ນາຍົກລັດຖະມົນຕີສີລັງກາຍອມຮັບ ປະເທດເຖິງຈຸດລົ້ມລະລາຍແລ້ວ
ທ່ານ ຣານິລ ວິກຳສິງເຫ ນາຍົກລັດຖະມົນຕີສີລັງກາ ອອກມາຍອມຮັບໃນວັນທີ 5 ກໍລະກົດວ່າ: ສີລັງກາຢູ່ໃນສະພາບລົ້ມລະລາຍແລ້ວ ຫລັງຈາກຜະເຊີນວິກິດການທາງການເງິນຄັ້ງຮຸນແຮງທີ່ສຸດໃນຮອບຫລາຍສິບປີ.
ເສດຖະກິດຂອງສີລັງກາເລີ່ມເຂົ້າສູ່ສະພາບຫລຸດຖອຍນັບແຕ່ທ້າຍປີ 2020 ເຊິ່ງໃນເວລານັ້ນ ລັດຖະບານກ່າວໂທດວ່າເປັນຍ້ອນໂຄວິດລະບາດ ເຮັດໃຫ້ຂາດລາຍໄດ້ຈາກຂະແໜງທ່ອງທ່ຽວ, ແຕ່ຜູ້ຊ່ຽວຊານເບິ່ງວ່າ: ປັດໄຈສຳຄັນສຸດທີ່ເຮັດໃຫ້ສີລັງກາມາຢູ່ຈຸດນີ້ໄດ້ຫລັກໆຄືບັນຫາຈາກການບໍລິຫານເສດຖະກິດບໍ່ດີຂອງລັດຖະບານ ລວມທັງໜີ້ສິນຕ່າງປະເທດ.
ທ່ານ ວິກຳສິງເຫ ກ່າວວ່າ: ການເຈລະຈາກັບກອງທຶນການເງິນສາກົນ (IMF) ເພື່ອກູ້ຢືມເງິນສຸກເສີນມາຊຳລະໜີ້ ແລະ ອູ້ມເສດຖະກິດທີ່ລົ້ມສະຫລາຍນັ້ນ ອາດເປັນໄປໄດ້ຍາກ ເພາະເທື່ອນີ້ສີລັງກາຈະຂໍໄປເຈລະຈາໃນຖານະປະເທດທີ່ລົ້ມລະລາຍ ບໍ່ແມ່ນປະເທດກຳລັງພັດທະນາຄືໃນອະດີດ.
ອີກຢ່າງໜຶ່ງ, ສີລັງກາຜິດນັດຊຳລະໜີ້ຕ່າງປະເທດຄັ້ງທຳອິດໃນເດືອນພຶດສະພາຜ່ານມາ ແລະ ຫລັງຈາກນັ້ນກໍຂາດເຂີນເງິນສຳຮອງຕ່າງປະເທດທີ່ຈະໃຊ້ຈ່າຍເພື່ອນຳເຂົ້ານ້ຳມັນ ຈົນນຳໄປສູ່ການຂາດເຂີນເຊື້ອໄຟຢ່າງຮຸນແຮງທົ່ວປະເທດ.
ໃນວັນທີ 6 ກໍລະກົດ, ປະທານາທິບໍດີ ໂກຕາບາຢາ ຣາຊປັກສາ ໄດ້ໂພສຂໍ້ຄວາມລົງໃນທະວິດເຕີວ່າ: ທ່ານພະຍາຍາມຂໍການຊ່ວຍເຫລືອຈາກປະທານາທິບໍດີ ວະລາດິເມຍ ປູຕິນ ໂດຍຂໍໃຫ້ຜູ້ນຳຣັດເຊຍມອບເຄຣດິດການນຳເຂົ້າເຊື້ອໄຟໃຫ້ສີລັງກາ.
ນອກຈາກວິກິດເສດຖະກິດ ແລະ ພະລັງງານຄັ້ງຮຸນແຮງໃນຮອບກວ່າ 70 ປີແລ້ວ, ສີລັງກາຍັງມີຄວາມສ່ຽງຜະເຊີນວິກິດອາຫານນຳອີກ ເພາະລາຄາອາຫານໄດ້ເພີ່ມສູງຂຶ້ນຫລາຍ ໂດຍສະເພາະຫລັງເກີດສົງຄາມລະຫວ່າງຣັດເຊຍ ແລະ ອູແກຣນ.
ທ່ານ ວິກຳສິງເຫ ລະບຸວ່າ: ພາຍໃນປີນີ້ ເງິນເຟີ້ອາດເພີ່ມຂຶ້ນເຖິງລະດັບ 60%, ສ່ວນການເຈລະຈາກັບ IMF ຄາດວ່າອາດຕ້ອງໃຊ້ເວລາຮອດເດືອນສິງຫາ.
ອ້າງອີງ:
- https://www.businessinsider.com/sri-lanka-says-bankrupt-financial-crisis-ravages-country-debts-default-2022-7
- https://edition.cnn.com/2022/07/05/asia/sri-lanka-bankrupt-fuel-crisis-intl-hnk/index.html
