ແຮງງານທີ່ຖືກສົ່ງໄປເຮັດວຽກຢູ່ ສ.ເກົາຫລີ ຕ້ອງປະຕິບັດຕາມສັນຍາ ແລະ ລະບຽບການເຄັ່ງຄັດ ເພື່ອຮັກສາສິດເພື່ອທຸກຄົນ
ທ່ານ ນາງ ວັນນີ ແກ້ວໄຊຍະວົງ ຮອງກົມການຈັດຫາງານ ໄດ້ລາຍງານເນື່ອງໃນໂອກາດການປະຖົມນິເທດແຮງງານກ່ອນເດີນທາງໄປ ສ.ເກົາຫລີ ວັນທີ 22 ກໍລະກົດ 2022 ນີ້ວ່າ: ນັບແຕ່ເດືອນຕຸລາ 2016 ເປັນຕົ້ນມາ, ສຳລັບແຮງງານລາວທີ່ຈະໄປເຮັດວຽກ ໄລຍະ 3-5 ປີ ຢູ່ ສ. ເກົາຫລີ ແມ່ນຕ້ອງໄດ້ຜ່ານການສອບເສັງ ແລະ ສາມາດໃຊ້ພາສາເກົາຫລີ ໃຫ້ໄດ້ໂດຍພື້ນຖານ, ສະໝັກເຂົ້າສອບເສັງພາສາເກົາຫລີ, ສອບເສັງທັກສະ ແລະ ສີມືແຮງງານ.
ຜ່ານການຈັດຕັ້ງປະຕິບັດ ມີແຮງງານລາວ ທີ່ໄປເຮັດວຽກຢູ່ ສ.ເກົາຫລີ ມີຢູ່ 2 ຄື ເຮັດວຽກໃນລົບບົບການອະນຸຍາດຈ້າງງານ ລະບົບ EPS ມີອາຍຸການ 3-5 ປີ ແມ່ນເຮັດວຽກຢູ່ໂຮງຈັກ, ໂຮງງານຂະໜາດນ້ອຍ; ມາຮອດປະຈຸບັນມີທັງໝົດ 721 ຄົນ, ຍິງ 49 ຄົນ ໃນນີ້ມີແຮງງານທີ່ເດີນທາງກັບມາບ້ານແລ້ວ 35 ຄົນ ແລະ ແຮງງານລະບົບລະດູການມີ 248 ຄົນ ຍິງ 143 ຄົນ ເຮັດວຽກໄລຍະສັ້ນ 3-6 ເດືອນ.
ໃນໂອກາດນີ້ ທ່ານ ຮອງລັດຖະມົນຕີ ກະຊວງແຮງງານ ແລະ ສະຫັວດດີການສັງຄົມ, ໄດ້ກ່າວເນັ້ນໃຫ້ຜູ້ທີ່ຜ່ານການສອບເສັງທີ່ເປັນແຮງງານລາວຈຳນວນ 30 ຄົນ, ຈົ່ງພ້ອມກັນຍົກສູງນ້ໍາໃຈຮັກຊາດ,ຮັກບ້ານເກີດເມືອງນອນ ມີຄວາມອົດທົນ ມີຄວາມດຸຫມັ່ນຂະຫຍັນພຽນ ມີລະບຽບວິໄນການເຮັດວຽກດີ ອົດທົນຕັ້ງໃຈເຮັດວຽກຕາມໜ້າທີ່ພາລະບົດບາດທີ່ຕົນໄດ້ຖືກມອບໝາຍໃຫ້ສຳເລັດຕາມກຳນົດເວລາ ແລະ ຮ່ຳຮຽນຝຶກຝົນທັກສະນຳເອົາເຕັກນິກວິຊາການທີ່ທັນສະໄໝ ຂອງປະເທດ ສ ເກົາຫລີ ເພື່ອມາພັດທະນາປະເທດເຮົາ ພ້ອມດຽວກັນນັ້ນກໍ່ເອົາໃຈໃສ່ປະຕິບັດລະບຽບວິໄນຂອງປະເທດ ສ. ເກົາຫລີ ຫລີກລ່ຽງຈາກກຸ່ມຄົນທີ່ບໍ່ດີ, ຖ້າມີບັນຫາໃດກໍປະສານຕິດຕໍ່ຫາກົມຈັດຫາງານເພື່ອຫາວິທີແກ້ໄຂໃຫ້ຫັນເວລາ ເພື່ອຮັບປະກັນສິດ ຜົນປະໂຫຍດຂອງຕົນ.
ນອກນນີ້ຍັງໄດ້ເນັ້ນເຕືອນແຮງງານທີ່ກຳລັງ ຈະອອກເດີນທາງໄປເຮັດວຽກທີ່ປະເທດ ສ.ເກົາຫລີ ໃຫ້ທຸກຄົນປະຕິບັດລະບຽບວິໄນ ຂອງປະເທດ ສ.ເກົາຫຼີ ແລະ ຂອງບໍລິສັດ ໃຫ້ເຂັ້ມງວດ, ແຍກມິດ-ສັດຕູ ໃຫ້ຈະແຈ້ງ, ອົດທົນ, ຕັ້ງໃຈ ເຮັດວຽກ ໃຫ້ຄົບຕາມກໍານົດເວລາທີ່ກໍານົດໄວ້ ແລະ ເດີນທາງກັບຄືນປະເທດ ພາຍຫຼັງສິ້ນສຸດສັນຍາ.
ຖ້າຫາກຜູ້ໃດໂຕນໜີ ຈະສົ່ງຜົນກະທົບອັນໃຫຍ່ຫຼວງ ຕໍ່ຕົນເອງ, ຄອບຄົວ, ຍາດພີ່ນ້ອງ ແລະ ປະເທດລາວ ໂດຍລວມ. ຕົນເອງ ຈະຢູ່ໃນສະຖານະຢູ່ແບບຜິດກົດໝາຍ, ຖືກເຈົ້າໜ້າທີ່ນໍາຈັບ, ຖືກປັບໄໝ ແລະ ຂຶ້ນບັນຊີ ບໍ່ໃຫ້ເຂົ້າປະເທດ ສ.ເກົາຫຼີ ອີກ.
ຍິ່ງໄປກວ່ານັ້ນ ຄົນໃນບ້ານ, ເມືອງ ຫຼື ແຂວງ ທີ່ຕົນເອງອາໄສຢູ່ ກໍ່ຈະໄດ້ຮັບຜົນກະທົບຢ່າງຫຼີກລ້ຽງບໍ່ໄດ້ ເຊັ່ນ: ຈະບໍ່ມີໂອກາດໃນການສະໝັກໄປເຮັດວຽກທີ່ປະເທດ ສ.ເກົາຫຼີ.
ຮ້າຍແຮງໄປກວ່ານັ້ນ ລັດຖະບານ ສ.ເກົາຫຼີ ຈະໂຈະການຮັບເອົາແຮງງານລາວ ເຂົ້າໄປເຮັດວຽກທີປະເທດ ສ.ເກົາຫຼີ ອີກ.
