ແມນຢູປະກາດເບີເສື້ອ ອີຣິກເຊັນ-ມາຕີເນສ ສານຕໍ່ສອງອະດີດດາວດັງ

ແມນເຊສເຕີ ຢູໄນເຕັດ ປະກາດເບີເສື້ອຂອງສອງນັກເຕະໃຫມ່ຢ່າງ ຄຣິສຕຽນ ອີຣິກເຊັນ ແລະ ລີຊານໂດຣ ມາຕີເນສ ອອກມາເປັນທີ່ຮຽບຮ້ອຍ.

ແມນເຊສເຕີ ຢູໄນເຕັດ ສະໂມສອນໃຫຍ່ແຫ່ງພຣີເມຍລີກອັງກິດ ຢືນຢັນ ຄຣິາຕຽນ ອີຣິກເຊັນ ກອງກາງທີມຊາດເດນມາກ ຈະສວມເສື້ອຫມາຍເລກ 14 ແລະ ລີຊານໂດຣ ມາຕີເນສ ກອງຫລັງທີມຊາດອາເຈນຕີນາ ຈະໃຊ້ຫມາຍເລກ 6 ໃນການຫລິ້ນກັບແມນຢູ.

ສຳລັບ ມາຕີເນສ ຍ້າຍຈາກ ອາແຈັກ ອຳເຕີດຳ ມາຢູ່ກັບ ແມນຢູ ດ້ວຍຄ່າຕົວ 47 ລ້ານປອນ ບວກໂບນັສອີກ 8,5 ລ້ານປອນ ເຊັນສັນຍາຍາວ 5 ປີ ຫລືຈົນເຖິງປີ 2027 ສ່ວນ ອີຣິກເຊັນ ຍ້າຍມາແບບບໍ່ມີຄ່າຕົວ ຫລັງຫມົດສັນຍາກັບ ເບຣນຟອດ ໂດຍເຊັນສັນຍາ 3 ປີ ເຊິ່ງ ອີຣິເກຊນ ໃສ່ເບີ 14 ແທນທີ່ ລິນກາດ ທີ່ຍ້າຍໄປຢູ່ກັບ ນັອດຕິງ ແຮມ ຟໍເຣສ ສ່ວນ ມາຕີເນສ ໃຊ້ເບີ 6 ຕໍ່ຈາກ ພອລ ປັອກບາ ທີ່ຍ້າຍໄປຢູ່ກັບ ຢູເວນຕຸສ.

ທັງນີ້ ມາຕີເນສ ແລະ ອີຣິກເຊັນ ປະເດີມນັດທຳອິດໃຫ້ກັບ ແມນຢູ ໄປແລ້ວໃນເກມອຸ່ນເຄື່ອງແບບປິດກັບ ເຣັດແຮມ ໂດຍທັງຄູ່ມີຕາຕະລາງລົງຊ່ວຍແມນຢູ ອຸ່ນເຄື່ອງກັບ ແອດເລຕີໂກ ມາດຣິດ ໃນວັນເສົານີ້ ຈາກນັ້ນຈະພົບກັບ ບາເຢກາໂນ ໃນວັນອາທິດຕໍ່ໄປ.