ໜອງຄາຍອາດປັບແຜນການຕະຫລາດໃໝ່ ເນື່ອງຈາກຄົນລາວຊື້ເຄື່ອງພາຍໃນປະເທດແທນການຂ້າມໄປຊື້ຢູ່ຕະຫລາດຊາຍແດນ

ຮອງປະທານຫໍການຄ້າຂອງໜອງຄາຍ ປະເທດໄທ ໃຫ້ສຳພາດຜ່ານສື່ຂ່າວຖານເສດຖະກິດ ຂອງໄທ ວັນທີ 17 ມິຖຸນາ 2022 ນີ້ວ່າ: ປັດຈຸບັນຈັງຫວັດໜອງຄາຍ ແລະ ຈັງຫວັດອື່ນໆໃນອີສານທີ່ມີຊາຍແດນຕິດກັບ ສປປ ລາວ ກຳລັງພົບກັບການປ່ຽນແປງການຄ້າການທ່ອງທ່ຽວທີ່ເຊື່ອມຕໍ່ກັບປະເທດເພື່ອບ້ານ, ກ່ອນການແຜ່ລະບາດເຊື້ອພະຍາດໂຄວິດ-19 ການຄ້າລະຫວ່າງໜອງຄາຍກັບລາວເຮົາມີຄວາມຄຶກຄື້ນຫຼາຍ ມີລູກຄ້າຈາກລາວທັງຂີ່ເຮືອ ແລະ ຂັບລົດຂ້າມຊາຍແດນເພື່ອເຂົ້າໄປຊື້ສິນຄ້າອຸປະໂພກ-ບໍລິໂພກທົ່ວໄປຈາກໜອງຄາຍ, ໃນບາງສ່ວນກໍເດີນທາງໄປອຸດອນ ເພື່ອຊື້ສິນຄ້າຈຳເປັນບາງຊະນິດໃນສູນການຄ້າ ຫລື ເພື່ອການພັກຜ່ອນທ່ອງທ່ຽວ.

ແຕ່ການລະບາດຂອງເຊື້ອພະຍາດໂຄວິດ-19 ຍາວນານເຖິງ 2 ປີ ຈຶ່ງເຮັດໃຫ້ປະເທດປິດ ແລະ ມີແຕ່ລົດບັນທຸກເທົ່ານັ້ນທີ່ສາມາດຜ່ານຊາຍແດນໄດ້ ເຊິ່ງມັນສົ່ງຜົນກະທົບຫຼາຍ ໂດຍສະເພາະແມ່ນຕະຫລາດຕາມຊາຍແດນທ້ອງຖິ່ນໜອງຄາຍ-ລາວ ທີ່ໄດ້ຫຼຸດລົງຫຼາຍກວ່າ 60%.

ເມື່ອການລະບາດຂອງເຊື້ອພະຍາດໂຄວິດ-19 ໄດ້ຫຼຸດຜ່ອນລົງ ແລ້ວກັບມາເປີດປະເທດອີກ ເຫັນໄດ້ວ່າຄົນລາວເຮົາຫັນມາຊື້ເຄື່ອງໃຊ້ສອຍພາຍໃນປະເທດຫຼາຍຂຶ້ນ ແລະ ຄົນລາວທີ່ຂ້າມໄປອຸດອນນັ້ນເປັນກຸ່ມຄົນທີ່ມີຖານະ ເພື່ອເດີນທາງໄປພົບແພດໝໍ ຫຼື ເພື່ອເຕີມນ້ຳມັນທີ່ລາຄາຖືກກ່ອນໃນລາວ ແລ້ວຈະບໍ່ຊື້ສິນຄ້າທົ່ວໄປ ແຕ່ຈະເລືອກຊື້ສິນຄ້າຈຳເປັນເທົ່ານັ້ນ.

ນັບແຕ່ ສປປ ລາວ ເປີດເສັ້ນທາງລົດໄຟ ລາວ-ຈີນ ເປັນເສັ້ນທາງໂລຈິສຕິກໃໝ່ ທີ່ດຶງດູດນັກທ່ອງທ່ຽວ-ຂົນສົ່ງສິນຄ້າ, ເຮັດໃຫ້ຄົນລາວຊື້ເຄື່ອງພາຍໃນປະເທດແທນການຂ້າມໄປອຸດອນ- ໜອງຄາຍ ຫຼື ຕະຫຼາດຊາຍແດນກໍມີໜ້ອຍລົງ ອາດເນື່ອງມາຈາກຄວາມຍຸ້ງຫຍາກໃນດ້ານການແລກປ່ຽນເງິນຕາ ແລະ ຍັງພົບກັບພາສີທີ່ຈະເອົາສິນຄ້າອອກມາຫຼາຍກວ່າມູນຄ່າ 1.500 ບາດ ຕ້ອງເສຍພາສີອີກ 10% ເຊິ່ງເຮັດໃຫ້ຄົນລາວບໍ່ໄປຊື້ສິນຄ້າຈາກຝັ່ງໄທ ແຕ່ຫັນກັບມາຊື້ສິນຄ້າໃນປະເທດ ເພາະໃນນະຄອນຫຼວງວຽງຈັນ ມີຊຸບເປີມາເກັດ ຫລື ສູນການຄ້າທີ່ຄົນລາວສາມາດຈັບຈ່າຍໃຊ້ສອຍໄດ້ສະດວກ ແລະ ບໍ່ຈຳເປັນຕ້ອງເດີນທາງໄກ.

ຮອງປະທານຫໍການຄ້າໜອງຄາຍກ່າວຕື່ມອີກວ່າ ໃນອະນາຄົດ ຄົນໄທອາດຈະໄດ້ຂ້າມມາລາວ ເພື່ອມາຊື້ເຄື່ອງໃຊ້ສອຍໃນວຽງຈັນແທນ ຄືກັບຄົນລາວທີ່ໄປຊື້ເຄື່ອງຢູ່ໄທໃນເມື່ອກ່ອນ ກໍເປັນໄປໄດ້.