5 ວິທີຊ່ວຍຟື້ນຟູຈິດໃຈກ້າວຂ້າມວິກິດໂຄວິດ-19.

     ເຖິງວ່າສະຖານະການການແຜ່ລະບາດຂອງໂຄວິດ – 19 ຈະເລີ່ມຜ່ອນຄາຍລົງແດ່ແລ້ວ ການປົດລັອກອາດເຮັດໃຫ້ຜູ້ຄົນສາມາດອອກມາໃຊ້ຊີວິດໄດ້ຕາມປົກກະຕິກັນຫລາຍຂຶ້ນ,​ ແຕ່ກໍຍັງຕ້ອງຢູ່ພາຍໃຕ້ຂໍ້ປະຕິບັດ ແລະ ມາດຕະການທີ່ເຂັ້ມງວດທາງສັງຄົມທີ່ຈະຕ້ອງເຮັດຮ່ວມກັນ ຫລື ທີ່ເອີ້ນວ່າການປັບປ່ຽນພຶດຕິກຳ ເພື່ອປ້ອງກັນບໍ່ໃຫ້ມີການແຜ່ລະບາດຄັ້ງໃໝ່ເກີດຂຶ້ນ ເຊິ່ງການປ່ຽນພຶດຕິກຳການໃຊ້ຊີວິດແບບກະທັນຫັນນັ້ນ ໄດ້ສົ່ງຜົນກະທົບຫລາຍດ້ານ ບໍ່ວ່າຈະເປັນດ້ານການດຳລົງຊີວິດ, ເສດຖະກິດ, ສັງຄົມ, ການສຶກສາ ໂດຍສະເພາະຜົນກະທົບຕໍ່ສະພາບຈິດໃຈ ທີ່ຫາກເຮົາບໍ່ຮູ້ຈັກວິທີຮັບມືຢ່າງຖືກວິທີ ໃນໄລຍະຍາວອາດສ້າງບາດແຜທາງຈິດໃຈ ສົ່ງຜົນໃຫ້ເກີດເປັນພະຍາດທາງຈິດຕ່າງໆຕາມມາໄດ້. ມື້ນີ້ພວກເຮົາຈຶ່ງໄດ້ລວບລວມວິທີການຮັບມືກັບສະພາບຈິດໃຈໃຫ້ສາມາດກ້າວຂ້າມວິກິດມາໃຫ້ທຸກທ່ານໄດ້ລອງເຮັດຕາມກັນໄດ້ ດັ່ງນີ້ :

1. ມີສະຕິ ແລະ ຢູ່ກັບປັດຈຸບັນ : ເມື່ອມີການປ່ຽນແປງເກີດຂຶ້ນ ສິ່ງທຳອິດທີ່ຄວນເຮັດແມ່ນການຕັ້ງສະຕິ, ສ້າງຄວາມເຂົ້າໃຈວ່າສະຖານະການທີ່ເກີດຂຶ້ນຕອນນີ້ນັ້ນ ເປັນສິ່ງທີ່ເຮົາບໍ່ສາມາດຄວບຄຸມໄດ້, ຄວນກັບມາຢູ່ກັບປັດຈຸບັນ, ຮູ້ທັນ ແລະ ເປີດຮັບການມີຢູ່ຂອງອາລົມຄວາມຮູ້ສຶກ ເພາະເປັນທຳມະດາຂອງມະນຸດທີ່ຫາກຕ້ອງຕົກຢູ່ໃນສະຖານະການທີ່ບໍ່ສາມາດຄວບຄຸມໄດ້ ມັນຈະມີຄວາມຄິດທີ່ເປັນກັງວົນເກີດຂຶ້ນມາສະເໝີ. ດັ່ງນັ້ນ ການມີສະຕິ, ເຂົ້າໃຈໂຕເອງ, ກ້າພະເຊີນໜ້າກັບບັນຫາທີ່ເຂົ້າມາ ແລະ ເບິ່ງວ່າມີຫຍັງທີ່ເຮົາສາມາດເຮັດໄດ້ແດ່ ແມ່ນວິທີຮັບມືທີ່ດີທີ່ສຸດ.
2. ຄົ້ນຫາໂຕຕົນໃນດ້ານໃໝ່ : ຫລາຍຄົນອາດຈະເບິ່ງວ່າໄລຍະນີ້ມີເວລາວ່າງ ແລະ ຢູ່ກັບໂຕເອງຫລາຍເກີນໄປ ຈົນຈິດໃຈຫ່ຽວແຫ້ງ ບໍ່ຄ່ອຍໄດ້ອອກໄປພົບປະໝູ່ເພື່ອນຄືແຕ່ກ່ອນ, ແຕ່ຄວາມຈິງແລ້ວ ການໄດ້ຢູ່ກັບໂຕເອງຫລາຍຂຶ້ນນັ້ນ ອາດເຮັດໃຫ້ເຮົາພົບເຫັນໂຕເອງໃນດ້ານໃໝ່ໆ ທີ່ບໍ່ເຄີຍຮູ້ມາກ່ອນ ເຊັ່ນ : ຈາກທີ່ປຸງແຕ່ງອາຫານບໍ່ເປັນ ກໍຄົ້ນພົບວ່າໂຕເອງສາມາດປຸງແຕ່ງອາຫານໄດ້ແຊບ ທັງຍັງເປັນກິດຈະກຳທີ່ສ້າງສັນ, ຊ່ວຍຮັດແໜ້ນຄວາມສຳພັນຂອງຄົນໃນຄອບຄົວໄດ້ເປັນຢ່າງດີ ຫລື ບາງຄົນທີ່ເຄີຍຄິດວ່າຕົນເອງຫລຸດນຳ້ໜັກບໍ່ໄດ້ ກໍໃຊ້ໄລຍະເວລານີ້ຟິດຮູບຮ່າງອອກກຳລັງກາຍ, ປ່ຽນໂຕເອງໃຫ້ເປັນຄົນໃໝ່ທີ່ດີຂຶ້ນທັງຮູບຮ່າງ, ສຸຂະພາບ ແລະ ຈິດໃຈ.
