ບາເຊໂລນາ ຢືນຢັນບັນລຸຂໍ້ຕົກລົງຄວ້າ ຣາຟິນຢາ ຮຽບຮ້ອຍແລ້ວ

ບາເຊໂລນາ ທີມໃຫຍ່ແຫ່ງ ລາ ລີກາ ສະເປນ ຢືນຢັນບັນລຸຂໍ້ຕົກລົງໃນການຄວ້າຕົວ ຣາຟິວຢາ ປີກທີມຊາດບຣາຊິລ ລີດ ຢູໄນເຕັດ ທີມດັງແຫ່ງພຣີເມຍລີກ ອັງກິດ ໄປເສີມກອງຫນ້າຮຽບຮ້ອຍ.

‘‘ The sun ’’ ສື່ໃນອັງກິດ ລາຍງານວ່າ ບາເຊໂລນາ ຕົກລົງທີ່ຈະຈ່າຍຄ່າຕົວຂອງ ຣາຟິນຢາ ໃຫ້ ລີດ ຢູໄນເຕັດ ເປັນເງິນຈຳນວນ 57 ລ້ານປອນ ຂະນະທີ່ ດາວເຕະອາຍຸ 25 ປີ ເຊິ່ງຢູ່ລະຫວ່າງການກວດຮ່າງກາຍນັ້ນ ຕົກລົງທີ່ຈະເຊັນສັນຍາໃນຖິ່ນ ຄຳ ນູ ເປັນເວລາ 5 ປີ.

ສຳລັບ ຣາຟິນຢາ ຈັດເປັນນັກເຕະທີ່ຫມາຍປອງຂອງຫລາຍສະໂມສອນໃນໄລລະດູການນີ້ ເຊິ່ງນອກຈາກ ບາເຊໂລນາ ແລ້ວຍັງມີ ເຊລຊີ ທີ່ຢາກໄດ້ລາວໄປຮ່ວມທີມເຊ່ັນດຽວກັນ ແຕ່ດາວເຕະຊາວບຣາຊິລ ປະຕິເສດທີ່ຈະຍ້າຍໄປຫລິ້ນໃນຖິ່ນ ສະແຕມຟອດ ບຣິດ ເຖິງວ່າ ລີດ ຢູໄນເຕັດ ຈະຕອບຮັບຂໍ້ສະເຫນີ 55 ລ້ານປອນ ຂອງເຊລຊີ ໄປແລ້ວກໍຕາມ.