ລາວ-ກຳປູເຈຍ ຮ່ວມມືດ້ານວຽກງານທະນາຄານ
ທະນາຄານແຫ່ງ ສປປ ລາວ ແລະ ທະນາຄານແຫ່ງຊາດກຳປູເຈຍ ໄດ້ມີການພົວພັນ ແລະ ຮ່ວມມືທີ່ດີຕະຫລອດມາ ແລະ ຫລ້າສຸດຄະນະຜູ້ແທນໂຮງພິມທະນາບັດແຫ່ງຊາດທະນາຄານແຫ່ງຊາດກຳປູເຈຍ ນໍາໂດຍທ່ານ ມອມ ດາເຣດ (Mom DARETH) ຮອງຫົວໜ້າກົມຄັງເງິນສົດທະນາຄານແຫ່ງຊາດກຳປູເຈຍໄດ້ມາເຄື່ອນໄຫວ ແລະ ເຮັດວຽກກັບຄະນະນໍາໂຮງພິມທະນາບັດ ທະນາຄານແຫ່ງ ສປປ ລາວແຕ່ວັນທີ 14-16 ສິງຫານີ້.
ໃນໂອກາດດັ່ງກ່າວ, ຄະນະຜູ້ແທນກຳປູເຈຍ ໄດ້ເຂົ້າຢ້ຽມຂໍ່ານັບທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປ ລາວ. ຈາກນັ້ນກໍໄດ້ມີກອງປະຊຸມພົບປະສອງຝ່າຍລະຫວ່າງທ່ານ ສັນຕິ ພົນເມືອງລາວ ຫົວໜ້າໂຮງພິມທະນາບັດທະນາຄານແຫ່ງ ສປປ ລາວ ແລະ ທ່ານ ມອມ ດາເຣດ ຮອງຫົວໜ້າກົມຄັງເງິນສົດທະນາຄານແຫ່ງຊາດກຳປູເຈຍ ເພື່ອທົບທວນຄືນຜົນການຮ່ວມມືກັນໃນໄລຍະຜ່ານມາ, ພ້ອມທັງປຶກສາຫາລື ແລະ ແລກປ່ຽນບົດຮຽນນໍາກັນກ່ຽວກັບເຕັກນິກການການພິມ, ການປະຕິບັດນະໂຍບາຍຕໍ່ພະນັກງານ, ກໍາມະກອນ ແລະ ບັນຫາອື່ນໆບົນເນື້ອເນື້ອໃນຈິດໃຈການຮ່ວມມືລະຫວ່າງທະນາຄານກາງຂອງລາວ ແລະ ກໍາປູເຈຍ.
ໃນໂອກາດດັ່ງກ່າວສອງຝ່າຍຍັງໄດ້ຈັດຝຶກອົບຮົມໃນຫົວຂໍ້: ປະຫວັດ ແລະຄວາມເປັນມາຂອງໂຮງພິມທະນາບັດແຫ່ງຊາດທະນາຄານແຫ່ງຊາດກຳປູເຈຍ , ການບໍລິຫານຄຸ້ມຄອງ, ເຕັກນິກການພິມທະນາບັດ, ຂໍ້ກໍານົດກົດລະບຽບ, ນະໂຍບາຍສະຫວັດດີການສັງຄົມຕໍ່ພະນັກງານຂອງໂຮງພິມທະນາບັດແຫ່ງຊາດ ທະນາຄານແຫ່ງຊາດກຳປູເຈຍ, ພ້ອມນັ້ນໂຮງພິມທະນາບັດທະນາຄານແຫ່ງ ສປປ ລາວ ກໍໄດ້ນໍາສະເໜີປະຫວັດ ແລະ ຄວາມເປັນມາຂອງໂຮງພິມທະນາບັດ, ວຽກງານພັດທະນາບຸກຄະລາກອນ, ການຍົກສູງຄຸນນະພາບໃນການພີມທະນາບັດ, ການອອກແບບທະນາບັດ, ການບໍລິຫານຄຸ້ມຄອງສາງ, ການນໍາໃຊ້ລະບົບບັນຊີ ແລະ ການຄໍານວນຕົ້ນທຶນການຜະລິດ. ຈາກນັ້ນ ບັນດາວິທະຍາກອນ ແລະ ນັກຝຶກອົບຮົມໄດ້ຢ້ຽມຊົມການຜະລິດທະນາບັດຂອງໂຮງພິມທະນາບັດທະນາຄານແຫ່ງ ສປປ ລາວ.
ການພົບປະຫາລື ແລະ ແລກປ່ຽນບົດຮຽນນຳກັນໃນຄັ້ງນີ້, ເປັນການຈັດຕັ້ງປະຕິບັດການຮ່ວມມືໃນຂອບສອງຝ່າຍລະຫວ່າງສອງທະນາຄານກາງ, ເຊິ່ງໄດ້ກາຍເປັນຂີດໝາຍອັນສຳຄັນໃນການປະກອບສ່ວນເພີ່ມທະວີສາຍພົວພັນ ແລະການຮ່ວມມືລະຫວ່າງທະນາຄານກາງຂອງສອງປະເທດໃຫ້ແໜ້ນແຟ້ນຂຶ້ນກວ່າເກົ່າ, ເຊິ່ງຈະກາຍເປັນສິ່ງເອື້ອອຳນວຍໃຫ້ແກ່ການຄ້າ-ການລົງທຶນ, ພ້ອມທັງປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງສອງປະເທດໃຫ້ນັບມື້ນັບຂະຫຍາຍຕົວຂຶ້ນໄປເລື້ອຍໆ.
# ຂ່າວ-ພາບ: ຣັດສະໝີ ດວງສັດຈະ
