ECB ໄດ້ເປີດເຜີຍມາດຕະການຊ່ວຍເຫຼືອປະເທດໜີ້ສິນສູງໃນຢູໂຣໂຊນ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ທະນາຄານກາງເອີຣົບ (ECB) ໄດ້ເປີດເຜີຍກົນໄກໃໝ່ທີ່ຮ້ອງວ່າ ເຄື່ອງມືປ້ອງກັນກາສານ (Transmission Protection Instrument: TPI) ເພື່ອຊ່ວຍເຫຼືອປະເທດໃນຢູໂຣໂຊນທີ່ມີບັນຫາໜີ້ຈຳນວນຫຼາຍ.

ພາຍໃຕ້ກົນໄກ TPI ຈະເຮັດໃຫ້ ECB ສາມາດຊື້ພັນທະບັດຈາກປະເທດທີ່ມີໜີ້ສິນຈໍານວນຫຼາຍເຊັ່ນ: ອີຕາລີ ເພື່ອສະກັດກັ້ນການເພີ່ມຂຶ້ນຂອງອັດຕາຜົນຕອບແທນພັນທະບັດ ແລະ ຫຼຸດຄວາມສ່ຽງຕໍ່ເສດຖະກິດຂອງປະເທດສະມາຊິກ. ປະເທດທີ່ຈະໄດ້ຮັບຄວາມຊ່ວຍເຫຼືອຈາກ TPI ຈະຕ້ອງເປັນປະເທດທີ່ປະຕິບັດຕາມຂອບງົບປະມານຂອງສະຫະພາບເອີຣົບ (EU), ບໍ່ຂາດດູນງົບປະມານຫຼາຍກວ່າທີ່ກຳນົດ, ບໍ່ເກີດພາວະທີ່ບໍ່ມີຄວາມສົມດູນໃນດ້ານເສດຖະກິດມະຫາພາກຢ່າງຮຸນແຮງ ແລະ ມີໜີ້ທີ່ມີຄວາມຍືນຍົງຕາມການພິຈາລະນາຂອງຄະນະກຳມາທິການເອີຣົບ (EC), ກອງທຶນກົນໄກຮັກສາສະຖຽນລະພາບເອີຣົບ (ESM) ແລະ ກອງທຶນເງິນຕາສາກົນ (IMF). ນອກຈາກນີ້, ECB ຍັງມີມະຕິປັບຂຶ້ນອັດຕາດອກເບ້ຍ 0,5% ໃນກອງປະຊຸມວັນນີ້ (22 ກໍລະກົດ) ຊຶ່ງເປັນການປັບຂຶ້ນອັດຕາດອກເບ້ຍເປັນຄັ້ງທຳອິດໃນຮອບ 11 ປີ ແລະ ເປັນການປັບຂຶ້ນອັດຕາດອກເບ້ຍຄັ້ງໃຫຍ່ທີ່ສຸດນັບຕັ້ງແຕ່ປີ 2000 ເພື່ອສະກັດກັ້ນການເພີ່ມຂຶ້ນຂອງອັດຕາເງິນເຟີ້ ຊຶ່ງການປັບຂຶ້ນອັດຕາດອກເບ້ຍດັ່ງກ່າວຮຸນແຮງກວ່າທີ່ ECB ສົ່ງສັນຍານໃນເດືອນມິຖຸນາວ່າ ຈະປັບຂຶ້ນອັດຕາດອກເບ້ຍພຽງ 0,25% ໃນເດືອນກໍລະກົດ.

ນອກນີ້, ECB ຍັງໄດ້ມີມະຕິເຫັນດີປັບຂຶ້ນອັດຕາດອກເບ້ຍເງິນຝາກ 0,5% ສູ່ລະດັບ 0% ໃນວັນດຽວກັນ ຈາກເດີມທີ່ລະດັບ -0,5% ໂດຍອັດຕາດອກເບ້ຍດັ່ງກ່າວໄດ້ປັບຫຼຸດຕໍ່າກວ່າ 0% ມາດົນເຖິງ 9 ປີ. ນອກຈາກນີ້, ECB ຍັງປັບຂຶ້ນອັດຕາດອກເບ້ຍຣີໄຟແນນ (Refinance) 0,5% ສູ່ລະດັບ 0,5% ຈາກເດີມທີ່ລະດັບ 0% ແລະ ປັບຂຶ້ນອັດຕາດອກເບ້ຍເງິນກູ້ 0,5% ສູ່ລະດັບ 0,75% ຈາກເດີມທີ່ລະດັບ 0,25%.