3. ຕິດຕາມຂ່າວສານແຕ່ພໍດີ : ການເສບຂ່າວສານກ່ຽວກັບໂຄວິດ – 19 ຍັງເປັນເລື່ອງຈຳເປັນ, ແຕ່ການຮັບຮູ້ຂໍ້ມູນຫລາຍເກີນໄປອາດເຮັດໃຫ້ເກີດຄວາມວິຕົກກັງວົນໄດ້. ດັ່ງນັ້ນ ຄວນຕິດຕາມຂ່າວສານແຕ່ພໍດີເພື່ອປ້ອງກັນການເສບສື່ຫລາຍເກີນໄປຈົນຮູ້ສຶກເຄັ່ງຄຽດ ແລະ ເລືອກເສບສະເພາະແຫ່ລງຂ່າວທີ່ເຊື່ອຖືໄດ້ ເຊັ່ນ : ໜ່ວຍງານຂອງລັດຖະບານ ແລະ ອົງກອນດ້ານສາທາລະນະສຸກ, ບໍ່ສົ່ງຕໍ່ຂ່າວທີ່ໄດ້ຮັບມາຈາກໃນຂໍ້ຄວາມອອນລາຍ ເນື່ອງຈາກມີໂອກາດເປັນຂ່າວປອມສູງ.
4. ສົ່ງຕໍ່ພະລັງໃຈທີ່ສ້າງສັນ : ເຖິງຈະຕ້ອງເວັ້ນໄລຍະຫ່າງທາງສັງຄົມ ຫລື ປັບພຶດຕິກຳການດຳລົງຊີວິດ, ແຕ່ເຮົາຍັງສາມາດດູແລ ແລະ ເອົາໃຈໃສ່ຄົນອ້ອມຂ້າງໄດ້ ໂດຍການໂອ້ລົມກັບໝູ່ເພື່ອນຜ່ານທາງຂໍ້ຄວາມ ຫລື Video Call ແລະອື່ນໆໄດ້ຕາມປົກກະຕິ ຫລື ຫາກຍ່າງຜ່ານກໍສົ່ງຮອຍຍິ້ມທັກທາຍກັນ ໂດຍແນະນຳວ່າໃຫ້ພະຍາຍາມຫລີກເວັ້ນການເວົ້າເຖິງໂຄວິດ – 19 ແລະ ປ່ຽນໄປລົມກັນໃນເລື່ອງທົ່ວໄປ ຖາມໄຖ່ທຸກສຸກຂອງຄົນອ້ອມຂ້າງແດ່ ເຖິງຈະເບິ່ງເປັນເລື່ອງເລັກນ້ອຍ, ແຕ່ສິ່ງເຫລົ່ານີ້ຈະຊ່ວຍຄາຍຄວາມຮູ້ສຶກໂດດດ່ຽວ ແລະ ຫລຸດຜ່ອນຈາກຄວາມເຄັ່ງຄຽດຂອງໂຕເຮົາເອງ ແລະ ຄົນອ້ອມຂ້າງໄດ້.
5. ປຶກສາຈິດຕະແພດ : ແນ່ນອນວ່າໃນສະຖານະການແບບນີ້ຫລາຍຄົນອາດຈະຕ້ອງພະເຊີນກັບຄວາມເຄັ່ງຄຽດ ເຊິ່ງເປັນສິ່ງທີ່ຫລີກເວັ້ນບໍ່ໄດ້, ແຕ່ການຮັບມືກັບຄວາມເຄັ່ງຄຽດທີ່ເກີດຂຶ້ນຂອງແຕ່ລະຄົນນັ້ນ ມີປະສິດທິພາບບໍ່ເທົ່າກັນ ຄົນທົ່ວໄປອາດຈະໃຊ້ເວລາໃນການປັບໂຕບໍ່ດົນ,​ ແຕ່ຄົນທີ່ມີບັນຫາເຕົ້າໂຮມສຸມໃສ່ ໄດ້ຮັບຜົນກະທົບຫລາຍຈົນຈັດການກັບຄວາມເຄັ່ງຄຽດໄດ້ບໍ່ດີພໍ ຫລື ຜູ້ທີ່ມີອາການທາງຈິດ ອາດຈຳເປັນຕ້ອງເຂົ້າຮັບການປຶກສາແພດ ແລະ ໂອ້ລົມກັບຈິດຕະແພດເພື່ອຫາວິທີຮັບມືກັບເຫດການທີ່ເກີດຂຶ້ນ ເຊິ່ງໃນປັດຈຸບັນການປຶກສາຈິດຕະແພດນັ້ນ ບໍ່ແມ່ນເລື່ອງໄກໂຕອີກຕໍ່ໄປ ເພາະນອກຈາກຈະຊ່ວຍຮັກສາສຸຂະພາບຈິດໄດ້ຢ່າງຖືກວິທີແລ້ວ ຍັງເຮັດໃຫ້ເຮົາຮັບມືກັບບັນຫາອື່ນໆໄດ້ດີຂຶ້ນນຳ.