ສປປ ລາວ ກະກຽມເປັນປະທານອາຊຽນ 2024
ວັນທີ 15 ກໍລະກົດ 2022, ໄດ້ມີກອງປະຊຸມປຶກສາຫາລືເພື່ອກະກຽມ ແລະ ດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC), ພາຍໃຕ້ການເປັນປະທານຂອງທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ.
ໃນກອງປະຊຸມໄດ້ຮັບຟັງການລາຍງານຈາກບັນດາກະຊວງຂະແໜງທີ່ກ່ຽວຂ້ອງກ່ຽວກັບການສຳຫຼວດກວດກາຄືນຄວາມພ້ອມໃນເບື້ອງຕົ້ນຂອງແຕ່ລະຂະແໜງການເຊັ່ນ: ວຽກງານເນື້ອໃນຂອງ 3 ເສົາຄ້ຳປະຊາຄົມອາຊຽນ(ປະຊາຄົມການເມືອງ-ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດທະນະທຳ-ສັງຄົມ), ວຽກງານປ້ອງກັນປະເທດ ແລະ ປ້ອງກັນຄວາມສະຫົງບ, ວຽກງານດ້ານພະລາທິການ ແລະ ພິທີການ ໂດຍສະເພາະການກະກຽມຄວາມພ້ອມຂອງສະຖານທີ່ປະຊຸມ ແລະ ສະຖານທີ່ພັກເຊົາ, ວຽກງານດ້ານພາຫະນະ, ດ້ານງົບປະມານ ແລະ ວຽກງານອື່ນໆທີ່ປິ່ນອ້ອມ.
ຕອນທ້າຍຂອງກອງປະຊຸມ, ທ່ານປະທານ ໄດ້ມອບໝາຍໃຫ້ບັນດາອະນຸກຳມະການເລີ່ມກະກຽມວຽກທີ່ເຫັນວ່າມີຄວາມຈຳເປັນຮີບດ່ວນນັບແຕ່ດຽວນີ້ເປັນຕົ້ນໄປ ໂດຍສະເພາະໃຫ້ພາກສ່ວນຮັບຜິດຊອບເນື້ອໃນຂອງ 3 ເສົາຄ້ຳປະຊາຄົມອາຊຽນ ເລີ່ມປຶກສາຫາລືເພື່ອລະດົມຄວາມຄິດກ່ຽວກັບຄຳຂັວນ, ກາໝາຍ ແລະ ບູລິມະສິດຂອງການເປັນປະທານອາຊຽນຂອງ ສປປ ລາວ ໃນປີ 2024.
ນີ້ແມ່ນກອງປະຊຸມຄັ້ງປະຖົມມະລືກຂອງຄະນະກຳມະການຊີ້ນຳລະດັບຊາດ ເພື່ອປຶກສາຫາລືກ່ຽວກັບການກະກຽມໃຫ້ແກ່ການເປັນປະທານອາຊຽນໃນປີ 2024 ເປັນຕົ້ນແມ່ນການຜັນຂະຫຍາຍຂໍ້ຕົກລົງຂອງທ່ານນາຍົກລັດຖະມົນຕີວ່າດ້ວຍການແຕ່ງຕັ້ງຄະນະກຳມະການຊີ້ນຳລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນຂອງ ສປປ ລາວ ນັບແຕ່ໄດ້ເຂົ້າເປັນສະມາຊິກອາຊຽນ ໃນວັນທີ 23 ກໍລະກົດ 1997, ຄັ້ງນີ້ເປັນຄັ້ງທີ 3 ເຊິ່ງຈະເລີ່ມແຕ່ວັນທີ 1 ມັງກອນ – 31 ທັນວາ 2024.
