ການພະນັນອອນລາຍ ກໍແມ່ນອະບາຍະມຸກ ພາກສ່ວນກ່ຽວຂ້ອງຕ້ອງຈິງຈັງກວດກາ
ໂດຍ: ລຳເງິນ
ຫລາຍທ່ານຊາບດີວ່າ: ອະບາຍະມຸກ ຄືທາງແຫ່ງຄວາມຈິບຫາຍທັງຫລາຍທັງປວງ ຊຶ່ງອະບາຍະມຸກນີ້ກວມເອົາທັງຢາເສບຕິດ ແລະ ການພະນັນ ກາຍເປັນປາກົດການຫຍໍ້ທໍ້ ກົດໜ່ວງຖ່ວງດຶງການພັດທະນາ ເສດຖະກິດ-ສັງຄົມ ແລະ ເປັນເລື່ອງທີ່ສັງຄົມຮຽກຮ້ອງໃຫ້ແກ້ໄຂ. ເວົ້າເຖິງການພະນັນກໍຄົງໜີບໍ່ພົ້ນ ຄື ເກມ ທີ່ມີການໂຄສະນາຊັກຊວນຜ່ານສື່ສັງຄົມ ຊື່ງທ້າທາຍຕໍ່ລະບຽບກົດໝາຍບ້ານເມືອງ. ຮ້ານເກມ ທີ່ເປີດບໍລິການຈໍານວນໜຶ່ງໄດ້ຮັບອະນຸຍາດ ຫລືບໍ່? ໄດ້ກາຍເປັນຫາງສຽງສັງຄົມທີ່ເຫັນຄວນໃຫ້ຂະແໜງ ການກ່ຽວຂ້ອງລົງໄປກວດກາຢ່າງຄັກແນ່ວ່າ: ການບໍລິການ ມີລັກສະນະພະນັນ ຫລື ບໍ່?
ການຫລິ້ນເກມບໍ່ວ່າຈະໃນລະບົບຄອມພິວເຕີ, ໂທລະສັບມືຖື…ເດັກນ້ອຍ ທັງໄວອະນຸບານ-ປະຖົມ ແລະ ມັດທະຍົມທີ່ຍັງບໍ່ທັນຮູ້ຮັບຜິດຊອບຈໍານວນບໍ່ໜ້ອຍ ຕິດເກມ ຊຶ່ງປາກົດການນີ້ລ້ວນກ່ຽວພັນກັບຜູ້ໃຫຍ່ ຫລື ພໍ່ແມ່ຜູ້ປົກຄອງຢ່າງຫລີກບໍ່ໄດ້ ໝາຍຄວາມວ່າ ນີ້ຄືການປ່ອຍໃຫ້ລູກຫລິ້ນໂທລະສັບຫລາຍເກີນໄປ ຫລືບໍ່ທີ່ເຫັນປະຈັກຕາ ຄືເດັກນ້ອຍມີພຶດຕິກໍາຜິດແປກແຕກຕ່າງບຸກຄົນທົ່ວໄປໃນສັງຄົມຂອງຕົນເພາະເດັກນ້ອຍ ຮັບເອົາມາຢ່າງບໍ່ຮູ້ເລືອກເຟັ້ນ. ແນວໃດກໍດີການຫລິ້ນເກມກໍມີປະໂຫຍດເຊັ່ນດຽວກັນຖ້າຮູ້ແບ່ງເວລາ ແລະ ຮູ້ເລືອກເຟັ້ນເກມຈະເຮັດໃຫ້ສະໝອງພັດທະນາເພາະມີຫລາຍເກມພັດທະນາຂຶ້ນມາເພື່ອຝຶກສະໝອງ ລອງປັນຍາ, ມີການແຂ່ງຂັນ ແລະ ສ້າງຄວາມມ່ວນຊື່ນເບົາສະໝອງ.
