ເຝົ້າລະວັງ!! ພະຍາດໄຂ້ຍຸງລາຍ ທົ່ວປະເທດມີຄົນເຈັບໄຂ້ຍຸງລາຍ 6.760 ຄົນ ແລະ ມີຜູ້ເສຍຊີວິດ 8 ຄົນ
ວັນທີ 13 ກໍລະກົດ 2022, ພະແນກສາທາລະນະສຸກ ນະຄອນຫລວງວຽງຈັນ ຮ່ວມກັບກົມສື່ມວນຊົນ, ສະມາຄົມນັກຂ່າວ ແລະ ບໍລິສັດພາວມິລາໂຄ ຈຳກັດ ໄດ້ຈັດກອງປະຊຸມປຸກລະດົມສື່ມວນຊົນ ເພື່ອຄວບຄຸມການລະບາດພະຍາດໄຂ້ຍຸງລາຍພາຍໃຕ້ການເປັນປະທານຂອງທ່ານ ສະຫວັນຄອນ ຣາຊມຸນຕີ ປະທານສະມາຄົມນັກຂ່າວ ແຫ່ງ ສປປ ລາວ ແລະ ທ່ານ ຊົງເລົາ ຢົງນູ ຫົວໜ້າຄະນໂຄສະນາອົບຮົມ ນະຄອນຫລວງວຽງຈັນ.
ທ່ານ ຊົງເລົາ ຢົງນູ ຫົວໜ້າຄະນໂຄສະນາອົບຮົມ ນະຄອນຫລວງວຽງຈັນ ກ່າວວ່າ: ພະຍາດໄຂ້ຍຸງລາຍສ່ວນໃຫຍ່ເກີດຢູ່ບ່ອນທີ່ມີປະຊາກອນອາໄສຢູ່ຢ່າງໜາແໜ້ນ ຫລື ເທສະບານເມືອງ ແລະ ເລີ່ມຂະຫຍາຍ ອອກສູ່ເຂດຊົນນະບົດ ແບບກະແຈກກະຈາຍທົ່ວໄປ ຈາກເຂດທີ່ເຄີຍເກີດລະບາດໄປຫາເຂດທີ່ບໍ່ເຄີຍມີໄຂ້ຍຸງລາຍມາກ່ອນ, ນັບແຕ່ຕົ້ນປີມາເຖິງວັນທີ 12 ກໍລະກົດ 2022 ທົ່ວນະຄອນຫລວງວຽງຈັນ ມີຄົນເຈັບໄຂ້ຍຸງລາຍ 4.149 ຄົນ, ເສຍຊີວິດ 5 ຄົນ ແລະ ມີກໍລະນີລາຍງານທັງ 9 ເມືອງ ກວມ 363 ບ້ານ ໂດຍເມືອງທີ່ມີຜູ້ເສຍຊີວິດ ໄດ້ແກ່ເມືອງໄຊທານີ 1 ຄົນ, ໄຊເສດຖາ 1 ຄົນ, ຈັນທະບູລີ 2 ຄົນ, ສີໂຄດຕະບອງ 1 ຄົນ ເມື່ອທຽບໃສ່ຕົວເລກທົ່ວປະເທດ ນະຄອນຫຼວງວຽງຈັນ ກວມເອົາ 57% ( ທົ່ວປະເທດມີຄົນເຈັບໄຂ້ຍຸງລາຍ 6.760 ຄົນ, ມີຜູ້ເສຍຊີວິດ 8 ຄົນ ).
ກອງປະຊຸມຄັ້ງນີ້ສະແດງໃຫ້ເຫັນເຖິງຄວາມອັນຕະລາຍຂອງພະຍາດຍຸງລາຍ ສື່ມວນຊົນທຸກພາກສ່ວນ ຈະຈັດຕັ້ງການໂຄສະນາເຜິຍແຜ່ຂໍ້ມູນຂ່າວສານຢ່າງກວ້າງຂວາງໃຫ້ປະຊາຊົນຮູ້ວິທີປ້ອງກັນ ແລະ ກຳຈັດແຫລ່ງເພາະພັນຂອງຍຸງລາຍ, ໂດຍສະເພາະ 3 ເດືອນຕໍ່ໜ້ານີ້ ເພື່ອໃຫ້ຕົວເລກໄຂ້ຍຸງລາຍເປັນສູນ ຫລື ຫລຸດລົງ ໂດຍການຮ່ວມມືຂອງປະຊາຊົນທຸກຄົນເອົາໃຈໃສ່ປະຕິບັດ 5ປ ຄື: ປິດຝາພາຊະນະທີ່ກັບນ້ຳແຈບດີບໍ່ໃຫ້ຍຸງມາໄຂ່ໃສ່, ປ່ຽນນ້ຳ ແລະ ຜັດຖູພາຊະນະທີ່ອາດເປັນບ່ອນເພາະພັນຂອງຂອງຍຸງລາຍ, ປ່ອຍປາຫ່າງນົກຍຸງໃສ່ອ່າງກເກັບນ້ຳຕ່າງທີ່ອາດເປັນບ່ອນເພາະພັນຂອງຍຸງລາຍ, ປັບປຸງອະນາໄມສິ່ງແວດລ້ອມອ້ອມເຮືອນ ບໍ່ໃຫ້ມີແຫລ່ງເພາະພັນ, ປະຕິບັດປະຈຳທຸກໆວັນ ແລະ ເຮັດທຸກວິທີທາງເປັນເຈົ້າການທຳລາຍແຫລ່ງແພ່ພັນໜອນນໍ້າ ໝາຍວ່າ ບໍໍ່ມີໜອນນໍ້າ ບໍ່ມີໄຂ້ຍຸງລາຍ.
