ໝໍຜ່າຕັດນິວຢອກປ່ຽນຫົວໃຈໝູໃຫ້ຄົນເຈັບສະໝອງຕາຍ 2 ຄົນສຳເລັດ
ກຸ່ມໝໍຜ່າຕັດຈາກມະຫາວິທະຍາໄລນິວຢອກ (NYU) ປະສົບຜົນສຳເລັດໃນການປູກປ່ຽນຫົວໃຈໝູດັດແປງທາງພັນທຸກຳໃຫ້ຄົນເຈັບສະໝອງຕາຍ 2 ຄົນ. ຖືເປັນອີກໜຶ່ງບາດກ້າວທີ່ເຂົ້າໃກ້ເປົ້າໝາຍໄລຍະຍາວຂອງການໃຊ້ຊິ້ນສ່ວນໝູ ເພື່ອແກ້ໄຂບັນຫາການຂາດເຂີນອະໄວຍະວະມະນຸດສຳລັບການປູກປ່ຽນ.
ວັນທີ 14 ກໍລະກົດ 2022, ສຳນັກຂ່າວຣອຍເຕີລາຍງານວ່າ: ຫລັງເຫດການການເສຍຊີວິດຂອງຄົນເຈັບຜ່າຕັດປ່ຽນຫົວໃຈໝູຄົນທຳອິດຂອງໂລກໃນເດືອນມີນາຜ່ານມາ ຜົນການທົດລອງປູກປ່ຽນຫົວໃຈຄັ້ງຫລ້າສຸດໃນເດືອນມິຖຸນາ-ກໍລະກົດ ພົບວ່າຫົວໃຈເຮັດວຽກໄດ້ຕາມປົກກະຕິ ແລະ ບໍ່ມີສັນຍານຂອງການປະຕິເສດອະໄວຍະວະຈາກຄົນເຈັບສະໝອງຕາຍທັງ 2 ຄົນ.
ທີມນັກວິໄຈກ່າວວ່າ: NYU ຈັດຫາຫົວໃຈຈາກໝູປັບແຕ່ງພັນທຸກຳຂອງບໍລິສັດ ເຣວິວິຄໍ ແລະ ກວດຫາເຊື້ອໄວຣັສ ໂດຍໃຊ້ຫລັກປະຕິບັດການກວດສອບຂັ້ນສູງ ເຊິ່ງບໍ່ມີການພົບໄວຣັສທີ່ເອີ້ນວ່າ “ພໍຊີນ ໄຊໂຕເມກາໂລໄວຣັສ” (PCMV) ແຕ່ຢ່າງໃດ. ອີກທັງໂຕໝູຍັງມີການປັບແຕ່ງພັນທຸກຳ 4 ຈຸດ ເພື່ອປ້ອງກັນການປະຕິເສດ ແລະ ການເຕີບໃຫຍ່ຂອງອະໄວຍະວະທີ່ຜິດປົກກະຕິ ແລະ ດັດແປງເພີ່ມອີກ 6 ຈຸດ ເພື່ອປ້ອງກັນຄວາມບໍ່ເຂົ້າກັນລະຫວ່າງອະໄວຍະວະໝູກັບມະນຸດ.
ສຳລັບຕອນນີ້ ພວກເຂົາເຊື່ອວ່າການປ່ຽນອະໄວຍະວະຕ່າງສະປິຊີສໃນຄົນເຈັບສະໝອງຕາຍມີຄວາມປອດໄພ ແລະ ໃຫ້ຂໍ້ມູນໄດ້ຫລາຍກວ່າຄົນເຈັບທີ່ຍັງມີຊີວິດ ເພາະການຜ່າຕັດເພື່ອການບົ່ງມະຕິສາມາດເຮັດໃຫ້ຕະຫລອດຍິ່ງຂຶ້ນ.
“ເປົ້າໝາຍຂອງພວກເຮົາຄື ເພື່ອລວມການປະຕິບັດຕ່າງໆ ທີ່ໃຊ້ໃນການປູກປ່ຽນຫົວໃຈທົ່ວໄປ, ພຽງແຕ່ປ່ຽນມາໃຊ້ອະໄວຍະວະທີ່ບໍ່ແມ່ນຂອງມະນຸດ ເຊິ່ງຈະສາມາດເຮັດວຽກໄດ້ຕາມປົກກະຕິ ໂດຍປາສະຈາກການຊ່ວຍເຫລືອເພີ່ມຕື່ມຈາກອຸປະກອນ ຫລື ຢາທີ່ບໍ່ເຄີຍມີການທົດລອງ” ທ່ານໝໍ ເນເດິ ໂມອາຊາມິ ຜູ້ອຳນວຍການຝ່າຍຜ່າຕັດການປູກປ່ຽນຫົວໃຈ ຈາກສູນການແພດແລນກອນຂອງ NYU ກ່າວ.
