6 ເດືອນຕົ້ນປີ 2022 ນະຄອນຫລວງວຽງຈັນ ເກັບລາຍຮັບໄດ້ 2.611,95 ຕື້ ກີບເທົ່າກັບ 46,84% ຂອງແຜນປີ

ທ່ານ ສິລິລາດທົງສິນ ທອງເພັງ ຫົວໜ້າພະແນກການເງິນ ນະຄອນຫຼວງວຽງຈັນ, ໄດ້ລາຍງານ ກອງປະຊຸມສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ວັນທີ 28 ກໍລະກົດ 2022 ນີ້ ວ່າ: ວາງທິດທາງແຜນການ 6 ເດືອນທ້າຍປີ 2022 ແລະ ຜັນຂະຫຍາຍວາລະແຫ່ງຊາດຂອງພະແນກ ການເງິນ ນະຄອນຫຼວງວຽງຈັນນໍາອີກດ້ວຍ.

ການຈັດຕັ້ງປະຕິບັດແຜນງົບປະມານແຫ່ງລັດປີ 2022 ທັງໝົດ 5.576,34 ຕື້ກີບ, ແຕ່ຜ່ານການຈັດຕັ້ງປະຕິບັດໃນ 6 ເດືອນຕົ້ນປີ 2022 ສາມາດຈັດເກັບລາຍຮັບໄດ້ 2.611,95 ຕື້ ກີບເທົ່າກັບ 46,84% ຂອງແຜນປີ ທຽບໃສ່ໄລຍະດຽວກັນຂອງປີຜ່ານມາລື່ນ 20,92% ເທົ່າກັບ 451,96 ຕື້ກີບ. ໃນນັ້ນ, ພູດສູນກາງ (ພາສີ) ໄດ້ຮັບແຜນການຈັດເກັບຈໍານວນ 4.100 ຕື້ກີບ, ປະຕິບັດໄດ້ 1.858,30 ຕື້ກີບເທົ່າກັບ 45,32% ຂອງແຜນການປີທຽບໃສ່ໄລຍະດຽວກັນຂອງປີຜ່ານມາລື່ນ 15,23% ເທົ່າກັບ 245,66 ຕື້ກີບ, ລາຍຮັບທ້ອງຖິ່ນຢູ່ ນວ ໄດ້ຮັບແຜນການຈັດເກັບລາຍຮັບຈໍານວນ 1.476,34 ຕື້ກີບ, ປະຕິບັດໄດ້ 753,65 ຕື້ກີບເທົ່າກັບ 51,05% ຂອງແຜນການປີທຽບໃສ່ໄລຍະດຽວກັນຂອງປີຜ່ານມາລື່ນ 37,69% ເທົ່າກັບ 206,30 ຕື້ກີບ.

ສ່ວນຂັ້ນເມືອງທົ່ວນະຄອນຫຼວງວຽງຈັນ, ມີ 5 ເມືອງຍັງປະຕິບັດບໍ່ໄດ້ຕາມແຜນ 6 ເດືອນຕົ້ນປີ ແລະ 4 ເມືອງສາມາດປະຕິບັດລາຍຮັບໄດ້ລື່ນແຜນ 6 ເດືອນຕົ້ນປີຄື: ເມືອງສີໂຄດຕະບອງ ປະຕິບັດໄດ້ 53,89% ຂອງແຜນການປີ; ເມືອງໄຊທານີ ປະຕິບັດໄດ້ 56,48% ຂອງແຜນການປີ; ເມືອງຫາດຊາຍຟອງ ປະຕິບັດໄດ້ 54,74% ຂອງແຜນການປີ; ເມືອງປາກງື່ມ ປະຕິບັດໄດ້ 56,96% ຂອງແຜນການປີ.

ດ້ານລາຍຈ່າຍລາຍຈ່າຍປະຕິບັດໄດ້ 276,79 ຕື້ກີບເທົ່າກັບ 44,26% ຂອງແຜນການປີ. ໃນນັ້ນ, ລາຍຈ່າຍບໍລິຫານປົກກະຕິ ປະຕິບັດໄດ້ 230,75 ຕື້ກີບເທົ່າກັບ 45,96% ຂອງແຜນການປີ;ລາຍຈ່າຍການລົງທຶນຂອງລັດປະຕິບັດໄດ້ 46,04 ຕື້ກີບເທົ່າກັບ 37,32% ຂອງແຜນການປີ.