ຍີ່ປຸ່ນຫລັງເປີດປະເທດ 1 ເດືອນ ມີນັກທ່ອງທ່ຽວພຽງ 1.500 ຄົນ ບັນຫາຫລັກຈາກຂັ້ນຕອນທີ່ກິນເວລາ
ການທ່ອງທ່ຽວຍີ່ປຸ່ນຍັງບໍ່ຟື້ນ ຫລັງພົບວ່າ 1 ເດືອນມີຊາວຕ່າງປະເທດເຂົ້າມາທ່ຽວພຽງ 1.500 ຄົນ ໂດຍສ່ວນຫລາຍເດີນທາງເຂົ້າມາເພື່ອຕິດຕໍ່ທຸລະກິດ ແລະ ສຶກສາຕໍ່.
ສະຖານີຂ່າວ NHK ເປີດເຜີຍໃນວັນທີ 24 ກໍລະກົດ 2022 ວ່າ: ຕົວເລກນັກທ່ອງທ່ຽວຕ່າງປະເທດທີ່ເດີນທາງເຂົ້າປະເທດຍີ່ປຸ່ນໃນໄລຍະ 1 ເດືອນທຳອິດນັບແຕ່ເປີດປະເທດເມື່ອວັນທີ 10 ມິຖຸນາ ມີພຽງ 1.500 ຄົນເທົ່ານັ້ນ ເນື່ອງຈາກມີຂັ້ນຕອນການຂໍອະນຸຍາດ ແລະ ເງື່ອນໄຂຕ່າງໆທີ່ເຮັດໃຫ້ນັກທ່ອງທ່ຽວຍັງບໍ່ໄດ້ຮັບຄວາມສະດວກພຽງພໍ.
ຂໍ້ມູນຈາກໜ່ວຍງານດ້ານການກວດຄົນເຂົ້າເມືອງຂອງຍີ່ປຸ່ນລະບຸວ່າ: ໃນໄລຍະວັນທີ 10 ມິຖຸນາ – 10 ກໍລະກົດ ມີຜູ້ເດີນທາງເຂົ້າປະເທດຍີ່ປຸ່ນທັງໝົດ 484.000 ຄົນ ຫລື ປະມານ 12.000 ຄົນຕໍ່ວັນ ແຕ່ສ່ວນຫລາຍເປັນຊາວຍີ່ປຸ່ນທີ່ເດີນທາງກັບເຂົ້າມາປະເທດເຖິງ 60%.
ຂະນະທີ່ຊາວຕ່າງປະເທດທີ່ເດີນທາງເຂົ້າມາ ສ່ວນຫລາຍມັກເປັນຜູ້ທີ່ເດີນທາງເຂົ້າມາເພື່ອຈຸດປະສົງທາງທຸລະກິດ ຫລື ເປັນນັກຮຽນນັກສຶກສາ ໂດຍຈຳນວນຜູ້ທີ່ເດີນທາງເຂົ້າມາເພື່ອທ່ອງທ່ຽວນັ້ນມີພຽງປະມານ 1.500 ຄົນ.
ຄາດວ່າສາເຫດຕົ້ນຕໍທີ່ເຮັດໃຫ້ນັກທ່ອງທ່ຽວຕ່າງປະເທດມີຈຳນວນໜ້ອຍແບບນີ້ ເນື່ອງມາຈາກຂັ້ນຕອນທີ່ກິນເວລາໃນການຂໍອະນຸຍາດ ທັງການຂໍວີຊ່າທ່ອງທ່ຽວ ແລະ ຕ້ອງສະແດງຜົນກວດໂຄວິດ-19 ແບບ PCR ເປັນລົບ.
ແລະ ສ່ວນທີ່ເປັນບັນຫາຫລາຍທີ່ສຸດ ຄືການທີ່ທາງການຍີ່ປຸ່ນກຳນົດໃຫ້ນັກທ່ອງທ່ຽວຕ້ອງໃຊ້ບໍລິການກຣຸບທົວເທົ່ານັ້ນ ເຊິ່ງເປັນສິ່ງທີ່ນັກທ່ອງທ່ຽວຝັ່ງຕາເວັນຕົກບໍ່ລຶ້ງຕໍ່ການທ່ອງທ່ຽວແບບມີຄົນນຳທ່ຽວ.
ອ້າງອີງ:
https://www3.nhk.or.jp/nhkworld/en/news/20220724_10/
