Facebook ສົ່ງແອັບແຕ່ງຮູບ  Colorful Balloons ເຈາະຕະຫຼາດຈີນ

ຄືທີ່ຮູ້ກັນດີວ່າ ໃນປະເທດຈີນມີ Great Firewall ຫຼື ກໍາແພງເມືອງຈີນທີ່ເປັນມາດຕະການປ້ອງກັນ ແລະ ປິດກັ້ນສື່ ຫຼື ສັງຄົມອອນລາຍຈາກອາເມລິກາມາຕະຫຼອດ ໂດຍສະເພາະ Twitter, Google ແລະ Facebook ເຊິ່ງຄົນໃນປະເທດຈີນບໍ່ສາມາດເຂົ້າໃຊ້ໄດ້. ແນວໃດກໍຕາມ ຫລ້າສຸດ Mark Zuckerberg ຈະແກ້ໄຂໄຫມ່ອີກຄັ້ງ ດ້ວຍການເປີດຕົວແອັບແຕ່ງຮູບ-ແຊຮູບພາບ ຊື່ວ່າ ‘Colorful Balloons’  ຜ່ານໃນນາມບໍລິສັດຈີນ Youge Internet Technology  ເພື່ອເຂົ້າເຖິງຜູ້ໃຊ້ອິນເຕີເນັດຈໍານວນມະຫາສານກວ່າ 700 ລ້ານຄົນໃນປະເທດຈີນ.

ທາງດ້ານຕົວແທນຂອງ Facebook ເອງບໍ່ໄດ້ອອກມາປະຕິເສດການເຄື່ອນໄຫວດັ່ງກ່າວແຕ່ຢ່າງໃດ. ນອກຈາກນີ້ ຍັງເນັ້ນຄວາມສົນໃຈທີ່ມີຕໍ່ຕະຫຼາດຜູ້ບໍລິໂພກໃນປະເທດຈີນມາຕະຫຼອດ ໂດຍລະບຸກັບທາງ New York Times ວ່າ: ເຮົາໃຊ້ເວລາສຶກສາຕະຫຼາດຈີນ ເພື່ອທໍາຄວາມເຂົ້າໃຈແບບເຈາະເລິກທຸກລາຍລະອຽດມາດົນແລ້ວ ສິ່ງທີ່ເຮົາຢາກເນັ້ນໜັກໃນເວລານີ້ ຄືພະຍາຍາມຊ່ວຍເຫຼືອນັກທຸລະກິດຈີນ ລວມເຖິງບັນດານັກພັດທະນາສາມາດຂະຫຍາຍຊ່ອງທາງການເຮັດຕະຫຼາດນອກປະເທດຈີນໄດ້ຜ່ານແພລຟອຣ໌ມໂຄສະນາຂອງເຂົາ.

ສໍາລັບແອັບ Colorful Balloons ນັ້ນໄດ້ເລີ່ມມີການທົດສອບໃຊ້ມາແຕ່ເດືອນພຶດສະພາ ເຊິ່ງໃນເວລານີ້ຍັງເປັນແອັບແຕ່ງຮູບທີ່ຍັງຕ້ອງແຊຜ່ານແອັບແຊັດເຈົ້າຖິ່ນເຊັ່ນ WeChat ໂດຍຄາດວ່າແອັບດັ່ງກ່າວເປັນການສໍາຫລວດຕະຫຼາດຜູ້ໃຊ້ໃນປະເທດຈີນກ່ອນເປັນອັນດັບທໍາອິດ. ຂະນະດຽວກັນເປັນທີ່ເຂົ້າໃຈວ່າໃນເວລານີ້ທີມຜູ້ບໍລິການຂອງ Facebook ພະຍາຍາມສ້າງການພົວພັນທີ່ດີກັບລັດຖະບານຈີນ ເພື່ອການປູທາງໄປສູ່ການເປີດປະຕູໃຫ້ Facebook ກັບໄປໃຊ້ໄດ້ໃນປະເທດຈີນອີກຄັ້ງ ນັບແຕ່ຖືກລັອກໃນປີ 2009 ເຊິ່ງທາງ Mark Zuckerberg ເອງກໍເຂົ້າພົບກັບບຸກຄົນສໍາຄັນໃນລັດຖະບານຈີນ ລວມເຖິງຍັງເຄີຍສະແດງຮູບໃນນະຄອນປັກກິ່ງ ອີກທັງຍັງຮຽນພາສາແມນດາຣິນຈົນຢູ່ໃນລະດັບສູງໄປແລ້ວ.

ຕ້ອງມາເບິ່ງກັນວ່າ Colorful Balloons ນັ້ນຈະເປີດໃຊ້ໄດ້ລາບລື່ນດີ ຫຼື ບໍ່ ເຊິ່ງໜ້າສົນໃຈວ່າການຕອບຮັບທີ່ລັດຖະບານຈີນມີຕໍ່ແອັບດັ່ງກ່າວອາດເປັນຄໍາຕອບຊີ້ຊະຕາກໍາຂອງ Facebook ກັບການເຈາະຕະຫຼາດຈີນໃນອະນາຄົດກໍເປັນໄດ້.