6 ເດືອນຕົ້ນປີ 2022 ທົ່ວປະເທດ ມີຜູ້ເສຍຊີວິດຈາກພະຍາດໄຂ້ຍຸງລາຍ 8 ຄົນ

ສູນໄຂ້ຍຸງ, ແມ່ກາຝາກ ແລະ ແມງໄມ້ ກະຊວງສາທາລະນະສຸກ ລາຍງານວ່າ: ຜູ້ຕິດເຊື້ອພະຍາດໄຂ້ ຍຸງລາຍ ຫລື ໄຂ້ເລືອດອອກໃນຂອບເຂດທົ່ວປະເທດ ໂດຍວັນທີ 3 ກໍລະກົດ 2022 ເພີ່ມຂຶ້ນ 171 ຄົນແລະ ນັບແຕ່ຕົ້ນປີ 2022 ມາຮອດປັດຈຸບັນ, ທົ່ວປະເທດລາວມີຜູ້ຕິດເຊື້ອພະຍາດສະສົມ 6.047 ຄົນ, ໃນນີ້ເສຍຊີວິດແລ້ວ 8 ຄົນ ຊຶ່ງແຂວງທີ່ມີຫລາຍກວ່າໝູ່ ແມ່ນນະຄອນຫລວງວຽງຈັນ ເຊັ່ນຢູ່ເມືອງສີໂຄດຕະບອງ, ໄຊເສດຖາ, ຈັນທະບູລີ ແລະ ເມືອງຫາດຊາຍຟອງ ເຖິງ 3.193 ຄົນ, ຖັດມາແມ່ນແຂວງສາ ລະວັນ 652 ຄົນ, ເຊກອງ 545 ຄົນ, ອັດຕະປື 450 ຄົນ, ສະຫວັນນະເຂດ 250 ຄົນ, ຫລວງນ້ຳທາ 249 ຄົນ ແລະ ຫລວງພະບາງ 135 ຄົນ. ສ່ວນຜູ້ເສຍຊີວິດທັງ 8 ຄົນນັ້ນ, ຢູ່ນະຄອນຫລວງມີ 4 ຄົນ, ສາລະວັນ 2 ຄົນ, ອັດຕະປື 1 ຄົນ ແລະ ຊຽງຂວາງ 1 ຄົນ.

ສູນໄຂ້ຍຸງ, ແມ່ກາຝາກ ແລະ ແມງໄມ້ ໃຫ້ຮູ້ຕື່ມວ່າ: ປີນີ້ຝົນຕົກແຕ່ຫົວປີບວກໃສ່ເປັນປີລະບາດໃຫຍ່ຂອງພະຍາດດັ່ງກ່າວ ຈຶ່ງເຮັດໃຫ້ຜູ້ຕິດເຊື້ອໄຂ້ເລືອດອອກເພີ່ມຂຶ້ນຫລາຍ ຖ້າທຽບໃສ່ໄລຍະດຽວກັນຂອງປີຜ່ານມາ ແລະ ມີຄວາມສ່ຽງສູງທີ່ຈະເກີດການລະບາດຮ້າຍແຮງ ຊຶ່ງໄລຍະທີ່ຕິດເຊື້ອສ່ວນໃຫຍ່ນັບແຕ່ທ້າຍເດືອນເມສາຫາເດືອນຕຸລາ.

ມາຮອດປັດຈຸບັນທີມງານຂອງສູນ ໄດ້ສົມທົບກັບພາກສ່ວນກ່ຽວຂ້ອງໃນນະຄອນຫລວງວຽງຈັນ ເຄື່ອນໄຫວກວດກາເຮືອນປະຊາຊົນ ຈຸດທີ່ມີຄວາມສ່ຽງຕ່າງໆພ້ອມທັງໄດ້ແນະນໍາປະຊາຊົນ ອະນາໄມເຂດທີ່ຢູ່ອາໄສເປັນປະຈໍາ ເພື່ອປ້ອງກັນພະຍາດດັ່ງກ່າວ ແລະ ໄດ້ຮຽກຮ້ອງທຸກຄົນ ເປັນເຈົ້າການກໍາຈັດບ່ອນແພ່ພັນຍຸງລາຍຕາມຫລັກການ 5ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດ ເພື່ອຫລຸດຜ່ອນ, ປ້ອງກັນການເຈັບເປັນ ແລະ ສະກັດກັ້ນການແພ່ລະບາດຂອງເຊື້ອພະຍາດໄຂ້ຍຸງລາຍ.