ປັບປຸງບາງມາດຕາຂອງກົດໝາຍວ່າດ້ວຍສານປະຊາຊົນ

ທ່ານນາງ ວຽງທອງ ສີພັນດອນ ປະທານສານປະຊາຊົນສູງສຸດ ໄດ້ສະເໜີປັບປຸງບາງມາດຕາຂອງກົດ ໝາຍວ່າດ້ວຍສານປະຊາຊົນ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 6 ກໍລະກົດນີ້ ພາຍໃຕ້ການເປັນປະທານຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດວ່າ: ພາຍຫລັງປະຕິບັດກົດໝາຍວ່າດ້ວຍສານປະຊາຊົນສະບັບປັບປຸງແຕ່ປີ 2017 ເຫັນວ່າການດໍາເນີນ ແລະ ພິຈາລະນາຕັດສິນ, ພິພາກສາຄະດີຂອງສານພົບຄວາມຫຍຸ້ງຍາກ, ຂາດບຸກຄະລາກອນທີ່ມີບົດຮຽນ, ປະສົບການແກ້ໄຂຄະດີ, ການສັບຊ້ອນ, ຈັດວາງບຸກຄະກອນຜ່ານຫຼາຍຂັ້ນຕອນ, ຊັກຊ້າ ແລະ ບໍ່ທັນສະພາບການ, ເກີດມີສະພາບບຸກຄະລາກອນເຫຼືອບໍ່ພໍຢູ່ສານບາງບ່ອນ. ສານປະຊາຊົນສູງສຸດຍັງບໍ່ສາມາດປະຕິບັດພາລະບົດບາດການຄຸ້ມຄອງມະຫາພາກຕໍ່ສານປະຊາຊົນທ້ອງຖິ່ນໄດ້ຢ່າງມີປະສິດທິພາບ.

ທ່ານນາງ ວຽງທອງ ກ່າວຕື່ມວ່າ: ຈາກຄວາມເປັນຈິງດັ່ງກ່າວ ຕ້ອງໄດ້ປັບປຸງ ແລະ ພັດທະນາລະບົບສານປະຊາຊົນໃຫ້ໜັກແໜ້ນ, ເຂັ້ມແຂງ, ກາຍເປັນເຄື່ອງມືທີ່ສັກສິດເດັດຂາດຂອງພັກ ໂດຍການປັບປຸງມາດຕາ 3 ກ່ຽວກັບການອະທິບາຍຄໍາສັບປັບປຸງ ແລະ ເພີ່ມເຂົ້າໃໝ່ບາງຄຳສັບເປັນຕົ້ນການເພີ່ມຄຳສັບຄູ່ກໍລະນີເພື່ອໃຫ້ກວມເອົາຄວາມໝາຍຄູ່ຄວາມໃນຄະດີປົກຄອງຕາມທີ່ກຳນົດໄວ້ໃນລັດຖະບັນຍັດວ່າດ້ວຍການດໍາເນີນຄະດີປົກຄອງ.

ຄຳສັບກ່ຽວກັບການຍົກຍ້າຍ ແລະ ການສັບປ່ຽນບ່ອນປະຈຳການຂອງພະນັກ ງານສານປະຊາຊົນ ເພື່ອຈຳແນກໃຫ້ເຫັນຄວາມໝາຍຂອງການຍົກຍ້າຍ ແມ່ນການຍ້າຍໄປຮັບໜ້າທີ່ໃໝ່ຢູ່ນອກລະບົບສານ, ການສັບປ່ຽນບ່ອນປະຈໍາການແມ່ນການປ່ຽນບ່ອນປະຈຳການຢູ່ພາຍໃນລະບົບສານ ປະຊາຊົນ ເພື່ອໃຫ້ສອດຄ່ອງກັບກົດໝາຍວ່າດ້ວຍຜູ້ພິພາກສາ.

ສ່ວນມາດຕາ 21, 37 ແລະ 38 ກ່ຽວກັບການແຕ່ງຕັ້ງ, ຍົກຍ້າຍ, ສັບປ່ຽນບ່ອນປະຈຳການ ແລະ ປົດຕຳແໜ່ງພະນັກງານຂອງສານປັບປຸງໃຫ້ລະອຽດຈະແຈ້ງລະຫວ່າງການແຕ່ງຕັ້ງ, ຍົກຍ້າຍ ຫຼື ປົດຕຳແໜ່ງປະທານ, ຮອງປະທານສານປະຊາຊົນທ້ອງ ຖິ່ນ ແລະ ຜູ້ພິພາກສາຂອງສານປະຊາຊົນແມ່ນສິດ ແລະ ໜ້າທີ່ຂອງຄະນະປະຈຳສະພາແຫ່ງຊາດ.

ສຳລັບການແຕ່ງຕັ້ງ, ຍົກຍ້າຍ ແລະ ປົດຕຳແໜ່ງທາງບໍລິຫານ ແລະ ການສັບປ່ຽນບ່ອນປະຈຳການໃນລະ ບົບສານປະຊາຊົນແມ່ນສິດ ແລະ ໜ້າທີ່ຂອງສານປະຊາຊົນສູງສຸດ.

ພາຍຫຼັງກົດໝາຍດັ່ງກ່າວໄດ້ຮັບຮອງ ແລະ ປະກາດໃຊ້ຈະກາຍເປັນເຄື່ອງມືດ້ານນິຕິກຳສຳຄັນໃນການຄຸ້ມຄອງ, ການປະຕິບັດໜ້າທີ່ຂອງຜູ້ພິພາກສາ ແລະ ພະນັກງານຂອງສານໄດ້ຢ່າງມີປະສິດທິພາບ, ຮັບ ປະກັນໃຫ້ການຕັດສິນ, ພິພາກສາຄະດີວ່ອງໄວ, ໂປ່ງໃສ, ຖຶກຕ້ອງ ແລະ ເປັນທໍາຍິ່ງຂຶ້ນ.