ລາວ-ຫວຽດນາມ ຕີລາຄາຄືນການຕິດຕາມ ຊຸກຍູ້ໂຄງການຊ່ວຍເຫຼືອ-ການລົງທຶນຢູ່ລາວ

ຄະນະກຳມະການຮ່ວມມື ລາວ-ຫວຽດນາມ, ຫວຽດນາມ-ລາວ ໄດ້ຈັດກອງປະຊຸມສະຫຼຸບຕີລາຄາຜົນສຳເລັດຂອງການຕິດຕາມ, ຊຸກຍູ້ໂຄງການຊ່ວຍເຫຼືອ ແລະ ການລົງທຶນຂອງຫວຽດນາມ ຈຳນວນໜຶ່ງ ຢູ່ ສປປ ລາວ, ກອງປະຊຸມດັ່ງກ່າວຈັດຂຶ້ນໃນວັນທີ 8 ກໍລະກົດ ຜ່ານມາ ທີ່ນະຄອນຫຼວງວຽງຈັນ. ໂດຍມີ ທ່ານ ວຽງສະຫວັນ ວິໄລພອນ ຮອງປະທານຄະນະກໍາມະການຮ່ວມມືລາວ-ຫວຽດນາມ ຜູ້ປະຈໍາການຄະນະກໍາມະການຮ່ວມມື ລາວ-ຫວຽດນາມ, ທ່ານ ເຈີ່ນ ກວັກ ເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນ ສສ ຫວຽດນາມ ຮອງປະທານຄະນະກໍາມະການຮ່ວມມື ຫວຽດນາມ-ລາວ.

ກອງປະຊຸມໃນຄັ້ງນີ້, ສອງຝ່າຍ ຕີລາຄາສະພາບການຈັດຕັ້ງປະຕິບັດຂໍ້ຕົກລົງຮ່ວມມື ລາວ-ຫວຽດນາມ ໃນ 6 ເດືອນຕົ້ນປີ ແລະ ທິດທາງການຮ່ວມມື ໃນ 6 ເດືອນທ້າຍປີ 2022 ຊຶ່ງໃນ 6 ເດືອນຕົ້ນປີ 2022, ສອງຝ່າຍ ໄດ້ປະສານສົມທົບຈັດຕັ້ງປະຕິບັດເປັນຢ່າງດີ ບັນດາເນື້ອໃນຂໍ້ຕົກລົງ ວ່າດ້ວຍແຜນການຮ່ວມມື ລາວ-ຫວຽດນາມ ປະຈໍາປີ 2022 ມີປະສິດທິຜົນຕົວຈິງໃນການຊຸກຍູ້ການພົວພັນຮ່ວມມືສອງປະເທດ ໃນທຸກຂົງເຂດ.

ດ້ານການລົງທຶນ: ໃນ 5 ເດືອນຕົ້ນປີ 2022, ເຖິງວ່າສືບຕໍ່ໄດ້ຮັບຜົນກະທົບຈາກການລະບາດຂອງພະຍາດ ໂຄວິດ-19 ແຕ່ບັນດາວິສາຫະກິດ ໄດ້ມານະພະຍາຍາມ, ຕັດສິນໃຈສູງ ເພື່ອເຂົ້າມາລົງທຶນຢູ່ລາວ, ໄດ້ອະນຸມັດໂຄງການໃໝ່ 1 ໂຄງການ ແລະ ດັດແກ້ເພີ່ມທຶນຈົດທະບຽນ 3 ໂຄງການ ດ້ວຍມູນຄ່າ 64,5 ລ້ານໂດ. ປັດຈຸບັນ, ໂຄງການທີ່ໄດ້ຮັບອະນຸຍາດ ມີ 214 ໂຄງການ, ມູນຄ່າການລົງທຶນທັງໝົດ ປະມານ 5,38 ຕື້ໂດລາ; ຈັດຢູ່ອັນດັບທີ 3 ຂອງບັນດາປະເທດທີ່ມາລົງມຶນຢູ່ລາວ (ຕໍ່ຈາກຈີນ ແລະ ໄທ). ໄດ້ປະສານສົມທົບຍູ້ແຮງການດຶງດູດ ບັນດານັກລົງທຶນຍຸດທະສາດ ເຂົ້າມາລາວ ໃນບັນດາໂຄງການຍຸດທະສາດທີ່ສຳຄັນຕ່າງໆ.

ສ່ວນມູນຄ່າການຄ້າ ລາວ-ຫວຽດນາມ ໃນ 5 ເດືອນຕົ້ນປີ 2022 ບັນລຸໄດ້ 690 ລ້ານໂດລາ, ເພີ່ມຂຶ້ນ 20,2% ທຽບໃສ່ໄລຍະດຽວກັນປີ 2021. ໂຄງການຮ່ວມມືຂະໜາດໃຫຍ່ຈຳນວນໜຶ່ງ ການນຳຂັ້ນສູງສອງປະເທດໄດ້ໃຫ້ຄວາມສຳຄັນ ໄດ້ມີບາດກ້າວການຫັນປ່ຽນຢ່າງຈະແຈ້ງ ພິເສດແມ່ນໂຄງການເຂື່ອນໄຟຟ້າເຊຂະໝານ ໄດ້ກັບມາຜະລິດໄຟຟ້າ ໃນເດືຶອນພຶດສະພາ 2022. ນອກຈາກນີ້ ຍັງໄດ້ເອົາໃຈໃສ່ພັດທະນາຊັບພະຍາກອນມະນຸດ ສືບຕໍ່ໄດ້ຮັບການເອົາໃຈໃສ່ເປັນບຸລິມະສິດເປັນອັນດັບຕົ້ນໆ ຊຶ່ງປັດຈຸບັນ, ພະນັກງານ, ນັກສຶກສາລາວ ໄປສຶກສາຢູ່ຫວຽດນາມ ຈໍານວນ 14.000 ກວ່າຄົນ.