ຫລາຍທ່ານອາດຈະເຫັນພ້ອມນໍາຜູ້ຂຽນບໍ່ວ່າ ບັນຫາເດັກຕິດເກມ ນັບມື້ທະວີຄວາມຕົກໃຈ ຄວາມກັງວົນຂອງຜູ້ປົກຄອງຫລາຍຂຶ້ນເລື້ອຍໆ ແລະ ຫລາຍທ່ານຄົງເຫັນປະຈັກນຳກັນວ່າຜູ້ຕິດເກມສ່ວນຫລາຍໄດ້ຮັບຜົນກະທົບທັງກາຍ ແລະ ຈິດໃຈເຊັ່ນຟຸມ ເຟືອຍ ໃຈລອຍ ຜົນການຮຽນບໍ່ດີ ໜັກທີ່ສຸດຄືສະແດງຄວາມຮ້າຍກາດ ບໍ່ຟັງຄວາມ ເອົາແຕ່ໃຈ ຂີ້ລັກ…ແນວໃດກໍດີເມື່ອເບິ່ງເລິກໆແລ້ວ ຮາກເຫງົ້າຂອງບັນຫາບໍ່ວ່າແຕ່ເດັກນ້ອຍລວມທັງຜູ້ໃຫຍ່ພ້ອມລ້ວນແຕ່ຂາດການວິຈາລະນາຍານການເລືອກ. ທີ່ສຳຄັນ, ຜູ້ຜະລິດຂາດຈິດສຳນຶກຂາດຄວາມຮັບຜິດຊອບຕໍ່ສັງຄົມ ທີ່ປະດິດ ແລະ ພັດທະນາຂຶ້ນເພື່ອການຄ້າ ຫລື ເບື່ອເມົາ. ເລິກໄປກວ່ານີ້ຄືເກມທີ່ເປັນການພະນັນທັງຢູ່ໃນແລະ ນອກລະບົບການຄວບຄຸມ ຄຸ້ມຄອງຂອງລັດ.
ຢູ່ບ້ານເຮົາ, ບັນດາຮ້ານບໍລິການຫລິ້ນເກມອອນລາຍ ເຖິງວ່າໄດ້ຮັບອະນຸຍາດຖືກຕ້ອງ, ແຕ່ຄວາມກັງວົນ ຄວາມຫ່ວງໃຍທັງຈາກຜູ້ປົກຄອງ ແລະ ສັງຄົມ ກໍຢາກໃຫ້ພາກສ່ວນກ່ຽວຂ້ອງຕິດຕາມກວດກາການບໍລິການທີ່ແຫກກົດ ຄືມີລັກສະນະພະນັນ? ຂະນະດຽວກັນກໍມີຄຳຖາມມາວ່າ: ການອະນຸຍາດໃຫ້ບໍລິການນີ້ກຸ້ມຄ່າຫລືບໍ່? ເນື່ອງຈາກເທົ່າທີ່ພົບ ຜູ້ມັກໃຊ້ບໍລິການແມ່ນກຸ່ມຄົນໜຸ່ມເປັນສ່ວນຫລາຍ.
ການບໍລິການໃດໜຶ່ງບໍ່ຄວນຫວັງໄດ້ຈາກວິທີທີ່ບໍ່ໝັ້ນຄົງ ໝາຍຄວາມວ່າ ຢາກໄດ້ເງິນ ຫາຫລິ້ນການພະນັນ, ແຕ່ລະມື້ອາໄສຄວາມຝັນ ຫລົ້ມຫົວຈົມທ້າຍຊື້ເລກຊື້ຫວຍ, ການຫລິ້ນເກມອອນລາຍ ຫວັງໄດ້ລາງ ວັນ ຄືການພະນັກຄືອະບາຍຍະມຸກ ເມື່ອຜູ້ໃດຕົກຢູ່ໃນການຄອບງຳຂອງມັນ ຍ່ອມມີຄວາມທຸກ ບໍ່ທຸກເງິນ ກໍທຸກໃຈ ໜ້ອຍຫລາຍກໍຄືທຸກ…
