ເດືອນກໍລະກົດ ສປປ ລາວ ໝົດບັນຫານໍ້າມັນເຊື້ອໄຟຂາດແຄນ
ນັບຕັ້ງແຕ່ທ້າຍເດືອນມິຖຸນາເປັນຕົ້ນມາ ລັດຖະບານໄດ້ເຮັດທຸກວິທີທາງເລັ່ງແກ້ໄຂບັນຫານໍ້າມັນຂາດແຄນ ດ້ວຍການອະນຸມັດເງິນຈຳນວນ 200 ລ້ານໂດລາ ເພື່ອນຳເຂົ້ານໍ້າມັນເຊື້ອໄຟ ແລະ ແຈກຈ່າຍສຳເລັດແລ້ວທົ່ວປະເທດລາວ.
ເດືອນກໍລະກົດ ເປັນເດືອນທີ່ລາວເຮົາໝົດບັນຫານໍ້າມັນຂາດແຄນ ນັບແຕ່ເໜືອຕະຫລອດໃຕ້ ກໍຄືທົ່ວປະເທດ ບໍ່ວ່າປໍ້ານ້ອຍປໍ້າໃຫຍ່ກໍກັບມາເປີດໃຫ້ກິດຈະການດັ່ງທີ່ເຄີຍມີມາ.
ທຸກມື້ນີ້ ພວກເຮົາຈະບໍ່ເຫັນບັນຫາການຮ່າຍນໍ້າມັນໃສ່ຕຸກຂາຍຕາມແຄມທາງ, ບໍ່ມີການລຽນຄິວໃສ່ນໍ້າມັນ ແລະ ບັນຫາອື່ນໆ ທີ່ເຄີຍເກີດໃນໄລຍະເດືອນພຶດສະພາ ຫາທ້າຍເດືອນມິຖຸນາ ກໍໝົດໄປ.
ນອກນີ້, ການປັບລາຄາຕາມການຊື້ຂາຍນໍ້າມັນໃນຕະຫລາດໂລກກໍໄດ້ປະຕິບັດເຊັ່ນກັນ ສະເພາະເດືອນກໍລະກົດນີ້ໄດ້ປັບລົງ 2 ຄັ້ງຄື ວັນທີ 6 ກໍລະກົດ ແລະ ວັນທີ 15 ກໍລະກົດ 2022 ເຊິ່ງຄາດວ່າໄວໆນີ້ ຫາກສະຖານະການເສດໂະກິດຂອງໂລກດີຂຶ້ນ ລາວເຮົາກໍອາດໄດ້ນໍ້າມັນໃນລາຄາທີ່ຖືກລົງກວ່າປັດຈຸບັນນີ້ ຫລື ອາດກັບໄປໃສ່ລາຄາເກົ່າຄືດັ່ງ 2 ປີກ່ອນໜ້ານີ້ກໍເປັນໄດ້ ແລະ ບັນຫາລາຄາສິນຄ້າກໍອາດຈະໄດ້ຮັບການແກ້ໄຂໄປພ້ອມໆກັນ.
ນີ້ແຫລະ ທີ່ເພິ່ນວ່າ ທຸກບັນຫາ ຍ່ອມມີທາງແກ້ໄຂ ເພາະທຸກໆບັນຫາມັນເກີດຈາກເຫດ ຫາກເຮົາແກ້ຢູ່ທີ່ເຫດຂອງມັນແລ້ວບັນຫາກໍຍ່ອມໝົດໄປ.