ສຳລັບໃນ 6 ເດືອນທ້າຍປີ 2022 ຄະນະກຳມະການຮ່ວມມືລາວ-ຫວຽດນາມ, ຫວຽດນາມ-ລາວ ຈະສືບຕໍ່ເສີມຂະຫຍາຍ ບັນດາກົນໄກການຮ່ວມມືສອງຝ່າຍຢ່າງມີປະສິດທິຜົນ; ປະສານສົມທົບຈັດຕັ້ງຜັນຂະຫຍາຍບັນດາຂໍ້ຕົກລົງ ທີ່ລະບຸໃນກອງປະຊຸມ ຄັ້ງທີ 44 ຢ່າງມີປະສິດທິຜົນ; ຊຸກຍູ້ບັນດາກະຊວງ, ຂະແໜງການ, ທ້ອງຖິ່ນ ຜັນຂະຫຍາຍບັນດາຂໍ້ຕົກລົງ ທີ່ໄດ້ໃຫ້ຄຳໝັ້ນສັນຍາ ຢ່າງມີປະສິດທິຜົນ ເພື່ອເປັນການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ-ຫວຽດນາມ-ລາວ 2022; ສືບຕໍ່ຊຸກຍູ້ບັນດາໂຄງການຈຸດສຸມ ເຊັ່ນ: ເສັ້ນທາງດ່ວນ ວຽງຈັນ-ຮ່າໂນ້ຍ, ເສັ້ນທາງລົດໄຟ ວຽງຈັນ-ຫວຸ່ງອ່າງ, ບໍ່ເກືອກາລີ ຄຳມ່ວນ, ສະໜາມບິນໜອງຄ້າງ, ພິເສດ ສູ້ຊົນປະສານສົມທົບແກ້ໄຂຂໍ້ຫຍຸ້ງຍາກ, ຄົງຄ້າງ ເພື່ອເຮັດໃຫ້ວຽກກຳມະສິດຖືຮຸ້ນຂອງລັດຖະບານລາວ ຢູ່ບໍລິສັດ ຮຸ້ນສ່ວນສາກົນ ລາວ-ຫວຽດ (ທ່າເຮືອຫວຸ່ງອ່າງ 1, 2 ແລະ 3) ເພີ່ມຂຶ້ນເປັນ 60% ສຳເລັດ.

ກ່ຽວກັບທຶນຊ່ວຍຂອງລັດຖະບານຫວຽດນາມ ໃຫ້ແກ່ລາວ: ຊຸກຍູ້ບັນດາອົງການ, ຫົວໜ່ວຍ ກ່ຽວຂ້ອງຍູ້ໄວຄວາມຄືບໜ້າການຈັດຕັ້ງປະຕິບັດບັນດາໂຄງການຄື: ກໍ່ສ້າງສະຖາບັນການເງິນດົງຄຳຊ້າງ ໄລຍະ 3, ໂຮງໝໍມິດຕະພາບ ແຂວງຊຽງຂວາງ, ສະຖານີວິທະຍຸ-ໂທລະພາບ ແຂວງບໍ່ແກ້ວ ໃຫ້ສຳເລັດ ເພື່ອຂ່ຳນັບຮັບຕ້ອນປີສາມັກຄີມິດຕະພາບ 2022. ນອກຈາກນີ້ ຍັງມີໂຄງການອື່ນໆອີກ.

ສຳລັບການນຳໃຊ້ທຶນຊ່ວຍເຫຼືອ ຂອງຫວຽດນາມ ໃຫ້ແກ່ລາວ: ສອງຝ່າຍເປັນເອກະພາບເພີ່ມທະວີຊຸກຍູ້ບັນດາໂຄງການທີ່ຊັກຊ້າ ເນື່ອງຈາກການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ; ຮັບຊາບຕໍ່ການຈັດຕັ້ງປະຕິບັດສຳເລັດ, ມອບ-ຮັບ ແລະ ເອົາເຂົ້າສູ່ການນຳໃຊ້ 4 ໂຄງການ ລວມມີ: ໂຄງການກໍ່ສ້າງໂຮງຮຽນນາຍສິບ ຢູ່ແຂວງໄຊສົມບູນ; ໂຄງການຍົກລະດັບຊົນລະປະທານນ້ຳລອງ ເມືອງສົບເບົາ ແຂວງຫົວພັນ; ໂຄງການສ້ອມແປງ, ຍົກລະດັບ ເຂດອະນຸສອນສະຖານ ປະທານ ໂຮ່ຈິ ມິນ ແຂວງຄຳມ່ວນ ແລະ ສະຖານີວິທະຍຸ-ໂທລະພາບ ແຂວງບໍ່ແກ້ວ. ຈັດຕັ້ງພິທີວາງສີລາລືກ 2 ໂຄງການ: ໂຄງການກໍ່ສ້າງສວນອຸທິຍານ ມິດຕະພາບ ລາວ-ຫວຽດນາມ ຢູ່ນະຄອນຫຼວງວຽງຈັນ ແລະ ສູນບໍລິການເຕັກນິກກະສິກຳ ແຂວງໄຊສົມບູນ. ນີ້ແມ່ນບັນດາເຫດການ ທີ່ມີຄວາມໝາຍໃນ “ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022”.