ສັງຄົມສົນໃຈວ່າເປັນຍ້ອນຫຍັງລາຄາຊື້-ຂາຍ ແກັສຫຸງຕົ້ມຈິ່ງແຕກໂຕນກັນຫລາຍແຕ່ 10.000-40.000 ກີບຕໍ່ຖັງ

ແກັສຫຸງຕົ້ມເປັນສິນຄ້າໜຶ່ງ ທີ່ນອນຢູ່ໃນລາຍການສິນຄ້າລັດຕ້ອງຄວບຄຸມລາຄາ ຕາມດຳລັດ 474/ນຍ, ຂຶ້ນກັບຂະແໜງການຂອງລັດ ເປັນຜູ້ຄິດໄລ່ໂຄງສ້າງລາຄາສິນຄ້ານັ້ນໆອອກມາເພື່ອໃຫ້ຜູ້ປະກອບການນຳໄປປະຕິບັດ ກໍດັ່ງລາຄານ້ຳມັນເຊື້ອໄຟ ທີ່ຂາຍຢູ່ແຕ່ລະປ້ຳໃນທົ່ວປະເທດແມ່ນລັດເປັນຜູ້ກຳນົດໃຫ້ຕາມໄລຍະທາງຂົນສົ່ງທີ່ແຕກຕ່າງກັນອາດແຕກຕ່າງກັນໂດຍຖືເອົານະຄອນຫລວງວວຽງຈັນເປັນຈຸດສູນກາງ. ໃນກໍລະນີຫາກມີປ້ຳໃດໜຶ່ງມີການລະເມີດຂາຍເກີນລາຄາທີ່ລັດກຳນົດອອກໃນແຕ່ລະໄລຍະ ແມ່ນຈະຖືກປັບໃໝ, ສຶກສາອົບຮົມ, ປິດກິດຈະການຕາມສະຖານຫນັກຫລືເບົາ.

ແຕ່ເມື່ອເຮົາມາເບິ່ງລາຄາແກັສຫຸງຕົ້ມ ໃນປັດຈຸບັນນີ້ ປາກົດເຫັນວ່າມີ ລາຄາບໍ່ເປັນເອກະພາບກັນ ຕາມການກຳນົດລາຍການສິນຄ້າ ແລະ ບໍລິການ ທີ່ພາກລັດວາງໄວ້ ເຊິ່ງຫລຸດລື່ນກັນແຕ່ 10.000-40.000 ກີບຕໍ່ຖັງ 15 ກິໂລ, ທັງໆທີ່ຮ້ານຂາຍ-ບໍລິການ ຕັ້ງຢູ່ບ້ານ ແລະ ເມືອງດຽວກັນແທ້ໆ.

ຕໍ່ບັນຫາດັ່ງກ່າວໄດ້ມີ ຜູ້ຊົມໃຊ້ສົ່ງຄຳຖາມມາຫາກອງບກ ພວກເຮົາວ່າ: ເປັນຍ້ອນຫຍັງຈຶ່ງມີລາຄາແຕກໂຕນກັນແບບນັ້ນ? ຫລືເປັນຍ້ອນຜູ້ປະກອບການບາງຮ້ານເປັນຜູ້ກຳນົດລາຄາຂາຍເອງບໍ່ ຫລື ເປັນຍ້ອນພາກສ່ວນທີ່ກ່ຽວຂ້ອງຍັງບໍ່ມີມາດຕະການຄວບຄຸມທີ່ເຂັ້ມງວດບໍ?

ດັ່ງນັ້ນ, ຈຶ່ງເຫັນສົມຄວນຢາກໃຫ້ພາກສ່ວນກ່ຽວຂ້ອງມີການກຳນົດໂຄງສ້າງລາຄາ ເພື່ອໃຫ້ມີຄວາມເປັນເອກະພາບແລະ ເພີ່ມມາດຕະການຄວບຄຸມທີ່ຫນັກແຫນ້ນຂຶ້ນກ່ວາ ເພື່ອເປັນມາດຕະຖານດຽວກັນ.