ 86,8%, ນອກນີ້, ອົງການປົກຄອງແຂວງ ໄດ້ຍູ້ແຮງການຜະລິດເປັນສິນຄ້າຂອງຊາວກະສິກອນໃນລະດູແລ້ງ ແລະ ລະດູຝົນຢ່າງແຂງແຮງ, ເພື່ອຄໍ້າປະກັນສະບຽງອາຫານໄດ້ພຽງພໍທົ່ວສັງຄົມ ຕິດພັນກັບການຜະລິດກະສິກໍາ ເປັນວັດຖຸດິບສະໜອງໃຫ້ແກ່ອຸດສາຫະກໍາປຸງແຕ່ງກະສິກໍາດ້ວຍການຫັນເປັນທັນສະໄໝເທື່ອລະກ້າວ; ສືບຕໍ່ສຸມໃສ່ການຈັດສັນກໍານົດເຂດດິນກະສິກໍາ ແລະ ປັກຫຼັກໝາຍເຂດສະຫງວນໃນການຜະລິດພືດສິນຄ້າບຸລິມະສິດ ທີ່ໄດ້ມີຕະຫຼາດຮອງຮັບ; ໃນ 6 ເດືອນຕົ້ນປີ ສາມາດຜະລິດເຂົ້ານາແຊງໄດ້ 145.786 ໂຕນ, ດ້ວຍສະມັດຖະພາບ 4,82 ໂຕນຕໍ່ເຮັກຕາ, ການປັກດໍາເຂົ້ານາປີສໍາເລັດແລ້ວ 127.462 ເຮັກຕາ ເທົ່າກັບ 62,8% ຂອງແຜນການປີ; ຄາດວ່າການປັກດໍາຈະເພີ່ມຂຶ້ນ ແລະ ສໍາເລັດ 100% ໃນທ້າຍເດືອນກໍລະກົດນີ້. ສໍາລັບການຜະລິດຊີ້ນ, ປາ ແລະ ໄຂ່ ສະໜອງຕະຫຼາດພາຍໃນແຂວງ ປະຕິບັດໄດ້ 47.710 ໂຕນ, ສະເລ່ຍໃສ່ຫົວຄົນບັນລຸໄດ້ 44,02 ກິໂລຕໍ່ຄົນ.

ສັງລວມແລ້ວ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີຂອງແຂວງ ເຫັນວ່າ ເສດຖະກິດມະຫາພາກ ຍັງສືບຕໍ່ຂະຫຍາຍຕົວ ແລະ ໄປຕາມທິດຫັນເປັນອຸດສາຫະກຳທັນສະໄໝ ໂດຍຂະແໜງອຸດສາຫະກຳປຸງແຕ່ງເປັນຕົວຂັບເຄື່ອນເສດຖະກິດ, ສ່ວນວັດທະນາທຳ-ສັງຄົມ ກໍມີຄວາມຄືບໜ້າຫຼາຍດ້ານ; ຂະບວນການຜະລິດເປັນສິນຄ້າມີລັກສະນະຕັ້ງໜ້າ; ການຄຸ້ມຄອງລັດ ຄຸ້ມຄອງສັງຄົມດ້ວຍກົດໝາຍ ກໍມີທ່ວງທ່າດີຂຶ້ນເທື່ອລະກ້າວ.