ແມນຢູ ດຶງ ເຟີກູສັນ ຮັບບົດບາດຜູ້ຕັດສິນໃຈທິດທາງສະໂມສອນ

ແມນເຊສເຕີ ຢູໄນເຕັດ ດຶງຕຳນານຜູ້ຈັດການທີມ ເຊີອາເລັກ ເຟີກູສັນ ມາເຮັດວຽກສຳຄັນອີກເທື່ອຫນຶ່ງໃນບົດບາດຜູ້ມີອຳນາດຕັດສິນໃຈການເຄື່ອນໄຫວຂອງສະໂມສອນ.

ສຳນັກຂ່າວ ເດລີ ເມລ ລາຍງານວ່າ : ແມນເຊສເຕີ ຢູໄນເຕັດ ທີມດັງແຫ່ງພຣີເມຍລີກ ອັງກິດ ຕັດສິນໃຈດຶງຕຳນານຜູ້ຈັດການທີມ ເຊີອາເລັກ ເຟີສູນ ມາເຮັດວຽກໃຫ້ອີກເທື່ອຫນຶ່ງ ໂດຍໃຫ້ຢູ່ໃນບົດບາດຂອງທີມງານທີ່ມີອຳນາດຕັດສິນໃຈການເຄື່ອນໄຫວຂອງສະໂມສອນ.

ເຟີກູສັນ ເຄີຍເຮັດຫນ້າທີ່ຜູ້ຈັດການທີມໃຫ້ແມນຢູ ໃນໄລຍະປີ 1986-2013 ພາທີມປະສົບຄວາມສຳເລັດຢ່າງຫລວງຫລາຍ ທັງຄວ້າແຊ໊ມພຣີເມຍລີກ 13 ສະໄຫມ, ເອຟເອ ຄັບ 5 ສະໄຫມ, ລີກ ຄັບ 4 ສະໄຫມ,​ ຢູຟາ ແຊ໊ມປຽນ ລີກ 2 ສະໄຫມ ແລະ ແຊ໊ມປຽນລີກອີກຫລາຍສະໄຫມ.

ຫລັງອຳລາຕຳແຫນ່ງຜູ້ຈັດການທີມໃນປີ 2013 ລາວກໍຢູ່ໃນຖານະຜູ້ອຳນວຍການທີ່ບໍ່ກ່ຽວຂ້ອງກັບວຽກບໍລິຫານມາຕະຫລອດ ແຕ່ລາຍງານລະບຸວ່າ ຣິຊາດ ອາໂນລ ປະທານບໍລິຫານຄົນປັດຈຸບັນຂອງແມນຢູ ຈະໃຫ້ຕຳນານສະໂມສອນຄົນນີ້ມີບົດບາດຕໍ່ການບໍລິຫານອີກເທື່ອຫນຶ່ງ.

ໂດຍລາຍງານເປີດເຜີຍວ່າ ອາໂນລ ຈະໃຫ້ ເຟີກູສັນ ມາຮ່ວມທີມງານລະດົມຄວາມຄິດຂອງທີມ ເຊິ່ງຍັງມີບຸກຄົນສຳຄັນຂອງສະໂມສອນຄົນອື່ນໆ ເຊ່ັນ : ເດວິດ ກິລ ອະດີດປະທານບໍລິຫານ, ໄບຣອັນ ຣ໊ອບສັນ ຕຳນານກອງກາງ ຫລື ຈອນ ເມີທັບ ຜູ້ອຳນວຍການບານເຕະຄົນປັດຈຸບັນ ຢູ່ໃນທີມນຳອີກ.

ສຳລັບຈຸດປະສົງທີ່ ອາໂນລ ຕັ້ງທີມດັ່ງກ່າວຂຶ້ນມານັ້ນ ເພື່ອສະຫນັບສະໜູນການເຮັດວຽກຂອງຜູ້ຈັດການທີມຄົນໃຫມ່ ຄື ອີຣິກ ເທນ ຮາກ  ແລະ ຈະໄດ້ພິຈາລະນາເສັ້ນທາງອະນາຄົດຂອງສະໂມສອນໂດຍອາໄສມຸມມອງທຸກດ້ານຈາກຜູ້ມີປະສົບການ.