ພົບຜູ້ຕິດເຊື້ອຄົນທີ 4 ຂອງໂລກ ຫາຍດີຈາກ HIV ຫລັງປ່ຽນໄຂກະດູກ
ແພດຢືນຢັນວ່າ: ຜູ້ຊາຍຄົນໜຶ່ງທີ່ດຳລົງຊີວິດຢູ່ຮ່ວມກັບເຊື້ອ HIV ຫລາຍກວ່າ 30 ປີ ອາດໄດ້ຮັບການປິ່ນປົວຫາຍດີແລ້ວ ເຊິ່ງຖືເປັນຄົນທີ 4 ຂອງໂລກທີ່ປິ່ນປົວຈົນສຳເລັດ.
ຜູ້ຊາຍອາຍຸ 66 ປີ ເຊິ່ງບໍ່ຕ້ອງການເປີດເຜີຍຊື່ສຽງຮຽງນາມ ໄດ້ຮັບການປູກປ່ຽນໄຂກະດູກເພື່ອປິ່ນປົວມະເຮັງເມັດເລືອດຂາວ, ລາວໄດ້ຮັບບໍລິຈາກໄຂກະດູກຈາກຜູ້ບໍລິຈາກທີ່ມີຈຸລັງດື້ຕໍ່ໄວຣັສ HIV ໂດຍທຳມະຊາດ ສົ່ງຜົນໃຫ້ປັດຈຸບັນຜູ້ຊາຍຄົນນີ້ບໍ່ພົບໄວຣັສໃນຮ່າງກາຍອີກຕໍ່ໄປ ແລະ ຢຸດກິນຢາຕ້ານໄວຣັສແລ້ວ.
ລາວກ່າວໃນຖະແຫລງການວ່າ: “ເມື່ອຂ້ອຍໄດ້ຮັບການບົ່ງມະຕິວ່າຕິດເຊື້ອ HIV ໃນປີ 1988 ຂ້ອຍກໍຄືກັບຄົນອື່ນໆອີກຫລາຍຄົນ ຂ້ອຍຄິດວ່າມັນຄືໂທດປະຫານ ຂ້ອຍບໍ່ເຄີຍຄິດວ່າຈະມີຊີວິດຢູ່ມາຈົນໄດ້ເຫັນມື້ທີ່ບໍ່ມີເຊື້ອ HIV ຢູ່ໃນຮ່າງກາຍຂ້ອຍອີກຕໍ່ໄປແລ້ວ”.
HIV (Human Immunodeficiency Virus) ເປັນເຊື້ອໄວຣັສທີ່ທຳລາຍລະບົບພູມຕ້ານທານຂອງມະນຸດ ກໍ່ໃຫ້ເກີດພະຍາດພູມຕ້ານທານບົກພ່ອງ ເຊິ່ງລວມທັງພະຍາດເອດສ໌ (AIDS) ໝູ່ຂອງລາວຫລາຍຄົນເສຍຊີວິດຈາກເຊື້ອ HIV ໃນຍຸກນັ້ນ ກ່ອນທີ່ຢາຕ້ານໄວຣັສຈະເຮັດໃຫ້ຜູ້ຕິດເຊື້ອມີອາຍຸໃກ້ຄຽງປົກກະຕິ.
ຜູ້ຊາຍຄົນນີ້ຮູ້ຈັກໃນນາມຄົນເຈັບ “City of Hope” ເຊິ່ງເປັນສູນມະເຮັງຄົບວົງຈອນໃນເມືອງດູອາຣ໌ເຕ ລັດແຄລິຟໍເນຍ ໂດຍລາວເຂົ້າຮັບການປິ່ນປົວພະຍາດມະເຮັງຢູ່ບ່ອນນີ້.
ທີມແພດຕັດສິນໃຈວ່າລາວຈຳເປັນຕ້ອງໄດ້ຮັບການປ່ຽນຖ່າຍໄຂກະດູກ ເພື່ອທົດແທນຈຸລັງເມັດເລືອດທີ່ເປັນມະເຮັງ ແລະ ເປັນເລື່ອງບັງເອີນທີ່ໄຂກະດູກຈາກຜູ້ບໍລິຈາກຕ້ານທານ HIV ໄດ້.
ຄົນເຈັບ City of Hope ໄດ້ຮັບການຕິດຕາມອາການຢ່າງໃກ້ຊິດຫລັງການປ່ຽນຖ່າຍ ແລະ ຕອນນີ້ລາວຢູ່ໃນໄລຍະພະຍາດສະຫງົບ (Remission) ມາດົນກວ່າ 17 ເດືອນແລ້ວ.
ເຖິງຢ່າງໃດກໍຕາມ, ການປ່ຽນຖ່າຍໄຂກະດູກບໍ່ແມ່ນການປະຕິວັດວິທີການປິ່ນປົວ HIV ສຳລັບຜູ້ຕິດເຊື້ອ 38 ລ້ານຄົນທົ່ວໂລກໃນປັດຈຸບັນ ເນື່ອງຈາກເປັນຂັ້ນຕອນສັບຊ້ອນ ແລະ ອາດເກີດຜົນຂ້າງຄຽງໄດ້. ດັ່ງນັ້ນ ຈຶ່ງບໍ່ແມ່ນທາງເລືອກທີ່ເໝາະສົມສຳລັບຄົນສ່ວນຫລາຍທີ່ຕິດເຊື້ອ HIV.
ອ້າງອີງ:
